ខេត្តតាកែវមិនអនុញ្ញាតឱ្យលេងប៉ាតម្សៅ បាញ់ទឹកតាមទីតាំងសង្ក្រាន្ត ដងផ្លូវឡើយ ដើម្បីបញ្ចៀសការប៉ះទង្គិចគ្នា និងគ្រោះថ្នាក់ចរាចរណ៍

អភិបាលខេត្តតាកែវ លោក វ៉ី សំណាង បញ្ជាក់ច្បាស់ៗថា ក្នុងខេត្តតាកែវមិនអនុញ្ញាត ឱ្យមានការលេងប៉ាតម្សៅ ឬបាញ់ទឹក នៅតាមទីតាំងប្រារព្ធពិធីសង្ក្រាន្ត ក៏ដូចជាតាមដងផ្លូវសាធារណៈឡើយ ព្រោះសកម្មភាពទាំងនេះមិនត្រឹមតែមិនមែនជាវប្បធម៌ខ្មែរប៉ុណ្ណោះទេ ប៉ុន្តែវាក៏អាចបង្កជាគ្រោះថ្នាក់ចរាចរណ៍ ការប៉ះទង្គិចគ្នា និងធ្វើឱ្យបាត់បង់សណ្តាប់ធ្នាប់សាធារណៈ ដែលប៉ះពាល់ដល់ភាពសប្បាយរីករាយរបស់មហាជន។ នេះបើតាមការផ្សព្វផ្សាយរបស់ក្រសួងមហាផ្ទៃ ដោយដកស្រង់ប្រភពចេញពីរដ្ឋបាលខេត្តតាកែវ  ក្រោយកិច្ចប្រជុំគណៈកម្មការ និងក្រុមការងារក្នុងការរៀបចំព្រឹត្តិការណ៍«តាកែវសង្ក្រាន្តឆ្នាំ២០២៦» នាថ្ងៃទី១៣ ខែមេសា នេះ។

គួររម្លឹកថា កាលពីខែមីនា កន្លងទៅ នាយករដ្ឋមន្ត្រីកម្ពុជា សម្ដេច ហ៊ុន ម៉ាណែត បានប្រកាសថា មិនឱ្យយករថយន្តពន្លត់អគ្គិភ័យទៅបាញ់ទឹកលេង ក្នុងថ្ងៃចូលឆ្នាំខ្មែរឡើយ ទន្ទឹមនេះ សម្ដេចក៏ស្នើឱ្យយុវជនផ្អាកលេងបាញ់ទឹក និងប៉ាតម្សៅ ហើយងាកមកលេងល្បែងប្រជាប្រិយខ្មែរឱ្យបានផុសផុល។​

ក្នុងកិច្ចប្រជុំដដែល អភិបាលខេត្តតាកែវ ជំរុញឱ្យអាជ្ញាធរ និងអ្នករៀបចំកម្មវិធីតាមវត្តអារាម និងទីសាធារណៈ ត្រូវរៀបចំឱ្យមានការលេងល្បែងប្រជាប្រិយខ្មែរ ដែលក្នុងនោះរួមមានបោះអង្គញ់ ចោលឈូង ទាញព្រ័ត្រ លាក់កន្សែងជាដើម។ឯកឧត្តមបានលើកទឹកចិត្តឱ្យមានការរាំតាមចង្វាក់ប្រពៃណីដូចជា រាំវង់ រាំក្បាច់ សារ៉ាវ៉ាន់ និងឡាំលាវ ដែលជានិមិត្តរូបនៃភាពទន់ភ្លន់ និងសាមគ្គីភាពរបស់ខ្មែរ។

អភិបាលខេត្តតាកែវ លោក វ៉ី សំណាង ក៏បានអំពាវនាវដល់បងប្អូនប្រជាពលរដ្ឋទាំងអស់ ត្រូវចូលរួមសហការជាមួយសមត្ថកិច្ច និងអាជ្ញាធរ ដើម្បីធ្វើឱ្យព្រឹត្តិការណ៍ «តាកែវសង្ក្រាន្ត ឆ្នាំ២០២៦» ក្លាយជាការចងចាំដ៏ល្អ សប្បាយរីករាយ និងពោរពេញដោយមោទនភាពជាតិខ្មែរ។

ព្រឹត្តិការណ៍សង្ក្រាន្តខេត្តតាកែវឆ្នាំនេះ រដ្ឋបាលខេត្តតាកែវរំពឹងថានឹងទាក់ទាញភ្ញៀវទេសចរយ៉ាងច្រើនកុះករ មកទស្សនាកម្សាន្តនៅតាមតំបន់រមណីយដ្ឋាន និងទីតាំងសំខាន់ៗក្នុងខេត្ត ក្រោមការយកចិត្តទុកដាក់ខ្ពស់លើផ្នែកសន្តិសុខ និងអនាម័យបរិស្ថាន៕