ព័ត៌មានអន្ដរជាតិ

ប្រមុខការទូតអាមេរិក នឹងចូលរួមកិច្ចប្រជុំអាស៊ានក្នុងដំណើរទស្សនកិច្ចលើកដំបូងនៅអាស៊ី

បានផុស

១០ ខែ មុន

នៅ

ថ្ងៃអង្គារ ៨ កក្កដា ២០២៥

ដោយ

Chheang

រដ្ឋមន្ត្រីការបរទេសអាមេរិក លោក Marco Rubio គ្រោងនឹងធ្វើទស្សនកិច្ចផ្លូវការលើកដំបូងនៅតំបន់អាស៊ី ដោយធ្វើដំណើរទៅកាន់ទីក្រុងគូឡាឡាំពួ ប្រទេសម៉ាឡេស៊ី នៅថ្ងៃទី១០-១១ខែកក្កដា ដើម្បីចូលរួមក្នុងកិច្ចប្រជុំរដ្ឋមន្ត្រីការបរទេសអាស៊ាន។

យោងតាមក្រសួងការបរទេសអាមេរិក លោក Rubio មានគោលបំណងធានាឡើងវិញនូវការប្ដេជ្ញាចិត្តរបស់ក្រុងវ៉ាស៊ីនតោនចំពោះតំបន់អាស៊ី បន្ទាប់ពីរដ្ឋបាលរបស់លោក ដូណាល់ ត្រាំ ជាច្រើនខែកន្លងមកនេះ បានផ្ដោតសំខាន់តែលើបញ្ហាសង្គ្រាមនៅអ៊ុយក្រែន និងតំបន់មជ្ឈិមបូព៌ា។

អ្នកនាំពាក្យក្រសួងការបរទេសអាមេរិកលោកស្រី Tammy Bruce បាននិយាយនៅក្នុងសេចក្តីថ្លែងការណ៍មួយថា «នៅក្នុងដំណើរទស្សនកិច្ចលើកដំបូងរបស់គាត់ទៅកាន់អាស៊ីក្នុងនាមជារដ្ឋមន្ត្រីការបរទេស លោក Rubio ផ្តោតលើការបញ្ជាក់ឡើងវិញនូវការប្តេជ្ញាចិត្តរបស់សហរដ្ឋអាមេរិកក្នុងការជំរុញតំបន់ឥណ្ឌូប៉ាស៊ីហ្វិកដោយសេរី បើកចំហ និងមានសុវត្ថិភាព»។

នៅប្រទេសម៉ាឡេស៊ី កាលវិភាគរបស់លោក Rubio មានដូចជា៖

ជំនួបជាមួយរដ្ឋមន្ត្រីការបរទេសមកពីប្រទេសសមាជិកទាំង១០របស់អាស៊ាន
ជំនួបពិភាក្សាទ្វេភាគីជាមួយមន្ត្រីម៉ាឡេស៊ី
ការពិភាក្សាអំពីបញ្ហាសំខាន់ៗដូចជា ពាណិជ្ជកម្ម ខ្សែសង្វាក់ផ្គត់ផ្គង់រ៉ែសំខាន់ៗ និងសន្តិសុខក្នុងតំបន់ ជាពិសេសក្នុងការឆ្លើយតបទៅនឹងឥទ្ធិពលដែលកំពុងកើនឡើងរបស់ប្រទេសចិន។

អំឡុងទស្សនកិច្ចនៅទីក្រុងគូឡាឡាំពួ លោក Rubio ក៏នឹងជួបជាមួយសមភាគីរុស្ស៊ី និងចិនផងដែរ គឺលោក Sergei Lavrov និងលោក Wang Yi៕

ដោយ៖ ឈាង