នគរសង្ក្រាន្តផ្សារទួលទំពូង នឹងចាប់ផ្តើមនៅថ្ងៃទី១១ខាងមុខ អមជាមួយការតុបតែងបែបប្រពៃណីជាតិជាច្រើន

លោក ចំរើនសុខលីមប្រធានគណៈកម្មការគ្រប់គ្រងផ្សារទួលទំពូងបានឲ្យដឹងថា ក្រុមការងារគណៈកម្មការផ្សារបានត្រៀមលក្ខណៈរួចរាល់ពីចំងាយហើយសម្រាប់កម្មវិធីនគរសង្ក្រាន្តខាងមុខដោយក្នុងកម្មវិធីនឹងមានការរៀបចំលេងល្បែងកម្សាន្តបែបប្រពៃណីជាតិមានដូចជាចោលឈូង, បោះអង្គុញ, ទាញព្រ័ត្រ,លាក់កន្សែង ជាដើមដើម្បីរក្សាបាននូវល្បែងប្រពៃណីខ្មែរ។ក្នុងនោះបញ្ហាសន្តិសុខសុវត្ថិភាពក៏ត្រូវបានយកចិត្តទុកដាក់នឹងពង្រឹងឲ្យបានពេញលេញផងដែរដើម្បីធានាសុវត្ថិភាពជូនភ្ញៀវនិងប្រជាជនដែលអញ្ជើញមកកម្សាន្ត។

លោកប្រធានផ្សារបន្ថែមថា៖ព្រឹត្តិការណ៍“ នគរសង្ក្រាន្ត“ នៅផ្សារទួលទំពូងនឹងធ្វើឡើងរយៈពេល០៩ថ្ងៃដោយចាប់ផ្តើមពីថ្ងៃទី១១ដល់ថ្ងៃ១៩ខែមេសាឆ្នាំ២០២៦។

ផ្សារទួលទំពូងជាគោលដៅមួយក្នុងចំណោមគោលដៅចំនួន០៥ធំៗផ្សេងទៀតក្នុងរាជធានីភ្នំពេញដែលត្រូវជ្រើសជាទីតាំងសម្រាប់រៀបចំព្រឹត្តិការណ៍“ នគរសង្ក្រាន្ត“ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរឆ្នាំ២០២៦។

បច្ចុប្បន្ននៅបណ្តោយផ្លូវជុំវិញបរិវេណផ្សារទួលទំពូងត្រូវបានរៀបចំតុបតែងលម្អដោយការតាំងគ្រឿងរណ្តាប់បែបប្រពៃណីខ្មែរអមជាមួយការលើកទង់ជាតិខ្មែរនៅតាមតូបលក់ដូររបស់អាជីវករនីមួយៗស្របពេលដែលកំណើនភ្ញៀវជាតិនិងអន្តរជាតិក៏កាន់តែកើនច្រើនក្នុងការចូលទៅទិញទំនិញនិងសម្ភារ។

អាជីវករនៅផ្សារទួលទំពូងសម្តែងក្តីមោទកភាពនិងរីករាយដែលរដ្ឋាភិបាលបានជ្រើសយកផ្សារលក់ដូររបស់ពួកគាត់ជាទីតាំងរៀបចំសង្ក្រាន្តឆ្នាំថ្មីដែលវាកាន់តែធ្វើឲ្យផ្សារទួលទំពូងកាន់តែមានការគាំទ្រច្រើនដែលជាផ្នែកជួញដល់សេដ្ឋកិច្ចអ្នកក្នុងតំបន់និងសង្គមជាតិ។

គួរបញ្ជាក់ថា ព្រឹត្តិការណ៍នគរសង្ក្រាន្តឆ្នាំថ្មីនេះនឹងធ្វើឡើងរយៈពេល០៦ថ្ងៃគិតចាប់ពីថ្ងៃទី១៤ដល់ថ្ងៃទី១៩ខែមេសាឆ្នាំ២០២៦នៅតាមទីតាំងធំៗចំនួន០៦រួមមាន៖រមណីយដ្ឋានវប្បធម៌ប្រវត្តិសាស្ត្រវត្តភ្នំ, ផ្លូវថ្មើរជើងចតុមុខ (Walk street) , សួនវត្តបទុមវតី, ផ្សារទួលទំពូង, សួនច្បារវឌ្ឍនៈដល់ផ្សារាត្រីនិងទីតាំងបាសាក់លែន៕ អត្ថបទ៖សុភា