ស្រុកចន្ទ្រា ដាក់បម្រាមគោចរ១៥គោលដៅ មានតាមព្រំដែនជាប់វៀតណាម ៩គោលដៅ

ខេត្តស្វាយរៀង៖ អភិបាលស្រុកចន្ទ្រា នៅយប់ថ្ងៃទី០៤ ខែសីហា ឆ្នាំ២០២១ បានបន្តចុះដឹកនាំកម្លាំងចម្រុះ ចុះអនុវត្ត វិធានការប្រយុទ្ធ និងទប់ស្កាត់ ការឆ្លងរាលដាលនៃជំងឺកូ វីដ-១៩ ក្នុងមូលដ្ឋានស្រុកចន្ទ្រា តាមភូមិសាស្ត្រគោលដៅ បម្រាមគោចរចំនួន១៥គោលដៅ។

លោក ថន ថាវុទ្ធា អភិបាលស្រុកចន្ទ្រា និងជាប្រធាន គណៈបញ្ជាការឯកភាព រដ្ឋបាលស្រុក មានប្រសាសន៍ថា នៅក្នុងភូមិសាស្ត្រស្រុកចន្ទ្រាគឺមាន ១៥គោលដៅ ក្នុងនោះនៅតាមឃុំទាំង៦ ក្នុងមួយឃុំ ១គោលដៅ ឃុំជាប់ព្រំប្រទល់ស្រុក និងក្រុងក្នុងខេត្តស្វាយរៀង។ ដោយឡែកគោលដៅដែលនៅជាប់ព្រំដែនកម្ពុជាវៀតណាមមាន ៩គោលដៅផងដែរ ដើម្បីចុះអនុវត្តវិធានការរដ្ឋបាល និងធ្វើការណែនាំ ដល់ប្រជាពលរដ្ឋ អាជីវករ និងអ្នកពាក់ព័ន្ធទាំងអស់ ត្រូវចូលរួម អនុវត្តតាមខ្លឹមសារ សេចក្តីសម្រេច របស់រដ្ឋបាលខេត្តស្វាយរៀង ពិសេស ការលក់ដូរ ប្រកបអាជីវកម្ម គ្រប់ ប្រភេទ អនុញ្ញាត ត្រឹមតែការវេចខ្ចប់ប៉ុណ្ណោះ ដោយមិនអនុញ្ញាតឱ្យ អតិថិជន ចូលមកអង្គុយ ឬ ទទួលទាន នៅក្នុងបរិវេណ អាជីវកម្មដ្ឋាន របស់ខ្លួនឡើយ។

លោកអភិបាលស្រុកចន្ទ្រា បានអំពាវនាវដល់ប្រជាពលរដ្ឋទាំងអស់បើគ្មានការចាំបាច់ សូមកុំចេញក្រៅផ្ទះ ហើយរាល់ការធ្វើដំណើរត្រូវមានលិខិតស្នាមបញ្ជាក់ពី អង្គភាព ស្ថាប័ន ក្រុមហ៊ុន ឬ អាជ្ញាធរមូលដ្ឋានឱ្យត្រឹមត្រូវ និងបន្តចូលរួមអនុវត្តតាមការអំពាវនាវរបស់សម្តេចតេជោនាយករដ្ឋមន្ត្រី និងត្រូវមានស្មារតីប្រុងប្រយ័ត្នខ្ពស់ជានិច្ច ក្នុងការទប់ស្កាត់ជំងឺកូវីដ-១៩ នៅកម្ពុជា តាមរយៈអនុវត្តនូវវិធានការជាបន្តបន្ទាប់របស់ក្រសួងសុខាភិបាល  ជាពិសេសការរក្សាអនាម័យ លាងដៃឲ្យស្អាត ពាក់ម៉ាសជាចាំបាច់ និង ការរក្សាគម្លាតសុវត្ថិភាពសង្គម និងគម្លាតសុវត្ថិភាពបុគ្គល និង វិធានការ៣កុំ និង៣ការពារ របស់ប្រមុខរាជរដ្ឋាភិបាលកម្ពុជា។

សូមបញ្ជាក់ថា សេចក្តីសម្រេច លេខ ០៨៣/២១ ស.ស.រ ចុះថ្ងៃទី២៩ ខែកក្កដា ឆ្នាំ២០២១ របស់រដ្ឋបាល ខេត្តស្វាយរៀង ស្តីពី ការដាក់ចេញ នូវ វិធានការរដ្ឋបាល នៅក្នុងភូមិសាស្ត្រ ខេត្តស្វាយរៀង រយៈពេល១៤ថ្ងៃ គិតចាប់ពី ម៉ោង ២៣:៥៩ នាទី នា ថ្ងៃទី២៩ ខែកក្កដា រហូតដល់ថ្ងៃទី១២ ខែសីហា ឆ្នាំ២០២១ ដើម្បីប្រយុទ្ធ និងទប់ស្កាត់ការឆ្លងរាលដាល នៃ ជំងឺកូវីដ-១៩ ក្នុងមូលដ្ឋានស្រុកចន្ទ្រាខេត្តស្វាយរៀង។ ការហាមឃាត់ការជួបជុំ ការលក់ដូរ និង សេពគ្រឿងស្រវឹង ត្រូវអនុវត្តតាមវិធានការ បម្រាម គោចរ ចាប់ពី ម៉ោង ២១:០០ នាទី ដល់ ម៉ោង ៣:០០ នាទី៕

អត្ថបទ៖ ភក្ដី