ក្រសួងបរិស្ថាន កំពុងសិក្សា និងរៀបចំចក្ខុវិស័យគោលដៅទេសចរណ៍ នៅក្នុងខេត្តចំនួនបី

ក្រសួងបរិស្ថាន កំពុងសិក្សា និងរៀបចំចក្ខុវិស័យគោលដៅទេសចរណ៍ និងផែនការវិនិយោគទេសចរណ៍សម្រាប់តំបន់ទេសភាពជួរភ្នំក្រវាញ ដោយផ្តោតលើកាលានុ​វត្តភាពនៃការរៀបចំ ជាតំបន់អេកូទេសចរណ៍នៅក្នុងតំបន់ការពារសម្រាប់ខេត្តសៀមរាប ខេត្តកំពង់ស្ពឺ និងខេត្តកោះកុង។ ក្នុងនោះ រួមមាន តំបន់ឧទ្យានជាតិព្រះជ័យវរ្ម័ន-នរោត្តមភ្មំគូលែន ដែនជម្រកសត្វព្រៃភ្នំឱរ៉ាល់ និងឧទ្យានជាតិភ្នំក្រវ៉ាញកណ្តាល និងតំបន់ដែនជម្រកសត្វព្រៃតាតៃ និងពាមក្រសោប។

ទាក់ទងនឹងគម្រោងនិរន្តភាពតំបន់ទេសភាព និងទេសចរណ៍ធម្មជាតិកម្ពុជានេះ ក្រសួងបរិស្ថានកាលពីថ្ងៃទី៣០ ខែមករា បានរៀបចំសិក្ខាសាលាពិគ្រោះយោបល់ស្តីពី«ការរៀបចំចក្ខុវិស័យគោលដៅទេសចរណ៍ និងផែនការវិនិយោគទេសចរណ៍សម្រាប់គោលដៅអេកូទេសចរណ៍នៅតំបន់ទេសភាពជួរភ្នំក្រវ៉ាញ និងបឹងទន្លេសាបកម្ពុជា»ក្នុងខេត្តចំនួនបីនេះ។ សិក្ខាសាលាពិគ្រោះយោបល់នេះ នឹងបញ្ចប់នៅថ្ងៃ ទី៤ ខែកុម្ភៈ ឆ្នាំ ២០២២។

គោលបំណងជាចម្បងនៃការរៀបចំសិក្ខាសាលាពិគ្រោះយោបល់នេះ គឺដើម្បីស្វែងយល់ពីភាគីពាក់ព័ន្ធនានានូវគោលបំណងជាយុទ្ធសាស្ត្រក្នុងការគ្រប់គ្រងតំបន់អេកូទេសចរណ៍ថ្នាក់តំបន់ និងផែនការវិនិយោគទេស​ចរណ៍សម្រាប់គោលដៅអេកូទេសចរណ៍។ ម្យ៉ាងទៀត គឺដើម្បីចូលរួមរៀបចំនូវសេចក្តីព្រាងចក្ខុវិស័យរួមសម្រាប់គោលដៅអេកូទេសចរណ៍ និងដើម្បីទទួលបាននូវព័ត៌មានត្រឡប់ដែលជាអនុសាសន៍នានាសម្រាប់ការវិនិយោគគោលដៅអេកូទេសចរណ៍ ដោយផ្សារភ្ជាប់នូវការធានាឲ្យមានការឆ្លើយតបទៅនឹងបញ្ហានានាព្រមទាំង កំណត់នូវអាទិភាពនៃអនុសាសន៍បទអន្តរាគមន៍ដែលបានបញ្ជាក់ក្នុងការសិក្សាវិភាគស្ថានភាព ៕

ដោយ៖ណារី