សម្ដេច ហ៊ុន ម៉ាណែត ជជែកជាមួយរដ្ឋមន្ត្រីការបរទេសអាមេរិក ដើម្បីជំរុញបទឈប់បាញ់ជាមួយថៃឱ្យបានឆាប់

នាយករដ្ឋមន្ត្រីកម្ពុជា សម្ដេច ហ៊ុន ម៉ាណែត នាយប់ថ្ងៃទី២៥ ខែធ្នូ ឆ្នាំ២០២៥ បានជួបជជែកតាមទូរសព្ទជាមួយរដ្ឋមន្ត្រីការបរទេសសហរដ្ឋអាមេរិក លោក Marco Rubio ជុំវិញជម្លោះតាមបណ្ដោយព្រំដែនកម្ពុជា-ថៃ ដោយកិច្ចសន្ទនានេះ គឺដើម្បីជំរុញឱ្យមានបទឈប់បាញ់ឱ្យបានឆាប់ ហើយធានាឡើងវិញចំពោះសន្តិភាពរវាងប្រទេសទាំងពីរ។

យោងខ្លឹមសារសរសេរនៅលើបណ្ដាញទំនាក់ទំនងសង្គមរបស់សម្ដេច ហ៊ុន ម៉ាណែត បានពណ៌នាឱ្យដឹងថា លោករដ្ឋមន្ត្រី Rubio បានគូសបញ្ជាក់ពីជំហរយ៉ាងច្បាស់លាស់ថា សហរដ្ឋអាមេរិកចង់ឃើញសន្តិភាព ស្ថិតស្ថេររវាងកម្ពុជា និងថៃ ដោយអះអាងថា សហរដ្ឋអាមេរិកនឹងខិតខំជំរុញឱ្យមានបទឈប់បាញ់ឱ្យបានឆាប់តាមដែលអាចធ្វើទៅបាន។

សម្ដេច ហ៊ុន ម៉ាណែត បានគូសបញ្ជាក់ជាថ្មីទៅកាន់សហរដ្ឋអាមេរិកចំពោះជំហររបស់កម្ពុជាដែលប្រកាន់ខ្ជាប់យ៉ាងម៉ឺងម៉ាត់ក្នុងការបន្តអនុវត្តតាមស្មារតីសេចក្ដីថ្លែងការណ៍រួមទីក្រុងគូឡាឡាំពួស្ដីពីកិច្ចព្រមព្រៀងសន្តិភាពរវាងកម្ពុជា និងថៃ ដោយសម្ដេចសង្ឃឹមថា ភាគីទាំងពីរនឹងបន្តធ្វើការជាមួយគ្នាស្របតាមកិច្ចព្រមព្រៀងដែលមាននេះ។

សម្ដេចនាយករដ្ឋមន្ត្រី ក៏អះអាងដែរថា កម្ពុជានៅបន្តរក្សាជំហរក្នុងការដោះស្រាយបញ្ហាព្រំដែនដោយសន្តិវិធី អនុលោមតាមកិច្ចព្រមព្រៀង និងយន្តការដែលបានឯកភាពគ្នាក្នុងពេលកន្លងមក រួមទាំងសេចក្ដីថ្លែងការណ៍រួមទីក្រុងគូឡាឡាំពួរ ដើម្បីដោះស្រាយបញ្ហាព្រំដែនកម្ពុជា-ថៃ និងកសាងសន្តិភាពយូរអង្វែងរវាងប្រទេសទាំងពីរ៕

ដោយ៖ ធឿន វ៉ាន់សុង