កម្ពុជាប្រឆាំងដាច់ខាត ចំពោះរាល់សកម្មភាពរបស់ថៃនៅតំបន់ប្រាសាទដែលស្ថិតក្នុងទឹកដីកម្ពុជា

កម្ពុជាតាមរយៈ ក្រសួងវប្បធម៌ និងវិចិត្រសិល្បៈ បានប្រកាសពីជំហរការតវ៉ាយ៉ាងដាច់អហង្ការ ទៅកាន់ក្រសួងវប្បធម៌ថៃ ពាក់ព័ន្ធនឹងសកម្មភាពនានាដែលអាជ្ញាធរថៃបានអនុវត្តនៅតាមតំបន់ប្រាសាទតាមាន់ និងប្រាសាទតាក្របី។ ក្រសួងវប្បធម៌ និងវិចិត្រសិល្បៈ បញ្ជាក់សារជាថ្មីឡើងវិញថា ទីតាំងប្រាសាទទាំងពីរ ស្ថិតនៅក្នុងដែនអធិបតេយ្យភាពរបស់ព្រះរាជាណាចក្រកម្ពុជាទាំងស្រុង ដូចដែលបានកំណត់យ៉ាងច្បាស់ដោយសន្ធិសញ្ញា បារាំង-សៀម ឆ្នាំ១៩០៤ និងឆ្នាំ១៩០៧ ព្រមទាំងផែនទីដែលត្រូវបានទទួលស្គាល់ជាផ្លូវការ និងនៅតែមានសុពលភាពស្របតាមច្បាប់អន្តរជាតិ។ នេះបើយោងតាមសេចក្តីប្រកាសព័ត៌មានក្រសួងវប្បធម៌ និងវិចិត្រសិល្បៈ ចុះថ្ងៃទី ០៣ ខែកុម្ភៈនេះ។

ការជំទាស់របស់កម្ពុជា បន្ទាប់ពីភាគីថៃអះអាងថានឹងជួសជុលប្រាសាទតាក្របី និងប្រាសាទខ្នាររបស់កម្ពុជា។ កាលពីថ្ងៃទី២៥ ខែមករា ឆ្នាំ២០២៦ ក្រុមការងារវិចិត្រសិល្បៈរបស់ថៃបានដឹកនាំក្រុមបុរាណវិទូ អ្នកជំនាញនានា និងមន្ត្រីពាក់ព័ន្ធ ដើម្បីចុះទៅពិនិត្យមើលសភាពខូចខាតជាក់ស្តែងនៅប្រាសាទតាក្របី និងប្រាសាទខ្នារ ដោយមានការសម្របសម្រួលពីកងកម្លាំងយោធា។ ការចុះវាតម្លៃជំហានដំបូងនេះ ដើម្បីត្រៀមរៀបចំផែនការការងារកំណាយបែបបុរាណវិទ្យា និងការតម្រៀបថ្មបុរាណ នឹងឈានទៅដល់ដំណើរការជួសជុល និងស្តារឡើងវិញនៅពេលអនាគត។

ពាក់ព័ន្ធរឿងនេះ ក្រសួងវប្បធម៌ អះអាងថាកម្ពុជាមិនអាចទទួលយកបាននូវការប្រើប្រាស់កម្លាំងណាមួយប្រឆាំងទៅលើតំបន់វប្បធម៌ និងបុរាណវិទ្យា សកម្មភាពស្តារឡើងវិញ អភិរក្ស ចុះបញ្ជី ឬសាងសង់ណាមួយ ដែលអនុវត្តដោយឯកតោភាគី ដោយគ្មានការយល់ព្រមពីភាគីកម្ពុជា ឬ សកម្មភាពណាមួយដែលប៉ះពាល់ ឬបំផ្លាញស្ថានភាពផ្លូវច្បាប់ ប្រវត្តិសាស្ត្រ និងវប្បធម៌នៃតំបន់ ទាំងនេះ។ ក្រសួងវប្បធម៌ សម្តែងការព្រួយបារម្ភយ៉ាងខ្លាំង ចំពោះរបាយការណ៍នៃការខូចខាត ធ្ងន់ធ្ងរ និងការបំផ្លិចបំផ្លាញស្ទើរតែទាំងស្រុងនៃប្រាសាទតាក្របីដែលជាទីកន្លែងសក្ការៈ និងជាបេតិកភណ្ឌប្រវត្តិសាស្ត្រ ដ៏សំខាន់ដែលត្រូវបានថែរក្សាអស់រយៈពេលរាប់សតវត្សរ៍ មានតម្លៃវប្បធម៌ និងជាដួងព្រលឹងរបស់ប្រជាជនខ្មែរ។

ជាមួយគ្នានេះ ក្រសួងវប្បធម៌កម្ពុជា បានអំពាវនាវឱ្យភាគីថៃបញ្ឈប់ជាបន្ទាន់នូវសកម្មភាពទាំងអស់នៅតំបន់ ប្រាសាទតាមាន់ និងប្រាសាទតាក្របីដោយគោរពអធិបតេយ្យភាពរបស់កម្ពុជា និងដោះស្រាយបញ្ហាពាក់ព័ន្ធទាំងអស់ ដោយសន្តិវិធី និងស្របតាមច្បាប់អន្តរជាតិ។ ក្រសួង បន្តការប្តេជ្ញាចិត្តក្នុងការការពារ និងថែរក្សាបេតិកភណ្ឌវប្បធម៌របស់កម្ពុជា ព្រមទាំងកិច្ចសហប្រតិបត្តិការដោយផ្អែកលើការគោរពគ្នាទៅវិញទៅមក ភាពស្របច្បាប់និងគោលការណ៍ដែលត្រូវបាន គាំទ្រដោយអង្គការអន្តរជាតិ៕