WHO ប្រចាំកម្ពុជា បង្ហាញវឌ្ឍនភាពនៃឱសថព្យាបាលជំងឺកូវីដ-១៩

តំណាងអង្គការសុខភាពពិភពលោក (WHO) ប្រចាំកម្ពុជា បានបង្ហាញវឌ្ឍនភាពទាក់ទងទៅនឹងការធ្វើតេស្តឱសថសម្រាប់ព្យាបាលជំងឺកូវីដ-១៩ ដែល WHO ខិតខំរកឱសថព្យាបាលជំងឺកូវីដ-១៩នេះ ដើម្បីជួយការពារកុំឱ្យវិស័យសុខាភិបាលមានបន្ទុកធ្ងន់បន្តទៀត។

លោកស្រីថ្លែងបែបនេះ នៅក្នុងពិធីបើកយុទ្ធនាការថ្នាក់ជាតិ ក្រោមប្រធានបទ “រួមគ្នាទទួលខុសត្រូវទប់កាត់ការចម្លងវីរុស កូវីដ-១៩” ដែលប្រព្រឹត្ដទៅនៅទីស្ដីការក្រសួងសុខាភិបាល នៅព្រឹកថ្ងៃទី១៦ ខែសីហា ឆ្នាំ២០២១នេះ។

លោកស្រី Li Ailan តំណាងអង្គការសុខភាពពិភពលោក (WHO) ប្រចាំកម្ពុជា មានប្រសាសន៍ថា WHO មានតួនាទីក្នុងការសម្របសម្រួលឱ្យមានការសាកល្បង និងស្វែងរកនូវឱសថសម្រាប់ព្យាបាលជំងឺកូវីដ-១៩នេះ តាំងពីដំបូងមក ដោយមានការសាកល្បងទូទាំងពិភពលោក ឬហៅថា ការសាកល្បងដោយមានការសាមគ្គីភាព ដែលបានធ្វើតេស្តលើឱសថផ្សេងៗ។

លោកស្រី Li Ailan មានប្រសាសន៍បន្តថា៖ “ក្នុងនោះ នៅដំណាក់កាលទី១ យើងបានធ្វើតេស្តលើឱសថមួយចំនួនផងដែរ ប៉ុន្តែមិនទាន់ទទួលបានជោគជ័យទេ ដោយសារយើងសិក្សាមើលទៅឃើញថា ឱសថនោះពុំមានប្រសិទ្ធភាពក្នុងការព្យាបាលជំងឺកូវីដ-១៩ ជាពិសេសការកាត់បន្ថយការឈឺធ្ងន់ធ្ងរ និងការស្លាប់”។

តំណាងអង្គការសុខភាពពិភពលោក (WHO) ប្រចាំកម្ពុជាខាងលើនេះ បានបង្ហាញបន្តថា ក្នុងពេលថ្មីៗនេះ ការសាកល្បងបានឈានទៅដល់ដំណាក់កាលទី២ គឺមានការបូកផ្សំនឹងឱសថច្រើនមុខផ្សេងៗទៀត ដែលក្នុងនោះប្រហែលជាង៥២ ឬ៥៤ប្រទេសដែលបានចូលរួម។

លោកស្រី Li Ailan មានប្រសាសន៍បន្តថា៖ “នាងខ្ញុំសូមជម្រាបដែរ ឱសថចំនួន៣ដែលបានដាក់បញ្ចូលក្នុងការសាកល្បងនេះ មិនមែនជាឱសថថ្មីទេ គឺជាឱសថដែលធ្លាប់បានប្រើប្រាស់ក្នុងការព្យាបាលជំងឺផ្សេងៗ។ ដូចជាថ្នាំព្យាបាលជំងឺគ្រុនចាញ់ធ្ងន់ធ្ងរ ហើយឱសថមួយទៀតដែលប្រើប្រាស់សម្រាប់ព្យាបាលជំងឺមហារីក និងឱសថមួយទៀតប្រើសម្រាប់ព្យាបាលជំងឺទាក់ទងទៅនឹងប្រព័ន្ធការពាររាងកាយរបស់យើង”។

លោកស្រី មានប្រសាសន៍បញ្ជាក់ថា៖ “នាងខ្ញុំចង់ជម្រាបដែរថា ឱសថទាំងនេះ ជាឱសថមានប្រសិទ្ធភាព និងសុវត្ថិភាពសម្រាប់ព្យាបាលជំងឺដែលនាងខ្ញុំបានលើកឡើងខាងលើ តែយើងមិនទាន់ដឹងថាវាមានប្រសិទ្ធភាពសម្រាប់ព្យាបាលជំងឺកូវីដ-១៩ ឬអត់ គឺយើងមិនទាន់ដឹងច្បាស់នៅឡើយ ព្រោះវាស្ថិតក្នុងដំណាក់កាលធ្វើតេស្តនៅឡើយ។ ប៉ុន្តែបើតាមអ្វីដែលអ្នកជំនាញបានបង្ហាញនោះ គឺប្រហែលជាអាចមានឱកាសដែលយើងអាចនឹងរកឃើញឱសថសម្រាប់ព្យាបាលជំងឺកូវីដ១៩នៅពេលខាងមុខ”។

ជាមួយគ្នានេះ លោកស្រី Li Ailan តំណាងអង្គការសុខភាពពិភពលោក (WHO) ប្រចាំកម្ពុជា ក៏បានបញ្ជាក់ដែរថា រដ្ឋមន្ត្រីក្រសួងសុខាភិបាលកម្ពុជា បានបង្ហាញនូវចំណាប់អារម្មណ៍ក្នុងការចូលរួមនៅក្នុងយន្តការសាកល្បងសិក្សាស្វែងរកឱសថសម្រាប់ព្យាបាលជំងឺកូវីដ-១៩នេះដែរ៕

អត្ថបទ៖ ច័ន្ទ វីរៈ