យុទ្ធនាការ​ចាក់ដូស​ទី ៤ ចាប់ផ្តើម​លើ​មន្រ្តី​ជួរ​មុខ​នៅ​ខេត្តបន្ទាយមានជ័យ

ខេត្តបន្ទាយមានជ័យ៖ នៅព្រឹកថ្ងៃទី២១ ខែ មករា ឆ្នាំ ២០២២នេះ មន្រ្តីរាជការមកពីគ្រប់អង្គភាពជួរមុខក្នុងខេត្តបន្ទាយមានជ័យ បាននាំគ្នាមកចាក់វ៉ាក់សាំងការពារជំងឺ​កូវីដ១៩ ដូសទី៤ ឬ​ដូស​ជំរុញ តាម​ផែនការ​របស់​ក្រសួង​សុខាភិបាលយ៉ាងសស្រាក់សស្រាំនៅ កនុងសាលប្រជុំសាលាខេត្តបន្ទាយមានជ័យ។

លោកអ៊ុំ រាត្រី អភិបាល​ខេត្ត​បន្ទាយមានជ័យ បានប្រាប់អ្នកយកព័ត៍មានឲ្យដឹងថា ដំណើរការចាក់វ៉ាក់សាំងការពារ​ដូសទី៤ ដល់មន្ត្រីរាជការទាំង​មន្រ្តីជួរមុខក្នុងខេត្តបន្ទាយមានជ័យនេះ គឺចាក់ថ្នាំវ៉ាក់សាំង Pfizer របស់អាមេរិក។

ការចាក់វ៉ាក់សាំងនេះបានត្រូវមានឯកសារតម្រូវចាំបាច់ ដែលត្រូវភ្ជាប់មកជាមួយរួមមាន៖

១-ប័ណ្ណចាក់វ៉ាក់សាំងកូវីដ១៩ ២-ប័ណ្ណសម្គាល់ខ្លួនមន្ត្រីរាជការបុគ្គលិក​ ៣-អត្តសញ្ញាណប័ណ្ណសញ្ជាតិខ្មែរ ឬឯកសារ ដែលមានប្រើប្រាស់ក្នុងការចាក់វ៉ាក់សាំងដូសទី១.២.៣ ព្រមទាំងត្រូវគោរពនូវលក្ខខណ្ឌនៃការទទួលបានវ៉ាក់សាំង ដូសទី៤ ពោលគឺធានានូវគម្លាតរយៈពេល ៤ខែ គិតចាប់ពីកាលបរិច្ឆេទនៃការចាក់វ៉ាក់សាំងដូសជំរុញ ឬដូសទី៣។

លោកអ៊ុំ រាត្រី បានប្រាប់អ្នកយកព័ត៍មានឲ្យដឹងបន្តទៀតថា វ៉ាក់សាំងដូស​ជម្រុញ​នេះ នឹង​ជួយ​ទប់ស្កាត់ការរីករាលដាលនៃ​ជំងឺកូវីដ ១៩ និងសង្គ្រោះជីវិតមនុស្ស ដោយជួយបុគ្គលមិនឱ្យឈឺធ្ងន់នៅពេលឆ្លង និង​កាត់បន្ថយការព្យាបាលនៅមន្ទីរពេទ្យ​។

លោកបញ្ជាក់ឲ្យដឹងបន្តទៀត​ថា វ៉ាក់សាំងទាំងអស់នេះលក់នៅទីផ្សារមានតំលៃខ្ពស់ណាស់ ត្រូវការចាំបាច់ចំពោះមនុស្សជាតិលើពិភពលោក។ មានវ៉ាក់សាំងគឺយើងមានកងការពារមួយយ៉ាងរឹងមាំ ដើម្បីប្រយុទ្ធប្រឆាំងនឹងជំងឺកូវីដ១៩»នេះយ៉ាង​មានប្រសិទ្ធភាពណាស់៕

អត្ថបទ៖ វ៉ាន់ ណាង