Connect with us

ព័ត៌មានជាតិ

អ្វីខ្លះជាលទ្ធផលនៃ កិច្ច​ប្រជុំចង្អៀតថ្នាក់រដ្ឋមន្ត្រីការបរទេសអាស៊ាន នៅភ្នំពេញ?

បានផុស

នៅ

កិច្ចប្រជុំចង្អៀតថ្នាក់រដ្ឋ​ម​ន្ត្រីការបរទេសអាស៊ាននៅភ្នំពេញ​ ដែល​កម្ពុជា​ធ្វើជាម្ចាស់ផ្ទះរយៈ​ពេល២​ថ្ងៃ ​​បានបញ្ចប់​ប្រកបដោយជោគជ័យ​ ដោយមានរដ្ឋមន្ត្រី​ការបរទេស​ នៃ​បណ្តា​ប្រទេស​សមាជិក​អាស៊ាន​ភាគច្រើន​​បានមកចូលរួមដោយផ្ទាល់​​ ហើយមួយ​ចំនួនតូចបាន​ចូល​រួមតាម​ប្រព័ន្ធ​វីដេអូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មានប្រសាសន៍នៅក្នុងសន្និសីទសារព័ត៌មាន នារសៀលថ្ងៃទី១៧ ខែកុម្ភៈ ឆ្នាំ២០២២​នេះ ស្តីពី​លទ្ធផល នៃកិច្ចប្រជុំចង្អៀតថ្នាក់រដ្ឋ​ម​ន្ត្រីការបរទេសអាស៊ាន លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ នៃព្រះរាជាណា​ចក្រ​​​កម្ពុជាបានអះអាងថា ​​នៅក្នុងកិច្ចប្រជុំនេះ អ្វីដែលរដ្ឋមន្ត្រីការបរទេសអាស៊ាន​បាន​ផ្ដោតសំខាន់ គឺការស្ដារសេដ្ឋកិច្ចឡើងវិញក្រោយវិបត្តិកូវីដ១៩។ ​ដូច្នេះរដ្ឋមន្ត្រីការបរទេស​ បាននិយាយច្រើនអំពីភាពចាំបាច់ក្នុងការជំរុញការអនុវត្តក្នុងក្របខណ្ឌ​ស្ដារឡើងវិញ​ផ្នែកសេដ្ឋកិច្ចរបស់អាស៊ាន។

បើតាមលោកឧបនាយករដ្ឋមន្ត្រី ប្រាក់ សុខុន នៅក្នុងកិច្ចប្រជុំនោះ ក៏មានការលើកឡើងពីការជំរុញធ្វើយ៉ាងណាឱ្យបើកធ្វើចរាចរណ៍ផ្ទៃក្នុងអាស៊ាន ក្នុងក្របខ័ណ្ឌនៃការធ្វើដំណើរឡើងវិញក្នុងអាស៊ាន ដើម្បីជំរុញសេដ្ឋកិច្ចដើរឡើងវិញ។ លោកមានប្រសាសន៍ថា ប្រទេសនៅក្នុងអាស៊ានភាគច្រើនពឹងផ្អែកទៅលើទេសចរណ៍ តែថាមិនមែនទេស​ចរណ៍មួយមុខទេ ប៉ុន្តែប្រសិនបើគ្មានការធ្វើដំណើរទៅវិញទៅមក ការធ្វើពាណិជ្ជកម្ម​ក៏ពិបាក ពីព្រោះអ្នកវិនិយោគ ឬអាជីវករត្រូវការជួបគ្នា ត្រូវការផ្លាស់ប្ដូរយោបល់ ត្រូវការស្វែងរកវឌ្ឍនភាព ដើម្បីបោះទុនវិនិយោគ ស្វែងរកការរីកចម្រើនក្នុងមុខរបរ​។

