ស្ត្រីម្នាក់ចេញវីដេអូសុំទោសជាសាធារណៈ ករណីបង្ហោះវីដេអូលើបណ្ដាញសង្គម ថាមានយន្តហោះធ្លាក់នៅស្រុកពេជ្រាដា

ស្ត្រី ម្នាក់វ័យ៣២ឆ្នាំ កាលពីថ្ងៃ២៨ខែមិថុនាកន្លងទៅ បានធ្វើសកម្មភាពថត យន្តហោះបញ្ចេញផ្សែងលើផ្ទៃមេឃ ហើយបង្ហោះលើបណ្ដាញសង្គម ដែលបានភ្ជាប់ជាមួយសំណេរសរសេរមានខ្លឹមសារថា ៖«មានយន្ត ហោះមួយគ្រឿងបានធ្លាក់ នៅស្រុកពេជ្រាដាខេត្តមណ្ឌលគិរី» ក្រោយពីការ វែកញែកនិងតាមដានពីសំណាក់មហាជនយ៉ាងច្រើនសន្ធឹកសន្ធាប់ ភ្លាមនោះ លោក ជា ចិត្រា ស្នងការនគរបាលខេត្តមណ្ឌលគិរីបានបញ្ជាឱ្យអធិការនគរបាលស្រុកពេជ្រាដា នៅថ្ងៃទី២៩ខែមិថុនា ស្រាវជ្រាវបន្ទាន់ករណីខាងលើនិងឈានទៅដល់ សាកសួរនាំដល់ផ្ទះពលរដ្ឋមួយរូបមានឈ្មោះ ស៊ី ថន ភេទស្រី អាយុ ៣២ឆ្នាំ មានទីលំនៅភូមិឡាំម៉េះ ឃុំប៊ូស្រា ស្រុកពេជ្រាដា ខេត្តមណ្ឌលគិរី ដែលជាម្ចាស់គណនីហ្វេសប៊ុក។

លោក ជា ចិត្រា ស្នងការនគរបាលខេត្តមណ្ឌលគិរីបានប្រាប់«កម្ពុជាថ្មី»នៅថ្ងៃទី៣០មិថុនានេះថា ក្រោយការសាកសួរពី កម្លាំងនគរបាលជំនាញ ម្ចាស់គណនីហ្វេសប៊ុកឈ្មោះ« ស៊ីថន មណ្ឌលគិរី» បានអះអាងថា នាងគ្រាន់តែឃើញ យន្តហោះ ហោះនៅលើអាកាស រួចក៏បានថតលេងតាមអ្វីដែលជាកូនក្មេងនៅក្បែរនោះលើកឡើង បង្ហោះលេងដើម្បីកម្សាន្តនៅក្នុងបណ្ដាញសង្គមតែប៉ុណ្ណោះ មិនមានចេតនា បំផុសព័ត៌មានមិនពិត បង្កើតចលាចលនៅក្នុងសង្គមនោះឡើយ។ ដើម្បីកុំឱ្យមានសកម្មភាពបែបនេះបន្តទៅទៀត លោក ជា ចិត្រាស្នងការខេត្ត ក៏បានបញ្ជាឱ្យធ្វើការអប់រំនិងកិច្ចសន្យាបុគ្គលឈ្មោះ ថន ភេទស្រី អាយុ ៣២ឆ្នាំ ជាលាយលក្ខណ៍អក្សរមុខសមត្ថកិច្ច នឹងតម្រូវឱ្យលុបចោលវីដេអូដែលគ្មានប្រភពច្បាស់លាស់ និងតម្រូវចេញវីដេអូបំភ្លឺបកស្រាយសុំទោសជាសាធារណៈ កុំឱ្យអ្នកលេងប្រើប្រាស់បណ្ដាញសង្គមមានការយល់ច្រឡំបន្តទៀតផងដែរ៕

អត្ថបទ ៖ រៀម សុខហេង