ក្រុមគ្រូពេទ្យសម្រេចចិត្តវះកាត់ស្ត្រីពោះធំគ្រប់ខែម្នាក់ដែលកើតជំងឺកូវីដ ខណៈអាការធ្វើទុក្ខខ្លាំង

ស្ត្រីមានផ្ទៃពោះគ្រប់ខែម្នាក់មានជំងឺកូវីដ-១៩ ធ្ងន់ធ្ងរមិនអាចសម្រាលតាមបែបធម្មជាតិបាន ក្រុមគ្រូពេទ្យសម្រេចជួយសង្គ្រោះដោយវះកាត់សម្រាលកូនដោយសុវត្ថិភាព ។

អ្នកជំងឺកូវីដមានផ្ទៃពោះគ្រប់ខែខាងលើ ត្រូវបានឈឺពោះឆ្លងទន្លេគ្រូពេទ្យជំនាញវះកាត់ជួយសង្រ្គោះរួចផុតគ្រោះថ្នាក់ នៅថ្ងៃទី០១ ខែមីនា ឆ្នាំ២០២២នេះ ស្ថិតក្នុងមន្ទីរពេទ្យបង្អែកខេត្តកំពង់ស្ពឺ ។

ក្រុមគ្រូពេទ្យប្រាប់ថា ស្ត្រីអ្នកជំងឺកូវីដ-១៩ ធ្ងន់ធ្ងរត្រូវវះកាត់សង្រ្គោះទាំងម្តាយ និងកូនមានឈ្មោះ វាត ម៉ៅ អាយុ៤០ឆ្នាំ រស់នៅភូមិវាល ឃុំកំពង់សិលា ស្រុកកំពង់សិលា ខេត្តព្រះសីហនុ ។ ស្ត្រីអ្នកជំងឺត្រូវគ្រូពេទ្យ នៃមន្ទីរពេទ្យបង្អែកខេត្តកំពង់ស្ពឺ វះកាត់សម្រាលកូនប្រកបដោយជោគជ័យ ។

លោកវេជ្ជបណ្ឌិត ហុក គ្រី ប្រធានមន្ទីរសុខាភិបាលខេត្តកំពង់ស្ពឺ បានប្រាប់ថា ស្ត្រីមានផ្ទៃពោះគ្រប់ខែឆ្លងទន្លេម្នាក់ មានជំងឺកូវីដ-១៩ ធ្ងន់ធ្ងរគាត់មានស្ថានភាពហត់ ថប់ៗ ពិបាកដកដង្ហើម រវើរវាយ និងប្រកាច់ម្តងៗ ជាកក្តាគ្រោះថ្នាក់បំផុតដែលធ្វើឱ្យអ្នកជំងឺប្រឈមនឹងការស្លាប់បាត់បង់ជីវិតទាំងម្តាយ និងកូនក្នុងផ្ទៃ ។

លោកវេជ្ជបណ្ឌិតបានបន្ថែមថា ដោយស្ថានភាពជំងឺធ្ងន់ធ្ងរ និងគ្រោះថ្នាក់បែបនេះមិនអាចឲ្យស្ត្រីជាម្តាយសម្រាលកូនតាមបែបធម្មជាតិបានទេ ក្រុមគ្រូពេទ្យបានពិភាគ្សាគ្នាព្រមទាំងមានការឯកភាពពីក្រុមគ្រួសារក៏សម្រេចធ្វើការវះកាត់ភ្លាមៗដើម្បីសង្រ្គោះទារកហើយក្នុងនោះក្រុមគ្រូពេទ្យបានធ្វើការវះកាត់ដោយជោគជ័យ។

ប្រធានមន្ទីរសុខាភិបាលខេត្តកំពង់ស្ពឺ បានបញ្ជាក់ថា ស្ត្រីអ្នកជំងឺកូវីដក្រុមគ្រូពេទ្យវះកាត់សម្រាលទារិកាម្នាក់មានទំងន់ប្រមាណ១៦០០ក្រាម មានសុវត្ថិភាពមិនឆ្លងជំងឺកូវីដ-១៩ ពីម្តាយនោះឡើយ ។

បច្ចុប្បន្នទារិកាមានសុខភាពល្អប្រសើរ ក្រោមការតាមដានរបស់គ្រូពេទ្យដោយមើលថែយ៉ាងយកចិត្តទុកដាក់បំផុត និងម្តាយក៏មានសុវត្ថិភាពដូចគ្នា ៕

អត្ថបទ៖ ភួង រដ្ឋា