បង្ក្រាបរថយន្តមួយគ្រឿង រារាំងសមត្ថកិច្ច ដេញចាប់រថយន្ត ដឹក​ឈើនៅស្រុកស្វាយលើ

រថយន្តដឹកឈើមួយគ្រឿង ត្រូវបានកម្លាំងសមត្ថកិច្ចជំនាញសហការគ្នាដេញបង្ក្រាប ប៉ុន្តែត្រូវបានរថយន្តបិទគូទ ១ គ្រឿង មករារាំងមិនឱ្យតាមចាប់ នៅទីបំផុតកម្លាំងសមត្ថកិច្ចបង្ក្រាបបានតែរថយន្តបិទគូទ ឯរថយន្តដឹកឈើគេចខ្លួនបាត់។ 

ហេតុការណ៍ចុះបង្ក្រាបធ្វើឡើងនៅវេលាម៉ោង ១៤ និង ៣០ នាទី ថ្ងៃទី ២៣ ខែកញ្ញា ឆ្នាំ ២០២១ នៅក្នុងភូមិសាស្រ្ត នៃស្រុកស្វាយលើ ខេត្តសៀមរាប។   

សមត្ថកិច្ចបានឱ្យដឹងថា រថយន្តសង្ស័យដឹកឈើម៉ាក នីសាន់ ណាវ៉ារ៉ា ពណ៌ទឹកប្រាក់ ពាក់ស្លាកលេខ-១៦៣១ ដោយមានការសង្ស័យក៏បានធ្វើឃាត់ដើម្បីសួរនាំ ប៉ុន្តែមិនព្រមឈប់។

គ្រានោះដោយមានការសហការជាមួយកម្លាំងរដ្ឋបាលព្រៃឈើ កម្លាំងនគរបាលប្រឆាំងបទល្មើសសេដ្ឋកិច្ច នៃខេត្តសៀមរាប រួចក៏បានធ្វើការដេញប្រផាប់ចាប់ប្រភីងពីចំណុចខាងកើតផ្សារស្វាយលើ ឆ្ពោះចូលក្នុងក្រុងសៀមរាប តាមបណ្តោយផ្លូវជាតិលេខ ០៦អា។

តែដល់ចំណុចបុរីទេសចរណ៍ក្រុងសៀមរាប ក៏ត្រឡប់ក្រោយវិញ រហូតដល់ចំណុចផ្លូវលំដីក្រហមខ្លោងទ្វាវត្តដន្លោងក្នុងឃុំចាន់ស ស្រុកសូទ្រនិគម ស្រាប់តែមានរថយន្តមួយគ្រឿងទៀតម៉ាក នីសសាន់ ណាវ៉ារ៉ា ពណ៌ស គ្មានស្លាកលេខបានមកបិទគូទរំខាន ទើបបណ្តាលឱ្យរថយន្តដែលកំពុងដឹកជញ្ជូនផលអនុផលព្រៃឈើនោះរត់គេចបាត់តែម្តង។

ចំណែករថយន្តដែលបានមករារាំងរំខាន ត្រូវបានកំលាំងចម្រុះដេញហៅដើម្បីសួរនាំតែមិនឈប់ ទើបកម្លាំងចម្រុះបន្តដេញរហូតដល់ចំណុចភូមិត្រពាំងស្វាយ ឃុំស្វាយលើ ស្រុកស្វាយលើ ទើបរថយន្តនោះបើកចូលក្នុងបរិវេណស្នាក់ការថ្នាលបណ្តុះកូនឈើ និងអប់រំផ្សព្វផ្សាយត្រពាំងស្វាយ ហើយអ្នកបើកបរក៏រត់គេចខ្លួនចូលព្រៃខាងក្រោយស្នាក់ការបាត់តែម្តង បន្សល់ទុកនូវរថយន្តមួយគ្រឿងម៉ាកណាវ៉ារ៉ា ពីរបាំង ចំណែករថយន្តដែលតាមទាន់តែអ្នកបើកបរចុះរត់បាត់ខាងលើ ត្រូវកម្លាំងចម្រុះប្រគល់ជូនជំនាញ រដ្ឋបាលព្រៃឈើផ្នែកបន្ទាយស្រីដើម្បីបន្តនីតិវិធីច្បាប់៕

អត្ថបទ ៖ កុសល