ព័ត៌មានជាតិ

អគារគណបក្សប្រជាជនកម្ពុជា សង្កាត់បាវិត មានតម្លៃជាង៨ម៉ឺនដុល្លារសហរដ្ឋអាមេរិក ត្រូវបានប្រារព្ធពិធីបញ្ចុះបឋមសីលាសាងសង់

បានផុស

៥ years មុន

នៅ

ថ្ងៃព្រហស្បតិ៍ ៩ កញ្ញា ២០២១

ដោយ

ស្វាយរៀង ៖ នៅថ្ងៃទី៩ ខែកញ្ញា ឆ្នាំ២០២១ លោក លី ធុជ សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារថ្នាក់ជាតិចុះជួយក្រុងបាវិត លោក ម៉ែន វិបុល សមាជិកគណៈកម្មាធិការកណ្តាល និងជាប្រធានគណៈកម្មាធិការគណបក្សប្រជាជនកម្ពុជាខេត្តស្វាយរៀង បានអញ្ជើញជាអធិបតីនៅក្នុងពិធីបញ្ចុះបឋមសីលាសាងសង់អគារថ្មីរបស់គណបក្សប្រជាជនកម្ពុជាសង្កាត់បាវិត ក្រុងបាវិតខេត្តស្វាយរៀង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អញ្ជើញចូលរួមនៅក្នុងពិធីនេះផងដែរ រួមមានលោកប្រធាន-អនុប្រធានគណៈកម្មាធិការគណបក្សប្រជាជនកម្ពុជាក្រុងបាវិត អស់លោក- លោកស្រីជាសមាជិក សមាជិកាគណបក្សជាច្រើនរូបទៀត។

លោក លឹម សៀងហេង ប្រធានគណៈកម្មាធិការគណបក្សប្រជាជនកម្ពុជាក្រុងបាវិត បានមានប្រសាសន៍ឲ្យដឹងថា អគារថ្មីរបស់គណបក្សប្រជាជនកម្ពុជាសង្កាត់បាវិតដែលត្រូវធ្វើពិធីបញ្ចុះបឋមសីលាសាងសង់នាពេលនេះមានបណ្តោយប្រវែង១៦,១៩ម៉ែត្រទទឹង៨ម៉ែត្រ ធ្វើអំពីបេតុងប្រក់ក្បឿងមានបំពាក់ ឧបករណ៍ គ្រឿងសំភារៈបរិក្ខា របង ក្លោងទ្វារ របងព័ទ្ធជុំវិញប្រវែង១៩០ម៉ែត្រ ដែលគ្រោងចំណាយថវិកាសាងសង់អស់ថវិកាប្រមាណជាង៨ម៉ឺនដុល្លារសហរដ្ឋអាមេរិក។

លោកបានឲ្យដឹងទៀតថា សមិទ្ធផលថ្មីនេះគឺដើម្បីទុកជាកន្លែងធ្វើការបំរើឲ្យការងារគណបក្សសង្កាត់បាវិតដែលកន្លងមកកន្លែងចាស់ត្រូវបានជំនន់ទឹកភ្លៀងបណ្តាលឲ្យលិចនារដូវវស្សាជាហេតុធ្វើឲ្យជួបការលំបាកចំពោះការប្រារព្ធពិធីផ្សេងៗម្តងៗនាពេលកន្លងមក។

លោក លឹម សៀងហេង បានឲ្យដឹងបន្ថែមទៀតថា ក្នុងនាមរូបលោកក៏ដូចជាថ្នាក់ដឹកនាំនៅក្រុងបាវិត សូមថ្លែងអំណរគុណយ៉ាងជ្រាលជ្រៅចំពោះលោកស្រីកិត្តិសង្គហបណ្ឌិត ម៉ែន សំអន សមាជិកាអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងាររាជរដ្ឋាភិបាលចុះជួយខេត្តស្វាយរៀង អស់លោក-លោកស្រី ជាថ្នាក់ដឹកនាំព្រមទាំងសប្បុរសជនទាំងអស់ ដែលបានជួយ ឧបត្ថម្ភគាំទ្រទាំងថវិកា និងសម្ភារៈដើម្បីកសាងនូវសមិទ្ធផលផ្សេងៗនៅក្រុងបាវិតជាពិសេសគឺអគារគណបក្សប្រជាជនកម្ពុជាសង្កាត់បាវិតនាពេលនេះ ដែលជាសមិទ្ធផលថ្មីមួយទៀតសម្រាប់ជាចំណងដៃ និងបំរើឲ្យការងារគណបក្សសង្កាត់បាវិត ប្រព្រឹត្តទៅបានដោយរលូន៕

ដោយ ៖ ភក្ដី