អាជ្ញាធរកំពង់ចាមបន្តពង្រឹងវិធានការបិទខ្ទប់ភូមិ និងឃុំមួយចំនួនបន្ថែមទៀត

អាជ្ញាធរខេត្តកំពង់ចាម នៅរសៀលថ្ងៃទី ២៩ ខែមេសា បានចុះពិនិត្យមើលទីតាំងផ្ទុះជំងឺកូវីដ១៩ នៅក្នុងស្រុកកងមាស និងត្រួតពិនិត្យមើលទីតាំងសម្រាប់ធ្វើជាមណ្ឌលចត្តាឡីស័ក ក្នុងក្របខណ្ឌស្រុកកងមាស ជាច្រើនកន្លែង។

លោក អ៊ុន ចាន់ដា អភិបាលនៃគណៈអភិបាលខេត្តកំពង់ចាម និងជាប្រធានគណៈកម្មការខេត្តប្រយុទ្ធប្រឆាំងនឹងជំងឺកូវីដ-១៩ បានណែនាំគណៈបញ្ជាការឯកភាពរដ្ឋបាលស្រុក និងសមត្ថកិច្ចពាក់ព័ន្ធត្រូវបន្តគ្រប់គ្រងអ្នកប៉ះពាល់ ហើយក្នុងករណីអ្នកប៉ះពាល់ដោយផ្ទាល់ត្រូវដាក់ឱ្យធ្វើចត្តាឡីស័កនៅមណ្ឌលចត្តាឡីស័កស្រុក និងអ្នកប៉ះពាល់ដោយប្រយោល ត្រូវដាក់ឱ្យធ្វើចត្តាឡីស័កនៅតាមផ្ទះរៀងៗខ្លួន។

ម្យ៉ាងទៀត លោកអភិបាលខេត្តកំពង់ចាមបានស្នើឱ្យបន្តពង្រឹង និងគ្រប់គ្រងភូមិសាស្ត្រដែលរដ្ឋបាលខេត្ត សម្រេចបិទខ្ទប់ សំដៅធ្វើយ៉ាងណាទប់ស្កាត់ការចេញ-ចូល សម្រាប់ប្រជាពលរដ្ឋនៅក្នុងភូមិ ដោយមិនអនុញ្ញាតឲ្យមានការចេញ-ចូល ឬបើករបរអាជីរកម្មគ្រប់ប្រភេទ នៅក្នុងភូមិដែលត្រូវបិទខ្ទប់ ។

លោកក៏ស្នើឱ្យរៀបចំខ្សែប្រព័ន្ធសុវត្ថិភាពព័ទ្ធភូមិដែលបិទខ្ទប់ រួមនឹងការដាក់បម្រាមចេញ-ចូល សម្រាប់ប្រជាពលរដ្ឋនៅ​ក្នុងភូមិដោយមិនអនុញ្ញាតឲ្យមានការចេញ-ចូល និងបន្តផ្សព្វផ្សាយ សារអប់រំ ឱ្យបានជាប់ជាប្រចាំ ដល់ប្រជាពលរដ្ឋនៅក្នុងមូលដ្ឋាន ពិសេសនៅភូមិសាស្ត្រតបិទខ្ទប់ភូមិ៕

អត្ថបទ​៖ហុង​ ម៉េងហៀ​