ព័ត៌មានជាតិ

ត្រឹម ១ ខែ កម្ពុជា រកឃើញអ្នកជំងឺកូវីដ-១៩ ឡើងវិញ ៤៤៤ ករណី បន្ទាប់ពីស្ងប់ស្ងាត់ជិត ២ ខែ

បានផុស

៤ years មុន

នៅ

ថ្ងៃសុក្រ ២៩ កក្កដា ២០២២

ដោយ

ក្រសួងសុខាភិបាល នៅថ្ងៃទី២៩ ខែកក្កដា ឆ្នាំ២០២២នេះ បានចេញសេចក្តីប្រកាសព័ត៌មាន លទ្ធផលសរុបម្សិលមិញ បញ្ជាក់ពីការរកឃើញអ្នកឆ្លងកូវីដ-១៩ ចំនួន ២៦ នាក់។ កម្ពុជា បានចាប់ផ្ដើមរកឃើញឡើងវិញ ចាប់ពីថ្ងៃទី ២៩ ខែមិថុនា ឆ្នាំ ២០២២នេះ ដែលមកដល់ពេលនេះ រយៈពេលជាង ១ ខែ កម្ពុជា រកឃើញ អ្នកជំងឺកូវីដ-១៩ ថ្មី សរុប ៤៤៤ ករណី បន្ទាប់ពីមិនមានរកឃើញអ្នកឆ្លងជំងឺកូវីដ១៩ ថ្មី អស់រយៈពេល ៥២ ថ្ងៃជាប់គ្នារួចមក។ ក្នុងនោះ អ្នកជំងឺជាសះស្បើយមានចំនួន ២៦៣ ករណី និងពុំមានករណីស្លាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកជំងឺថ្មី ឆ្លងជំងឺ កូវីដ-១៩ ទាំងនោះ ត្រូវបានរកឃើញ ដោយម៉ាស៊ីន PCR និងជាប្រភេទអូមីក្រុង ទាំងអស់។ ក្នុងនោះ ៧ ករណី ជាករណីនាំចូល ឯ ៤៣៧ ករណី ជាករណីឆ្លងក្នុងសហគមន៍ និងត្រូវបានរកឃើញពេលពួកគេសុំវិញ្ញាបនបត្រចេញទៅក្រៅប្រទេស។

គិតត្រឹមការប្រកាសរបស់ក្រសួងសុខាភិបាល នៅថ្ងៃនេះ កម្ពុជារកឃើញអ្នកឆ្លងជំងឺកូវីដ១៩ សរុបចំនួន ១៣៦ ៧០៦ ករណី, អ្នកជាសះស្បើយសរុបចំនួន ១៣៣ ៤៦៩ នាក់, ស្លាប់សរុបចំនួន ៣ ០៥៦ នាក់។

គួរបញ្ជាក់ថា សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអំពាវនាវឱ្យ ក្រសួងសុខាភិបាល មន្ទីរសុខាភិបាលនិងអាជ្ញាធរពាក់ព័ន្ធ ពិនិត្យ ឱ្យបានដិតដល់ និងតាមដាននូវការវិវត្តន៍នៃជំងឺកូវីដ១៩នេះ ដើម្បីបញ្ចៀសឱ្យបាននូវការរីករាលដាលដ៏ធ្ងន់ធ្ងរ ដែលអាចកើតឡើងជាយថាហេតុ។ ជាមួយគ្នានោះសម្ដេចបានអំពាវនាវឱ្យប្រជាពលរដ្ឋ ដែលមិនទាន់ទទួលបានការចាក់វ៉ាក់សាំងដូសជំរុញ ត្រូវរូសរាន់ទៅទទួលវ៉ាក់សាំងដូសជំរុញឱ្យបានគ្រប់គ្នា៕

អត្ថបទ៖ ច័ន្ទ វីរៈ