វ៉ាក់សាំង Pfizer ជាង ១,៥៦ លានដូសទៀត នឹងមកដល់ កម្ពុជា នៅរាត្រីនេះ

វ៉ាក់សាំង Pfizer ចំនួន ១ ៥៦៧ ៥៣០ លានដូសទៀត ដែលជាអំណោយរបស់រដ្ឋាភិបាល និងប្រជាជនអូស្ត្រាលី លើកទី ២ នឹងមកដល់ កម្ពុជា នៅរាត្រីថ្ងៃទី ២៨ ខែធ្នូ ឆ្នាំ ២០២១ នេះ។ នេះបើយោងតាមការផ្ដល់ដំណឹងពី លោកស្រី យក់ សម្បត្តិ រដ្ឋលេខាធិការ ក្រសួងសុខាភិបាល ដល់ “កម្ពុជាថ្មី” នៅថ្ងៃនេះ។

រដ្ឋាភិបាលអូស្ត្រាលីផ្តល់ផ្តល់វ៉ាក់សាំង Pfizer ចំនួន ២,៣៥ លានដូសដល់រាជរដ្ឋាភិបាលកម្ពុជាដែលវ៉ាក់សាំងទាំងនេះផ្តល់ជាពីរលើកគឺ លើកទី១ បានដឹកមកដល់កម្ពុជាកាលពីយយប់ថ្ងៃទី ២៦ ខែធ្នូ ឆ្នាំ ២០២១ចំនួន ៧៨៣ ០០០ ដូស ដោយអញ្ជើញទៅទទួលដោយផ្ទាល់ពីប្រមុខរដ្ឋាភិបាលកម្ពុជាសម្តេចតេជោ ហ៊ុន សែន។ សម្តេចតេជោ ហ៊ុន សែន បានមានប្រសាសន៍ថា អំណោយដ៏ថ្លៃថ្លានេះ គឺជាកាយវិការដ៏ប្រពៃ របស់ប្រជាជន និងរដ្ឋាភិបាលប្រទេសអូស្ត្រាលី ចំពោះប្រជាជន និងរាជរដ្ឋាភិបាលកម្ពុជា ក៏ដូចជាមនុស្សជាតិទាំងមូល នៅក្នុងបុព្វហេតុប្រយុទ្ធនឹងជំងឺកូវីដ-១៩ ជាពិសេសនៅពេលដែលកម្ពុជា កំពុងតែព្យាយាមសម្រប និងរស់នៅតាមគន្លងប្រក្រតីភាពថ្មី ក្នុងបរិបទកូវីដ-១៩។ សម្តេចតេជោ ហ៊ុន សែន មានប្រសាសន៍ទៀតថា ចាប់តាំងពីផ្ទុះជំងឺកូវីដ-១៩ រាជរដ្ឋាភិបាលកម្ពុជាបានកំណត់យ៉ាងច្បាស់ថា មានតែវ៉ាក់សាំងទេ ទើបអាចយកឈ្នះជំងឺនេះ។

លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ បានឱ្យដឹងថា គិតត្រឹមថ្ងៃទី២៧ ខែឆ្នូ ឆ្នាំ២០២១ កំណេីនអត្រាចាក់វ៉ាក់សាំងកូវីដ-១៩ នៅកម្ពុជា ធៀបនឹងចំនួនប្រជាជនសរុប ១៦លាន នាក់ មានចំនួន ៨៩,០៦%។ ក្នុងនោះប្រជាជនអាយុពី ១៨ឆ្នាំឡើង មាន ១០១,៤៤% ធៀបជាមួយចំនួនប្រជាជនគោលដៅ ១០លាននាក់។ កុមារ-យុវជនអាយុពី ១២ឆ្នាំ ទៅក្រោម ១៨ឆ្នាំ មាន ៩៩,០៧% ធៀបជាមួយចំនួនប្រជាជនគោលដៅ ១ ៨២៧ ៣៤៨ នាក់។ កុមារអាយុពី ០៦ឆ្នាំ ដល់ក្រោម ១២ឆ្នាំ មាន ១០៥,១៣% ធៀបជាមួយនឹងប្រជាជនគោលដៅ ១ ៨៩៧ ៣៨២ នាក់ និងកុមារអាយុ ០៥ឆ្នាំ មាន ៩៨,៧២% ធៀបជាមួយនឹងប្រជាជនគោលដៅ ៣០៤ ៣១៧ នាក់។

គួរបញ្ជាក់ថា គិតមកដល់ពេលនេះ កម្ពុជាមានវ៉ាក់សាំងប្រមាណជាង៤០លានដូស។ វ៉ាក់សាំងទាំងនេះ ភាគច្រើនជាជំនួយ និងការបញ្ជាទិញពីរដ្ឋាភិបាលចិន។ ដោយឡែកតាមរយៈមជ្ឈមណ្ឌលកូវ៉ាក់វិញ កម្ពុជាបានទទួលវ៉ាក់សាំង មានជាដូចជាប្រភេទ Astra Zeneca Covid Shield Johnson and Johnson ជាដើម មានចំនួនជាង ៣ លានដូស ខណៈមជ្ឈមណ្ឌលកូវ៉ាក់សន្យាផ្តល់វ៉ាក់សាំងដល់កម្ពុជា ចំនួន ៦, ៦ លានដូស៕

អត្ថបទ៖ ច័ន្ទ ​វីរៈ