រាជរដ្ឋាភិបាលកម្ពុជា​ ផ្តោត​ការងារ​អាទិភាព​ចំនួន ៥​ក្នុង​បរិបទ​កូវីដ១៩

លោក ទេសរដ្ឋមន្រ្តី លី ធុជ ប្រធានគណៈកម្មាធិការជាតិអេស្កាប់ នៅ ថ្ងៃទី ១៤ ខែធ្នូ ឆ្នាំ ២០២១ នេះបាន​អញ្ជើញ​ចូលរួមបើកសិក្ខាសាលាថ្នាក់តំបន់ស្តីពី “ការកៀរគរធនធានសម្រាប់ការអភិវឌ្ឍ​ប្រកប​ដោយ​ចីរភាពរបស់ប្រទេសនៅ ក្នុងតំបន់អាស៊ីប៉ាស៊ីហ្វិក”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សិក្ខាសាលានេះរៀបចំដោយគណៈកម្មការសេដ្ឋកិច្ច និងសង្គមកិច្ចសម្រាប់អាស៊ី និងប៉ាស៊ីហិ្វក នៃអង្គការសហប្រជាជាតិ (UN ESCAP) រយៈពេល ២ ថ្ងៃ (១៤-១៥) ខែធ្នូ ឆ្នាំ២០២១ តាមរយៈប្រព័ន្ធអនឡាញ ដោយមានការចូលរួមពីទេសរដ្ឋមន្រ្តី រដ្ឋមន្រ្តី និងតំណាងរដ្ឋាភិបាលមកពី ៤៥ ប្រទេស ក្នុងតំបន់អាស៊ី និងប៉ាស៊ីហិ្វក។

គោលបំណងនៃសិក្ខាសាលានេះ ដើម្បីប្រមូលផ្តុំអ្នកជំនាញ និងអ្នកតាក់តែងគោលនយោបាយ​មកពីប្រទេសដែលមានការអភិវឌ្ឍតិចតួច និងរដ្ឋដែនកោះដែលកំពុងអភិវឌ្ឍ នៅ ក្នុងតំបន់អាស៊ីប៉ា​ស៊ីហ្វិក ពិភាក្សាអំពីការកៀរគរធនធាន ដើម្បីសម្រេចបានគោលដៅ អភិវឌ្ឍន៍ប្រកបដោយចីរភាព និងចែករំលែកបទពិសោធន៍ ក្នុងកិច្ចខិតខំប្រឹងប្រែងកៀរគរធនធាន ដើម្បីសម្រេចបាននូវគោល​ដៅ អភិវឌ្ឍន៍ប្រកបដោយចីរភាព។

លោកទេសរដ្ឋមន្រ្តី លី ធុជ បានលើកឡើងអំពីសារសំខាន់នៃសិក្ខាសាលានេះ ជាពិសេសនៅ ក្នុង​បរិបទ​នៃជំងឺកូវីដ-១៩ និងបានចែករំលែកការងារអាទិភាពចំនួន ៥ ទាក់ទងនឹងការកៀរគរធនធាន​ដែល​រាជរដ្ឋាភិបាលកម្ពុជា បាននិងកំពុងអនុវត្ត ដើម្បីសម្រេចឱ្យបាននូវរបៀបវារៈឆ្នាំ២០៣០។ ការងារទាំងនោះរួមមាន៖

ទី១៖ ប្រែក្លាយការគំរាមកំហែងនៃការរីករាលដាលនៃជំងឺកូវីដ-១៩ ឲ្យទៅជាឱកាសសម្រាប់កំណែទម្រង់ក្នុងស្រុកនៅរបស់ប្រទេសនីមួយៗ ដើម្បីពង្រឹងការប្រកួតប្រជែងសេដ្ឋកិច្ច ការបង្កើតបរិយាកាសអំណោយផលសម្រាប់អាជីវកម្ម និងពង្រឹងការប្រមូលចំណូលរបស់រាជរដ្ឋាភិបាល។

ទី២៖ លើកកម្ពស់គោលនយោបាយពាណិជ្ជកម្ម និងការសម្របសម្រួលពាណិជ្ជកម្ម ក៏ដូចជាការផ្តល់ការអនុគ្រោះដល់ប្រទេសកំពុងអភិវឌ្ឍន៍ ដើម្បីធានាថាអត្ថប្រយោជន៍ពីសកលភាវូបនីយកម្មត្រូវបានចែករំលែកដោយសមធម៌ តម្លាភាព និងប្រសិទ្ធភាព។

ទី៣៖ បន្តពង្រឹងស្ថិរភាពហិរញ្ញវត្ថុ ពិពិធកម្ម និងនវានុវត្តន៍ ក៏ដូចជា លើកកម្ពស់តួនាទី និងថាមវន្តរបស់វិស័យឯកជន ក្នុងការបំពេញតម្រូវការហិរញ្ញប្បទាន ដើម្បីសម្រេចបានគោលដៅអភិវឌ្ឍន៍ប្រកបដោយចីរភាព ដោយផ្តល់នូវការលើកទឹកចិត្តក្នុងគោលបំណងជំរុញការវិនិយោគឯកជន និងលំហូរទុនទៅកាន់ប្រទេសកំពុងអភិវឌ្ឍន៍ ជាពិសេសការជំរុញការវិនិយោគដោយផ្ទាល់ពីបរទេស និងយន្តការភាពជាដៃគូសារដ្ឋ និងឯកជន។

ទី៤៖ ធានាបន្តជំនួយអន្តរជាតិ ជាពិសេសជំនួយហិរញ្ញវត្ថុដល់ប្រទេសកំពុងអភិវឌ្ឍន៍ សំដៅឆ្ពោះទៅរកនិរន្តរភាពនៃសន្ទុះក្នុងកំណែទម្រង់ សម្រាប់របៀបវារៈឆ្នាំ ២០៣០។

ទី៥៖បន្តពង្រឹងភាពជាម្ចាស់នៃប្រទេសកំពុងអភិវឌ្ឍន៍ដោយការកសាងភាពជាដៃគូរវាងដៃគូអភិវឌ្ឍន៍ទាំងអស់ ដែលរួមទាំង ទ្វេភាគី ពហុភាគី វិស័យឯកជន និងវិស័យផ្សេងៗទៀត។ លើសពីនេះ យើងត្រូវតែធានាឱ្យមានតម្លាភាព និងគណនេយ្យភាពរវាងគោលនយោបាយរបស់ដៃគូអភិវឌ្ឍន៍ ទាំងទ្វេភាគី និងពហុភាគី។

លោកទេសរដ្ឋមន្ត្រី បានបញ្ជាក់ថា កម្ពុជាបានត្រៀមខ្លួនរួចជាស្រេច ដើម្បីចូលរួមជាមួយ​បណ្តាប្រទេស​ក្នុងតំបន់ និងដៃគូអភិវឌ្ឍន៍នានា ក្នុងកិច្ចប្រឹងប្រែងកៀគរធនធាន និងស្តារឡើង​វិញនូវ​ស្ថានភាពសេដ្ឋកិច្ច-សង្គម​ដើម្បីបន្តសម្រេចឲ្យ​បាននូវចក្ខុវិស័យរួមគ្នា​ក្នុងការអភិវឌ្ឍប្រកប​ដោចីរភាព៕