ព័ត៌មានជាតិ

កម្លាំងជំនាញ ចុះពិនិត្យទីតាំងដែលត្រូវគេចាក់ដីរំលោភច្រាំងស្ទឹងសង្កែ

បានផុស

១ ខែ មុន

នៅ

ថ្ងៃចន្ទ ១៦ មីនា ២០២៦

ដោយ

អ៊ិន ពិសី

កម្លាំងជំនាញក្រុមការងារស្រុកសង្កែ បាននិងកំពុងចុះពិនិត្យទីតាំងដែលត្រូវគេចាក់ដីរំលោភច្រាំងស្ទឹងសង្កែ។

ថ្មីៗ នេះ មានបុគ្គលមួយរូប បានចាក់ដីជាច្រើនឡាន ដើម្បីរំលោភយកច្រាំងស្ទឹងសង្កែធ្វើជាកម្មសិទ្ធិ ដោយបំពានលើច្បាប់ភូមិបាល និងច្បាប់ធនធានទឹកទាំងស្រុង។ ក្នុងរយៈពេល នៃការចាក់ដី គឺគ្មានអាជ្ញាធរមូលដ្ឋានណាមួយចុះរារាំង ទប់ស្កាត់ ឬណែនាំ ដើម្បីឲ្យបុគ្គលរូបនោះបញ្ឈប់សកម្មភាពល្មើសច្បាប់នេះសោះឡើយ។

ក្រោយពីមានការផ្សព្វផ្សាយរបស់សារព័ត៌មានមួយចំនួន ទើបមានការភ្ញាក់ផ្អើល ហើយក៏មានការរាយការណ៍បន្តកន្ទុយគ្នា ដោយមេភូមិរាយការណ៍ទៅអាជ្ញាធរឃុំ ហើយលោកមេឃុំក៏បានរាយការណ៍បន្តទៅអាជ្ញាធរស្រុក ដើម្បីចុះពិនិត្យលើបញ្ហានេះ។

លុះនៅព្រឹកថ្ងៃទី ១៦ ខែមីនា ឆ្នាំ ២០២៦ គេសង្កេតឃើញកម្លាំងជំនាញក្រុមការងារស្រុកសង្កែ ដែលដឹកនាំដោយ លោក នាង ច័ន្ទថារ៉ា អភិបាលស្រុក និង លោក ខៃ សុដា ប្រធានមន្ទីរធនធានទឹក និងឧតុនិយម បានចុះទៅដល់ទីតាំង នៃការរំលោភដីចំណីស្ទឹងនេះ។

ក្រោយពីបានចុះសិក្សា និងពិនិត្យ ឃើញថា បុគ្គលដែលជាម្ចាស់ដីបានចាក់ដីបំពានទៅលើច្រាំងស្ទឹងសង្កែ ប្រវែង ១០ ម៉ែត្រ លើផ្ទៃដីច្រាំងចាស់ ដូច្នេះក្រុមការងារសម្រេចឲ្យម្ចាស់ដីកាយយកដីថ្មីដែលមានប្រវែង ១០ ម៉ែត្រ ចេញឲ្យអស់ពីលើច្រាំងចាស់ ដើម្បីរក្សាច្រៀកឲ្យដូចដើមវិញ ដោយមិនអនុញ្ញាតបន្តចាក់ដី និងសាងសង់សំណង់ផ្សេងៗ ទៀតឡើយ។

បើតាមការបញ្ជាក់ពី លោក អ៊ឹម ស្វាង មេឃុំវត្តតាមិម បានបង្ហើបឲ្យដឹងថា បុគ្គលដែលចាក់ដីរំលោភច្រាំងស្ទឹងសង្កែ នេះ មានឈ្មោះ សេង ជាមន្ត្រីសុខាភិបាល ហើយគេចាក់ដីគោលបំណងពង្រីកដីរបស់ខ្លួនងាយស្រួលក្នុងពិធីអ្វីមួយគឺដីរបស់គេអាចធំទូលាយ និងអាចកសាងអ្វីបន្ថែមទៀតបាន ប៉ុន្តែនៅពេលក្រុមការងារចុះគឺពុំមានវត្តមានបុគ្គលរូបនេះឡើយ ដោយមានតែតំណាងប៉ុណ្ណោះ ប៉ុន្តែទោះបីយ៉ាងណាក៏ក្រុមការងារមន្ត្រីជំនាញ និងលោកអភិបាលស្រុកសង្កែ បានកំណត់រួចហើយធ្វើយ៉ាងណាឲ្យម្ចាស់ដីកាយចេញឲ្យអស់ពីច្រាំងស្ទឹងដូចដើម៕

អត្ថបទ ៖ សោ និយមរ័ត្ន