ទិវាសៀវភៅកម្ពុជា​រៀបចំឡើង​លើកដំបូង​នៅពហុកីឡដ្ឋានជាតិ​មរតកតេជោ​ដើម្បី​លើកកម្ពស់​ការអាន

ទិវាសៀភៅកម្ពុជា គឺប្រារព្ធធ្វើឡើងជាលើកដំបូងនៅប្រទេសកម្ពុជា ដើម្បីចូលរួមលើកកម្ពស់​ការ​អាន ដែលនឹងធ្វើឡើងនៅពហុកីឡដ្ឋានជាតិមរតកតេជោ ចាប់ពីថ្ងៃទី ៦ ដល់ថ្ងៃទី ១០ ខែមេសា។

កម្មវិធីនេះ រៀបចំដោយសមាគមអ្នកនិពន្ធ បណ្ណាល័យបញ្ញវន្ត និងគ្រឹះស្ថានបោះពុម្ពផ្សាយ Business Record ក្រោមការឧបត្ថម្ភដោយក្រុមហ៊ុន WOWNow ក្រុមហ៊ុន Khnum។

កម្មវិធីនេះ នឹងមានការតាំងពិព័រណ៍សៀវភៅ ៤៨ ស្ដង់ ដែលមានគ្រឹះស្ថានបោះពុម្ព និងបណ្ណាគារ ហាងលក់សៀវភៅជាច្រើនចូលរួម។ ក្នុងនោះក៏មានយុទ្ធនាការចែកសៀវភៅប្រមាណ ១ ពាន់ក្បាល ព្រមទាំងការបញ្ចុះតម្លៃ ៧០ ភាគរយដើម្បីចូលរួមលើកកម្ពស់ការអាន និងសម្រាប់អ្នកគ្មាន​លទ្ធភាព​ទិញសៀវភៅ។

អ្នកស្រី ប៉ុល ពិសី អនុប្រធានសមាគមអ្នកនិពន្ធខ្មែរ និងជាអ្នកនិពន្ធជើងចាស់ល្បីឈ្មោះ មានប្រសាសន៍នៅក្នុងសន្និសីទសារព័ត៌មាន ស្ដីពីទិវាសៀវភៅ នៅថ្ងៃទី ២៨ ខែមីនា នេះថា ការរៀបចំទិវាសៀវភៅកម្ពុជានេះ ក៏ជាការជំរុញទឹកចិត្តស្នាដៃរបស់អ្នកនិពន្ធ និងមិត្តអ្នកអានអាចជួបប្រាស្រ័យជាមួយអ្នកនិពន្ធ សាកសួរពីបទពិសោធន៍ផ្សេងៗ ដែលជាចំណុចល្អមួយ ដែលការខិតជិតគ្នារវាងអ្នកអាន និងអ្នកនិពន្ធ។

លោក សុខ ឡាក់ សហស្ថាបនិកបណ្ណាល័យបញ្ញវន្ត បានឱ្យដឹងថា ការរៀបចំទិវាសៀវភៅកម្ពុជា ដើម្បីបំផុសគំនិតវិជ្ជមានទៅដល់ប្រជាពលរដ្ឋគ្រប់គ្នា មិនថាសិស្ស និស្សិត អ្នកជំនួញ អាជីវករក្ដី មន្ត្រីរាជការ ឬអ្នកដែលបានបញ្ចប់ពីសាកលវិទ្យាល័យហើយ គឺមានសិទ្ធិសេរីភាព ក្នុងការជ្រើស​រើសសៀវភៅដែលខ្លួនឯងពេញចិត្តអាន។

ទិវាសៀភៅកម្ពុជា រៀបចំឡើងរយៈពេល ៥ ថ្ងៃ ចាប់ពីថ្ងៃទី ៦ ដល់ថ្ងៃទី ១០ ខែមេសា រំពឹងថា នឹង​មានអ្នកចូលរួម ប្រមាណ ១ ម៉ឺននាក់ នៅពហុកីឡដ្ឋានជាតិមរតកតេជោ ដែលមានការដាក់តាំង​ពិព័រណ៍សៀវភៅ ៤៨ ស្ដង់ របស់គ្រឹះស្ថានបោះពុម្ព និងបណ្ណាគារ ហាងលក់សៀវភៅ​ជាច្រើន​ចូលរួម៕