អាជ្ញាធរសង្កាត់ទួលសង្កែ១ បន្តពង្រឹងរបៀបរៀបរយ សណ្តាប់ធ្នាប់សាធារណៈលើផ្លូវលេខ១០៥

កាលពីល្ងាចថ្ងៃទី២៧ ខែមករា ឆ្នាំ២០២៦ ក្រុមការងារសណ្តាប់ធ្នាប់សង្កាត់ឬួលសង្កែទី១  ក្រោមការដឹកនាំរបស់លោកស្រី រាជ ផាវឿន ចៅសង្កាត់និងប្រធានគណៈបញ្ជាការឯកភាពសង្កាត់ទួលសង្កែទី១ បានចាត់ឱ្យក្រុមការងារសង្កាត់ រួមជាមួយកម្លាំងប្រជាការពារសង្កាត់ សហការជាមួយកម្លាំងប្រជាការពារខណ្ឌឫស្សីកែវ ចុះរៀបចំសណ្តាប់ធ្នាប់សាធារណៈ នៅតាមកំណាត់ផ្លូវលេខ១០៥ ស្ថិតក្នុងភូមិសាស្ត្រសង្កាត់ទួលសង្កែទី១ ខណ្ឌឫស្សីកែវ។

លោកស្រី រាជ ផាវឿន បានឱ្យដឹងថា ការចុះអនុវត្តនេះ មានគោលបំណងពង្រឹងរបៀបរៀបរយ សណ្តាប់ធ្នាប់សាធារណៈ ថែរក្សាទំហំផ្លូវ និងធានាឱ្យការធ្វើចរាចរណ៍របស់បងប្អូនប្រជាពលរដ្ឋប្រព្រឹត្តទៅដោយភាពងាយស្រួលសុវត្ថិភាព និងមិនមានការកកស្ទះ ដូចជាស្ថានភាពដែលធ្លាប់កើតមានពីមុន។

លោកស្រីបានបន្តថា ក្នុងឱកាសនោះដែរ ក្រុមការងារបានធ្វើការណែនាំ និងអប់រំដល់អាជីវករ ដែលលក់ដូរលើចំណីផ្លូវ និងលើដងផ្លូវសាធារណៈ ឱ្យផ្លាស់ប្តូរទៅលក់ដូរនៅទីតាំងសមស្របវិញ ដើម្បីចូលរួមថែរក្សាសណ្តាប់ធ្នាប់ របៀបរៀបរយ និងអនាម័យសាធារណៈរបស់សង្កាត់។

គូសបញ្ជាក់ផងដែរថា ជាមួយគ្នានេះ ក៏មានបញ្ហាលំបាកមួយចំនួនពីសំណាក់អ្នកលក់ដូរចល័ត ដែលត្រូវអូសរទេះពីទីតាំងមួយ ទៅកាន់ទីតាំងផ្សេងទៀត ប៉ុន្តែក្រុមការងារខណ្ឌ និងសង្កាត់ បានបន្តការពន្យល់ អប់រំ និងអនុវត្តដោយសន្តិវិធី ដោយផ្តោតលើការពង្រឹងការគ្រប់គ្រងទំហំផ្លូវ និងធានាឱ្យចរាចរណ៍មិនមានការកកស្ទះ៕ អត្ថបទ សំណាង