រថយន្តដឹកទំនិញថៃចូលកម្ពុជា យ៉ាងតិចជាង ២០០គ្រឿង ក្នុង១ថ្ងៃ តាមច្រកទ្វារអន្តរជាតិ​ប៉ោយប៉ែត

ខេត្តបន្ទាយមានជ័យ៖ បើតាមការអះអាងរបស់ លោកឧត្តមសេនីយ៍ត្រី អ៊ី ចំរើន នាយប៉ុស្តិ៍នគរបាលអន្តោរប្រវេសន៍ច្រកទ្វារអន្តរជាតិប៉ោយប៉ែត បានប្រាប់អ្នកយកព័ត៍មានថា ច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ ក្នុង១ថ្ងៃៗ មានរថយន្តដឹកទំនិញថៃចូលមកកម្ពុជាយ៉ាងតិចជាង ២០០គ្រឿង ដែលក្នុងរថយន្ត មានទំនិញហូបចុក គ្រឿងសំណង់ និងរថយន្តថ្មីរបស់ក្រុមហ៊ុននាំចូល នៅច្រកអន្តរជាតិប៉ោយប៉ែត ថ្ងៃទី២៥ ខែកុម្ភៈ ឆ្នាំ២០២២។

លោកបានបញ្ជាក់ថា រថយន្តដឹកទំនិញដែលចូលមកកម្ពុជា តាមច្រកទ្វារអន្តរជាតិប៉ោយប៉ែតនោះ នគរបាលអន្តោរប្រវេសន៍ច្រកទ្វារអន្តរជាតិប៉ោយប៉ែតតម្រូវឲ្យឡាន១គ្រឿងមានគ្នាតែ២នាក់ ពោលគឺមានអ្នកបើកបរ ១នាក់ និងព្រូ១នាក់ ពេលបើកមកដល់ចំណុចព្រំដែនតម្រូវឱ្យក្រុមគ្រូពេទ្យធ្វើតេស្តរកកូវីដ១៩ហើយ ទើបអនុញ្ញាតឱ្យបើករថយន្តចូល ដើម្បីទប់ស្កាត់កូវីដចូលក្នុងសហគមន៍។

លោកឧត្តមសេនីយ៍ត្រី អ៊ី ចំរើន បានបញ្ជាក់ថា ច្រកអន្តរជាតិប៉ោយប៉ែត មានទំនិញថៃដែលនាំចូលច្រើនតែទំនិញកម្ពុជា ចូលទៅប្រទេសថៃវិញ មានចំនួនតិចតួច ហើយនៅពេលរថយន្តដឹកទំនិញថៃចូលមកកម្ពុជា តាមច្រកទ្វារអន្តរជាតិប៉ោយប៉ែត ត្រូវកម្លាំងប៉ុស្តិ៍នគរបាលអន្តរប្រវេសន៍ប្រចាំច្រកទ្វារអន្តរជាតិប៉ោយប៉ែត សហការជាមួយកម្លាំងយោធា និងកម្លាំងកងរាជអាវុធហត្ថ បានពិនិត្យគ្រប់រថយន្តដែលចូលមកកម្ពុជា ដើម្បីត្រួតពិនិត្យរកខ្លាចមានលួចលាក់នាំចូលពលករដោយខុសច្បាប់និងទប់ស្កាត់កូវីដ១៩ផងដែរ។
លោកបានបញ្ជាក់ថា នៅថ្ងៃទី១ ខែមីនា ឆ្នាំ២០២២ខាងមុខនេះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នឹងអញ្ជើញបើកពិធីសម្ពោធដាក់ឱ្យប្រើប្រាស់ខ្លោងទ្វារ និងអគារដ្ឋបាលមាត់ច្រកទ្វារ អន្តរជាតិប៉ោយប៉ែតនោះផងដែរ ។ វ៉ាន់ ណាង