បញ្ហាធំទីពីរ គឺ​បានពិភាក្សាទៅលើការពង្រឹងសមត្ថភាពស្ថាប័នរបស់អាស៊ាន ពីព្រោះអាស៊ានក្នុងរយៈពេល ៥៥ឆ្នាំកន្លងមកនេះ មានគេចែចូវច្រើន គេចង់ចូលជាមួយអាស៊ាន ចង់ក្លាយជាដៃគូជាមួយអាស៊ាន តែអាស៊ាន​ក៏មានដៃគូតាមវិស័យ និងមានការកើនឡើងនៃដៃគូទាក់​ទងគ្នា ក្នុងកម្រិតយុទ្ធសាស្ត្រ ក្នុងកម្រិតយុទ្ធសាស្ត្រគ្រប់ជ្រុងជ្រោយ​ផងដែរ។

លោកឧបនាយករដ្ឋមន្ត្រី ប្រាក់ សុខុន បានអះអាងថា ​ឥឡូវនេះយើងមានប្រទេស​ដែលឈានទៅដល់កម្រិតយុទ្ធសាស្ត្រគ្រប់ជ្រុងជ្រោយចំនួន២ គឺ​​អូស្ត្រាលី និង​ចិន ហើយដោយសារប្រទេសទាំងពីរនេះ បានទទួលឋានៈជាដៃគូយុទ្ធសាស្ត្រគ្រប់ជ្រុងជ្រោយ ក៏មានប្រទេសមួយចំនួនទៀតស្នើសុំផងដែរ ដូចជាសហរដ្ឋអាមេរិក ឥណ្ឌា និងកូរ៉េខាងត្បូង។ ដូច្នេះនៅថ្ងៃខាងមុខ​នឹង​មានទាំងប្រទេសមហាអំណាច​ធំ មហាអំណាចកណ្ដាល។ ចំណែក​ សហភាពអឺរ៉ុប EU ក៏កំពុងគិតគូរ ដោយសារទើបបានឋានៈជាដៃគូយុទ្ធសាស្ត្រកាលពីពេលថ្មីៗនេះ​។​

​រដ្ឋមន្ត្រីការប្រទេសអាស៊ាន​ក៏បានពិភាក្សា អំពីទំនាក់ទំនងជាមួយដៃគូខាងក្រៅ ដោយសារតែ​ថ្ងៃខាងមុ​ខ ដៃគូខាងក្រៅរបស់អាស៊ាន​ចេះតែច្រើន​ ប៉ុន្តែសមត្ថភាព​ផ្ទៃក្នុង​ ជាពិសេសសមត្ថភាពរបស់ស្ថាប័ន​​លេខាធិការដ្ឋាន នៅមានកម្រិត ដែលត្រូវពិចារណាត្រូវទទួលដៃគូថែមទៀត ដោយ​សារ​អាស៊ានមិនបាន​ហាមឃាត់ ឬពង្រីកភាពជាដៃគូតទៅទៀតទេ។​

ដោយឡែក​ចំពោះការប្រកួតប្រជែងភូមិសាស្រ្តនយោបាយ រវាងមហាអំណាចធំៗ រវាងមហាអំណាចកណ្ដាល នឹង​អាចផលប៉ះពាល់​មកលើតំបន់ ទាំងជារួម ទាំងជាឯកជន (លើប្រទេសនីមួយៗ) ក៏បាន​លើក​ជាបញ្ហា ​ថា​តើ​ការដឹកនាំ​អាស៊ាន និងការ​កសាងសហគមន៍អាស៊ាន ត្រូវធ្វើក្នុងកម្រិតណា ដែលមិនទទួលផលប៉ះពាល់ជាអវិជ្ជមាន ពីការប្រកួតប្រជែង​ភូមិ​សាស្ត្រ​នយោបាយ​​។ ទើបរដ្ឋមន្ត្រីការបរទេសនានា បានលើកឡើងយ៉ាងច្បាស់អំពីការពង្រឹងមជ្ឈភាពរបស់អាស៊ាន។

