ពលរដ្ឋអ្នករស់នៅក្បែរស្ទឹងសង្កែកំពុងរីករាយក្នុងការនេសាទត្រី ពេលទឹកឡើង

នៅរដូវទឹកជំនន់ម្ដងៗ ប្រជាពលរដ្ឋមានការសប្បាយរីករាយក្នុងការនេសាទត្រីតាមបែបលក្ខណៈគ្រួសារនៅតាមប្រព័ន្ធប្រឡាយ ព្រែក អូរ ដែលទឹកជំនន់ហូរបែកចេញពីដងស្ទឹងសង្កែ ដែលជាហេតុនាំឲ្យត្រីសម្បូរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើគេសង្កេតមើលនៅតាមព្រែកដែលបែកចេញពីដងស្ទឹងសង្កែក្បែរទំនប់សាលាតាអន មានប្រជានេសាទរាប់សិបនាក់ បានប្រើប្រាស់សំណាញ់បង់បណ្ដាក់គ្នាយ៉ាងសប្បាយរីករាយ ដោយក្នុងមួយសំណាញ់ៗ ពេលលើកចេញឡើងពីទឹក គឺមានត្រីច្រើន ដែលភាគច្រើនជាប្រភេទត្រីរៀល ត្រីស និងត្រីឆ្ពិន។

លោក សួន មេសា ដៃកំពុងកាន់សំណាញ់បាននិយាយថា លោកមានទីលំនៅក្នុងភូមិវាល បន្ទាប់ពីឃើញប្រជាពលរដ្ឋបង់សំណាញ់បានត្រីច្រើនបែបនេះ លោកក៏បានទៅយកសំណាញ់របស់លោកដែលមានក្រឡាពីរហ៊ុនកន្លះ យកមកបង់នឹងគេទើបដឹងថាពិតជាសម្បូរត្រីមែន គឺក្នុងសំណាញ់ខ្លះប៉ះហ្វូងត្រីអាចបានពីមួយគីឡូក្រាម ទៅពីរគីឡូក្រាម។

លោកបានបន្តថា នៅពេលដែលបង់បានម្ដងៗ ក៏មានប្រជាពលរដ្ឋមកសុំទិញជាបណ្ដើរៗ ដូច្នេះលោកក៏បង់ផងលក់ផង ហើយការរកត្រីប៉ុន្មានថ្ងៃនេះ ក៏បានរកចំណូលបានគ្រាន់បើដែរដោយសារទឹកជំនន់នេះ៕

អត្ថបទ៖ សោ និយមរ័ត្ន