ព័ត៌មានជាតិ
លោក ឡុង សុភាព ៖ នាមជាមន្រ្តីរាជការស៊ីប្រាក់ខែរដ្ឋ ខ្ញុំមិនធ្វើស្រែលើខ្នងរាស្រ្តទេ
មន្ត្រីការិយាល័យរៀបចំដែនដី និងភូមិបាលនៃស្រុកសំរោងទងមួយរូប បានទទួលការកោតសរសើរពីប្រជាពលរដ្ឋនៅក្នុងមូលដ្ឋាន ក៏ដូចជាអ្នកប្រើប្រាស់បណ្ដាញសង្គមហ្វេសប៊ុក ដោយសារតែមន្ត្រីរូបនេះ បានខិតខំបម្រើសេវាសាធារណៈ ជូនប្រជាពលរដ្ឋដោយមានភាពលឿនរហ័ស មានតម្លាភាព និងមិនយកប្រាក់ពីប្រជាពលរដ្ឋ ក្រៅពីអ្វីដែលច្បាប់បានកំណត់ឡើយ។ មន្ត្រីថ្នាក់ក្រោមជាតិរូបនេះ បានលើកឡើងថា ការខិតខំរបស់ខ្លួនដូច្នេះ គឺដើម្បីបម្រើសេវាសាធារណៈ ជូនប្រជាពលរដ្ឋដោយស្មោះ និងមិនសុំអ្វីទេ ក្រៅពីសុំក្តីស្រឡាញ់រាប់អាន ពីប្រជាពលរដ្ឋតែប៉ុណ្ណោះ។
លោក ឡុង សុភាព មន្ត្រីការិយាល័យរៀបចំដែនដី នគរូបនីយកម្ម សំណង់ និងភូមិបាល នៃស្រុកសំរោងទង ខេត្តកំពង់ស្ពឺ មានប្រសាសន៍ប្រាប់កម្ពុជាថ្មីថា ការដែលលោកខិតខំបំពេញការងារ បម្រើសេវាសាធារណៈជូនប្រជាពលរដ្ឋ ដោយស្មារតីទទួលខុសត្រូវខ្ពស់ ហើយមានភាពលឿនរហ័ស និងមិនយកកម្រៃក្រៅផ្លូវការនោះ គឺដើម្បីលើកទឹកចិត្តរបស់ប្រជាពលរដ្ឋ ឲ្យមកទទួលយកសេវាសាធារណៈ ចៀសវាងការទៅពឹងពាក់អ្នករត់ការ ដែលត្រូវចំណាយថវិកាច្រើន។
លោកថា «អ្វីដែលខ្ញុំបានគិតគូ បម្រើប្រជាពលរដ្ឋ ដោយស្មារតីនៃឆន្ទៈ មនសិកា វិជ្ជាជីវៈ របស់ខ្ញុំនេះ គឺទីមួយ គឺលើកទឹកចិត្តប្រជាពលរដ្ឋ ឲ្យពួកគាត់ងាកមកប្រើប្រាស់នូវសេវាសាធារណៈ របស់រដ្ឋ ព្រោះដើម្បីអី ដើម្បីឲ្យបានលឿន ហើយបានឆាប់រហ័ស ហើយនិងតម្លាភាព បានសេចក្ដីថា តាមលំដាប់លំដោយ»។
លោក ឡុង សុភាព បានលើកឡើងបន្តថា ក្នុងនាមលោកជាមន្ត្រីរាជការមួយរូប ដែលទទួលបានប្រាក់ខែពីរាជរដ្ឋាភិបាល នឹងមិនយកឯកសណ្ឋានជាមន្ត្រីរាជការ ទៅធ្វើជាមុខរបរដើម្បីមានបាននោះឡើយ។ លោកបន្ថែមថា «ក្នុងនាមខ្ញុំជាមន្ត្រីរាជការម្នាក់ ដែលទទួលបានប្រាក់ខែពីរដ្ឋ គឺខ្ញុំនឹងមិនយកឯកសណ្ឋានជាមន្ត្រីរាជការ ជាឈ្មោះក្នុងមន្ត្រីរាជការធ្វើមុខរបរ ដើម្បីគេហៅថា ធ្វើស្រែលើខ្នងរាស្រ្ដ ហើយរាល់ប្រជាពលរដ្ឋទាំងអស់ ដែលមកជួបខ្ញុំ គឺខ្ញុំនឹងបំពេញអ្វីដែលជាសំណើរបស់គាត់ ហើយគាត់ត្រូវឆ្លើយតបជាមួយខ្ញុំវិញ នូវអ្វីដែលខ្ញុំបានដាក់ជូន»។
មន្ត្រីការិយាល័យរៀបចំដែនដី នគរូបនីយកម្ម សំណង់ និងភូមិបាល នៃស្រុកសំរោងទង បានលើកជាឧទាហរណ៍ថា មានប្រជាពលរដ្ឋម្នាក់ មកផ្ទេរកម្មសិទ្ធិដីធ្លី ជាអំណោយក្ដី ជាការលក់ទិញក្ដី គឺលោកនឹងបំពេញឯកសារជូនគាត់ភ្លាមៗ ឲ្យតែប្រជាពលរដ្ឋមានឯកសារគ្រប់គ្រាន់ដូចជា ប្លង់ដីច្បាប់ដើម អត្តសញ្ញាណប័ណ្ណ សៀវភៅគ្រួសារ និងសំបុត្រណើត ឬក៏សំបុត្រអាពាហ៍ពិពាហ៍ ហើយក៏ត្រូវមានសាក្សី ២នាក់ ព្រមទាំងអ្នកទទួលសិទ្ធិផ្ទេរ និងអ្នកទទួលសិទ្ធិ ក៏ត្រូវមកជាមួយគ្នាផងដែរ។
លោក ឡុង សុភាព បានឲ្យដឹងបន្តទៀតថា ចំពោះការបំពេញឯកសារនេះ យ៉ាងយូរចំណាយពេលត្រឹមតែ ១ម៉ោងប៉ុណ្ណោះ ទៅតាមឯកសារតិច ឬច្រើនទៅតាមក្បាលដី ដោយមិនឲ្យប្រជាពលរដ្ឋរង់ចាំឡើយ។ រីឯប្រជាពលរដ្ឋផ្សេងទៀតមកក្រោយ ត្រូវរង់ចាំការបំពេញឯកសារតាមក្រោយ ដោយការធ្វើយ៉ាងដូច្នេះ ដើម្បីមានតម្លាភាពទាំងអស់គ្នា។ ជាមួយគ្នានេះ មន្ត្រីថ្នាក់ក្រោមជាតិរូបនេះ បានបញ្ជាក់បន្ថែមថា រូបលោកខិតខំបំពេញការងារ បម្រើសេវាសាធារណៈ ជូនប្រជាពលរដ្ឋដូចរៀបរាប់ខាងលើនេះ មិនមែនជាការសម្ដែង ឬចង់បានភាពល្បីល្បាញនោះទេ តែការខិតខំនេះ គឺដើម្បីផលប្រយោជន៍ប្រជាពលរដ្ឋ ដោយមិនគិតអំពីប្រាក់កាសពីពួកគាត់ឡើយ ដោយសារតែលោកទទួលបានប្រាក់ខែពីរដ្ឋរួចទៅហើយ៕
អត្ថបទ៖ ឃួន សុភ័ក្រ
-
កីឡា៦ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៥ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ១៤ ម៉ោង ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
សន្តិសុខសង្គម១ សប្តាហ៍ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ១ សប្តាហ៍ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៦ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៥ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៦ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