រដ្ឋាភិបាលផ្តល់ថវិកា ៥០លានដុល្លារ គាំទ្រវិស័យកសិកម្មនៅឆ្នាំ ២០២២

រាជរដ្ឋាភិបាលកម្ពុជា បានផ្តល់ថវិកាប្រមាណ ៥០លានដុល្លារ ដល់ធនាគារអភិវឌ្ឍជនបទ និងកសិកម្ម សម្រាប់កម្មវិធីហិរញ្ញប្បទានពិសេស ដែលក្នុងនោះថវិកា ១០លានដុល្លារ នឹងប្រើប្រាស់លើវិស័យស្រូវអង្ករ និង ៤០លានដុល្លារអាមេរិកទៀត ត្រូវបានបែងចែកជាពីរ ដោយប្រើប្រាស់សម្រាប់ផ្តល់ហិរញ្ញប្បទានផ្ទាល់ និងសម្រាប់កម្មវិធីចែករំលែកហានិភ័យជាមួយគ្រឹះស្ថានហិញរញ្ញវត្ថុ។ នេះបើតាមការបញ្ជាក់របស់ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន នៅក្នុងកម្មវិធីស្ដីពីការបន្ថែមមូលនិធិ​សម្រាប់ហគ្រាសធុនតូច និងមធ្យមកម្ពុជា និងធនាគារអភិវឌ្ឍន៍ជនបទ និងកសិកម្ម កាលពីថ្ងៃទី ១៤ ខែកុម្ភៈ។

លោក កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍជនបទ និងកសិកម្ម បានលើកឡើងថា ថវិកាដែលបន្ថែមថ្មី សម្រាប់ឆ្នាំ ២០២២នេះ នឹងប្រើប្រាស់ទៅលើបីគោលដៅធំៗ ក្នុងនោះ ទី១ ការផ្តល់ហិរញ្ញប្បទានដល់វិស័យស្រូវអង្ករ មានទំហំ ១០លានដុល្លារ ដោយផ្តោតសំខាន់លើការដាំដុះបន្លែ ផ្លែឈើ ការចិញ្ចឹមសត្វ ការធ្វើវារីវប្បកម្ម និងសហគ្រាសធុនតូច និងមធ្យម ដែលធ្វើការកែច្នៃផលិតផលកសិកម្ម។ ទី២ សហហិរញ្ញប្បទានចែករំលែកហានិភ័យ ទំហំ ២០លានដុល្លារ និងទី៣ ការផ្តល់ហិរញ្ញប្បទានផ្ទាល់ចំនួន ២០លានដុល្លារអាមេរិក។

ពាក់ព័ន្ធនឹងថវិកាទាំងនេះ មានការចូលរួមពីវិស័យឯកជនជាច្រើននៅកម្ពុជា។

លោក អូន ព័ន្ធមុនីរ័ត្ន វាយតម្លៃខ្ពស់ ចំពោះវិស័យឯកជន ដែលបានចូលរួមជាមួយរដ្ឋាភិបាល ក្នុងកិច្ចការដ៏មានសារៈសំខាន់នាពេលកន្លងមក។

លោករដ្ឋមន្រ្តីសង្ឃឹមថា វិស័យឯកជនទាំងអស់ នឹងចូលរួមជាមួយរាជរដ្ឋាភិបាល ក្នុងកិច្ចប្រឹងប្រែង លើកស្ទួយអភិវឌ្ឍ និងគាំទ្រការរក្សាលំនឹងអាជីវកម្មរបស់សហគ្រាសធុនតូច និងមធ្យម ក្នុងគ្រាដ៏លំបាកនេះបន្ថែមទៀត ដើម្បីឲ្យសហគ្រាសទាំងអស់ មានលទ្ធភាព អាចងើបឡើងវិញ ក្រោយវិបត្តិជំងឺកូវីដ-១៩។

សូមបញ្ជាក់ថា រាជរដ្ឋាភិបាល បានសម្រេចបន្ថែមថវិកាចំនួន ៥០លានដុល្លារ ដល់សហគ្រាសធុនតូច និងមធ្យមកម្ពុជាផងដែរ។ រដ្ឋមន្រ្តីក្រសួងសេដ្ឋកិច្ច បានសង្កត់ធ្ងន់ថា សហគ្រាសធុនតូច និងមធ្យម បានចូលរួមដល់ការគាំទ្រកំណើនសេដ្ឋកិច្ចកម្ពុជា និងការបង្កើតការងារជាច្រើនដល់ពលរដ្ឋ ព្រមទាំងដើរតួនាទីយ៉ាងសំខាន់ ក្នុងការបង្កើនភាពធន់របស់សេដ្ឋកិច្ចជាតិទៅនឹងវិបត្តិផងដែរ។ សហគ្រាសធុនតូច និងមធ្យមមានប្រមាណ ៩៨% នៃអាជីវកម្មទាំងអស់នៅកម្ពុជា និងបានចូលរួមចំណែកក្នុងផលិតផលក្នុងស្រុកសរុបប្រមាណ ៥៨% និងផ្តល់ការងារប្រមាណ ៧៣% នៃចំនួនកម្លាំងពលកម្មសរុបនៅកម្ពុជា៕

អត្ថបទ៖ ទួន សុផល