ព័ត៌មានជាតិ

អតីតអភិបាលខេត្តកំពង់ឆ្នាំង ស្ម័គ្រចិត្តប្រគល់ដី ២២ កន្លែងជូនរដ្ឋវិញ

បានផុស

៤ years មុន

នៅ

ថ្ងៃសៅរ៍ ៣០ កក្កដា ២០២២

ដោយ

លោក ឱម យ៉ិនទៀង ទេសរដ្ឋមន្ត្រីអង្គភាពប្រឆាំងអំពើពុករលួយបានឱ្យដឹងថា លោក ឈួរ ច័ន្ទឌឿន អតីតអភិបាលខេត្តកំពង់ឆ្នាំង បានយល់ព្រមប្រគល់ដីចំនួន ២២ កន្លែងជូនរដ្ឋវិញ។

នៅក្នុងកិច្ចប្រជុំក្រុមប្រឹក្សាជាតិប្រឆាំងអំពើពុករលួយលើកទី ១៤ អាណត្តិទី ៣ របស់ខ្លួនកាលពីរសៀលថ្ងៃទី ២៩ កក្កដា លោកទេសរដ្ឋមន្ត្រី ឱម យ៉ិនទៀង បានបន្តថា ករណីលោក ឈួរ ច័ន្ទឌឿន អតីតអភិបាលខេត្តកំពង់ឆ្នាំងនេះ បានរងពាក្យបណ្តឹងជាច្រើនពីមន្ត្រីកងទ័ព និងប្រជាជនពាក់ព័ន្ធនឹងករណីដីធ្លី ដីខ្លះមានពាក្យបណ្តឹងរហូតដល់ ៩ ក៏មានដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកទេសរដ្ឋមន្ត្រី ឱម យ៉ិនទៀង បានបន្តទៀតថា ប៉ុន្តែជាចុងក្រោយនេះ លោកឈួរ ច័ន្ទឌឿនយល់ព្រមប្រគល់ដីចំនួន ២២ កន្លែងវិញ ក្នុងនោះមាន ២១ កន្លែងប្រគល់ជូនរដ្ឋ និង ១ កន្លែងជូនម្ចាស់ដើមវិញ។ ក្នុងចំណោមដី ២២ កន្លែងនោះ មាននៅសង្កាត់ប្អេរ ក្រុងកំពង់ឆ្នាំ ២ កន្លែង ស្រុករលាប្អៀរ ២ កន្លែង ស្រុកសាមគ្គីមានជ័យ ៦ កន្លែង ស្រុកកំពង់លែង ១ កន្លែង ស្រុកទឹកផុស ១០ កន្លែង និងស្រុកកំពុងត្រឡាច ១ កន្លែង។

ករណីលោកឈួរ ច័ន្ទឌឿន អតីតអភិបាលខេត្តកំពង់ឆ្នាំងប្រគល់ដីជូនរដ្ឋ ២២ កន្លែងនេះ ត្រូវបានប្រតិភូអង្គភាពប្រឆាំងអំពើពុករលួយ ដឹកនាំដោយលោក ឱម យ៉ិនទៀង ទេសរដ្ឋមន្ត្រី ប្រធានអង្គភាពប្រឆាំងអំពើពុករលួយ បានបើកកិច្ចប្រជុំនៅសាលាខេត្តកំពង់ឆ្នាំង នាថ្ងៃទី ២០-២១ ខែកក្កដា ឆ្នាំ ២០២២ ដើម្បីជូនដំណឹងជូនដល់លោកអភិបាលខេត្ត ស៊ុន សុវណ្ណារិទ្ធិ អំពីលទ្ធផលនៃការអង្កេតស្រាវជ្រាវ ទៅលើករណីគាត់និងការរួមគ្នាដោះស្រាយបញ្ចប់ទាំងស្រុងរាល់ពាក្យប្តឹងមក អង្គភាពប្រឆាំងអំពើពុករលួយដែលមានក្នុងខេត្ត៕

អត្ថបទ៖ សំអឿន

Related Topics: