លោក ប្រាជ្ញ ច័ន្ទ ប្រកាសចូលកាន់តំណែងជាប្រធាន គ.ជ.ប នាព្រឹកនេះ

នៅ​ព្រឹក​ទី​៣០​ ខែមិថុនា ឆ្នាំ២០២១នេះគណៈកម្មាធិការជាតិរៀបចំការបោះឆ្នោត (គ.ជ.ប) បានរៀបចំពិធីប្រកាស​ចូលកាន់​តំណែងរបស់ ប្រធានថ្មី គឺលោក ប្រាជ្ញ ច័ន្ទ ដែលពិធីនេះ ក្រោម​អធិបតីភាព សម្តេចចៅហ្វា​វាំង​ គង់ សំអុល ឧបនាយក​រដ្ឋមន្ត្រី រដ្ឋមន្ត្រីក្រសួង​ព្រះបរមរាជវាំង ជាព្រះរាជតំណាងរបស់ព្រះមហាក្សត្រ។

លោក ប្រាជ្ញ ច័ន្ទ ត្រូវបានព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណា​ចក្រកម្ពុជា ចេញព្រះរាជក្រឹត្យត្រាស់បង្គាប់តែងតាំងជាប្រធាន​គណៈកម្មាធិការជាតិរៀបចំការបោះឆ្នោត (គ.ជ.ប) ជំនួសលោក ស៊ិក ប៊ុនហុក ដែលបាន​លាលែងដោយសាតែបញ្ហាសុខភាព ហើយការចេញព្រះរាជក្រឹត្យតែងតាំងនេះ បានធ្វើឡើង​បន្ទាប់ពីអង្គសភាបានធ្វើការបោះឆ្នោតទុកចិត្តជាប្រធានគណៈកម្មាធិការជាតិរៀបចំការបោះឆ្នោត (គ.ជ.ប) ដោយទទួលបានសំឡេងព្រមចំនួន៨២សំឡេង នៅក្នុងសម័យប្រជុំរដ្ឋសភា លើកទី៦ នីតិកាលទី៦ កាលពីព្រឹកថ្ងៃទី២៤ ខែមិថុនា ឆ្នាំ២០២១។

លោក ប្រាជ្ញ ច័ន្ទ គឺជាបេក្ខជនមួយរូបក្នុងចំណោមពីររូប (លោក ប្រាជ្ញ ចន្ទ និង លោក ការ លាន) ដែលបានដាក់ពាក្យស្នើសុំធ្វើជាបេក្ខភាពប្រធាន គ.ជ.ប ទៅ កាន់រដ្ឋសភា ហើយ​រដ្ឋសភា បានសម្រេចបោះឆ្នោតជ្រើសរើសយកលោក ប្រាជ្ញ ចន្ទ ជាប្រធាន គ.ជ.ប៕

អត្ថបទ៖ កោះកែវ