ចំណែកកម្ពុជា​ លោកឧបនាយករដ្ឋមន្ត្រី ប្រាក់ សុខុន​ យល់ថា អាស៊ាន៩ មិនដូចអាស៊ាន១០ ទេ ប៉ុន្តែ​ដោយសារ​តែកាលៈទេសៈ​ពាក់ព័ន្ធ​ទៅនឹងការរកកុងសង់ស៊ីស​មិនបានក្នុងការអញ្ជើញរដ្ឋមន្ត្រីការបរទេសមីយ៉ាន់ម៉ា ដើម្បីមកចូលរួមកិច្ចប្រជុំ កម្ពុជាត្រូវបង្ខំចិត្តអនុវត្តការងាររូបមន្តដែល​បានប្រកាន់យកសម្រាប់កិច្ចប្រជុំលើកទី៣៨ និង៣៩។

ទោះជាយ៉ាងណា លោកឧបនាយករដ្ឋមន្ត្រី​ អះអាងថា បញ្ហាមីយ៉ាន់ម៉ា ក៏បានជជែកគ្នាច្រើនផងដែរ​ក្នុងនាមគ្រួសារអាស៊ាន គឺអាស៊ានចង់ជួយមីយ៉ាន់ម៉ា​ឱ្យផុតពីវិបត្តិ​ ចាកផុត​ពីវិបត្តិនយោបាយ ចាកផុតពីវិបត្តិសន្តិសុខ ដែលអាច​រាលដាលទៅ​ដល់វិបត្តិ​សេដ្ឋកិច្ច ហើយ​រាលដែលទៅដល់វិបត្តិមនុស្សធម៌ និងសុខាភិបាល។ ព្រោះបើកាលណាប្រទេស​ស្ថិតនៅក្នុងការឈ្លោះគ្នាបែបនេះ បញ្ហាទាំងនោះ នឹងអាចរាលដាលដល់សេដ្ឋកិច្ច ដល់សង្គម ហើយជាក់ស្ដែងបញ្ហាមនុស្សធម៌ ក្នុងរយៈពេលមួយឆ្នាំកន្លងទៅនេះ មីយ៉ាន់ម៉ា​មានជនភៀសខ្លួន​រហូតជាង ៤០០ ពាន់នាក់ ដែលនេះបន្ថែមទៅលើអ្វី ដែល​ប្រជាពលរដ្ឋបានទៅជ្រកកោននៅប្រទេសបង់ក្លាដេសជាង ១ លាននាក់។​ លោកមានប្រសាសន៍ថា មានប្រជាពលរដ្ឋជាច្រើន​ត្រូវការជំនួយ​មនុស្សធម៌ ហេតុដូច្នេះទើបយើងយកបញ្ហាមនុស្សធម៌នេះ​ជារឿងធំ ហើយបញ្ហាមនុស្សធម៌នេះ គឺជាចំណុចទី៤ នៃកុងសង់ស៊ីសរបស់មេដឹកនាំអាស៊ានកន្លងទៅ។​

បន្ថែមលើនេះ នៅ​ក្នុង​កិច្ចប្រជុំ​ ក៏​បានពិភាក្សាពិនិត្យ​ឡើង​​វិញ តើយើងបានធ្វើអ្វីខ្លះ​បន្ទាប់ពីកិច្ចប្រជុំកំពូលលើកទី៣៨ និង៣៩កន្លងទៅ។ លោកបញ្ជាក់ថា រយៈ​ពេលខ្លី​​ ប៉ុន្តែ​រដ្ឋមន្ត្រីការប្រទេស​ដែលអញ្ជើញចូលរួម​បានជជែកថា តើមានរឿងអ្វីខ្លះដែលត្រូវជម្រុញមុន ហើយរឿងអ្វីខ្លះដែលត្រូវជំរុញ​ក្រោយ ដូច្នេះ​មានរឿងច្រើន ទាំងផ្នែកផ្ទៃក្នុង ទាំងផ្នែកទំនាក់ទំនងអន្តរជាតិ៕

អត្ថបទ៖ កោះកែវ​

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម