ទឹកស្ទឹងសង្កែប្រែពណ៌ខៀវក្រម៉ៅឡើងស្លែ មន្រ្តីជំនាញ​ប្រាប់​មូលហេតុ

រយៈពេលជិតមួយខែកន្លងទៅនេះ គេសង្កេតឃើញថាទឹកស្ទឹងសង្កែហាក់ប្រែពណ៌ខៀវក្រម៉ៅ ដោយសារតែទឹកស្ទឹងឡើងស្លែ ហើយស្ថានភាពទឹកគឺនៅនឹងដោយមិនមានការហូរទៅក្រោមឡើយ ដោយសារលំហូរទឹកនៅដដែល ត្រូវនឹងពន្លឺថ្ងៃក្តៅផងនោះ ទើបធ្វើឲ្យស្ថានភាពទឹកប្រែទៅជាបែបនេះ។

ប្រជាពលរដ្ឋជាច្រើនដែលរស់នៅតាមដងស្ទឹងសង្កែក្នុង​ក្រុង​បាត់ដំបង​បានលើកឡើងស្រដៀងគ្នាថា ទឹកនៅក្នុងស្ទឹងសង្កែ​គឺមិនហូរឡើយហើយក៏បានប្រែពណ៌ ទៅជាខៀវក្រម៉ៅប្រកបដោយស្លែផង សូម្បីតែពួកគាត់ចង់ចុះងូតទឹកស្ទឹងក៏រាងញញើតដែរ ដោយសារតែសម្លឹងមើលទៅពោរពេញដោយស្លែឡើងពណ៌ក្រម៉ៅទៅហើយ។

តាមរយៈទូរសព្ទនាព្រឹកថ្ងៃទី ៤ ខែមករា ឆ្នាំ២០២៦ លោក ខៃ សុដា ប្រធានមន្ទីរធនធានទឹក និង ឧតុនិយម ខេត្តបាត់ដំបងបាន​បញ្ជាក់ថា ដោយសារតែបច្ចុប្បន្នជារដូវប្រាំង ដូច្នេះ​អាជ្ញាធរ​ត្រូវការរក្សាទឹកទុកសម្រាប់ប្រើប្រាស់នៅក្នុងក្រុងបាត់ដំបង ទើបធ្វើឱ្យមន្ទីរតម្រូវឲ្យក្រុមជំនាញធ្វើការបិទទ្វារទឹកនៅទំនប់ស្ទាក់ទឹកសាលាតាអន បើស្ថិតនៅប៉ែកខាងក្រោម ដើម្បីរក្សាទឹកដោយមិនខ្ជះខ្ជាយឬបង្ហូរចោលទៅក្នុងបឹងទន្លេសាប។

លោកបានបន្ថែមថា ពេលនេះទឹកនៅប៉ែកខាងលើ ដូចជាទំនប់សេកសក ឬទំនប់ស្ទាក់ទឹកកង្ហត គឺទឹកមានការស្រកចុះច្រើន ដូច្នេះហើយបានជាមន្ទីរចាំបាច់ត្រូវបិទទ្វារទឹកខាងក្រោមដើម្បីរក្សាទឹកសម្រាប់ប្រើប្រាស់នៅក្នុងក្រុង និងសម្រាប់ស្ថានីយទាញយកទឹកឆៅរបស់អង្គភាពរដ្ឋាករទឹកខេត្តបាត់ដំបង។

ជាចុងក្រោយលោកប្រធានមន្ទីរបានសង្កត់ធ្ងន់ថា សម្រាប់ការទាញយកទឹកទៅផលិតទឹកស្អាត របស់អង្គភាពរដ្ឋាករទឹកខេត្ត បើតាមការសិក្សារបស់លោកគឺមិនមានការប៉ះពាល់នោះឡើយ ដោយសារតែអង្គភាពជំនាញមានការប្រើថ្នាំនិងអាងច្រោះត្រឹមត្រូវដែលមិនអាចធ្វើឲ្យប៉ះពាល់ដល់ទឹកស្អាត ដែលត្រូវចែកចាយទៅឱ្យប្រជាពលរដ្ឋប្រើប្រាស់នោះឡើយ៕

អត្ថបទ៖ សោ និយមរ័ត្ន