៦ខែជាងដើមឆ្នាំ សមត្ថកិច្ចបង្ក្រាបគ្រឿងញៀនជាង៣,០០០ករណី មនុស្សជាង៧,០០០នាក់

ភ្នំពេញ៖ ប្រទេសកម្ពុជាមិនមែនជាប្រទេសដែលផលិតគ្រឿងញៀននោះទេ ផ្ទុយទៅវិញឧក្រិដ្ឋគ្រឿងញៀន តែងតែប៉ុនប៉ងនាំគ្រឿងញៀនឆ្លងកាត់ប្រទេសកម្ពុជា ដើម្បីយកទៅជួញដូរ និងចែកចាយទៅកាន់បណ្តាប្រទេសផ្សេងៗទៀត។
សកម្មភាពដឹកជញ្ជូនបទល្មើសគ្រឿងញៀនទាំងអស់នេះផងដែរ សមត្ថកិច្ចកម្ពុជា តែងតែចាត់វិធានការទប់ស្កាត់គ្រប់កាលៈទេសៈ ក្នុងការបង្ក្រាបក្រុមឧក្រិដ្ឋគ្រឿងញៀនជាបន្តបន្ទាប់ ដែលមួយខែៗសមត្ថកិច្ចគ្រប់លំដាប់ថ្នាក់របស់ប្រទេស​កម្ពុជា បានខិតខំប្រឹងប្រែងបង្ការ និងបង្ក្រាបបទល្មើសគ្រឿងញៀនជាច្រើនករណី ព្រមទាំងចាប់យកវត្ថុតាងថ្នាំញៀនរាប់គីឡូក្រាមផងដែរ។  

យោងតាមប្រភពព័ត៌មានពីមន្ទីរប្រឆាំងគ្រឿងញៀន អគ្គស្នងការដ្ឋាននគរបាលជាតិ នៃ ក្រសួងមហាផ្ទៃ បានប្រាប់ឱ្យដឹងថា លទ្ធផលអនុវត្តច្បាប់ចាប់ពីថ្ងៃទី០១ ខែមករា រហូតដល់ថ្ងៃទី០៥ ខែកក្កដា ឆ្នាំ២០២១នេះ សមត្ថកិច្ចបង្ក្រាបបទល្មើសគ្រឿងញៀនសរុប ៣,៣០៦ករណី ឃាត់មនុស្ស ៧,៣៧០នាក់ ស្រី ៤០៨នាក់។ ក្នុងនោះជួញដូរ រក្សាទុក កែច្នៃចាត់ចែង ២,១៦៦ករណី ការដាំដុះ ២៩ករណី ការប្រើប្រាស់ ១,១១១ករណី និង អនុវត្ដដីកា ២៣៣ដីកា។ 

ជាមួយគ្នានេះ សមត្ថកិច្ចចាប់យកវត្ថុតាងសារធាតុញៀនគ្រប់ប្រភេទសរុបជាង ៧៥៤គីឡូក្រាម កញ្ឆាស្រស់ ៥៧,៥២៣ដើម និងកញ្ឆាស្ងួត ជាង ៩៩គីឡូក្រាម រថយន្ដ ៦១គ្រឿង ម៉ូតូ ១,០១៥គ្រឿង ទូរស័ព្ទ ៣,២៥៤គ្រឿង ជញ្ជីង ១៦២គ្រឿង អាវុធខ្លី ២៦ដើម និង អាវុធវែង ១៩ដើម (កែច្នៃ១៨ដើម)៕

អត្ថបទ៖ រ៉ាវុទ្ធ