ដំណើរបំពេញទស្សនកិច្ច ៤ថ្ងៃរបស់លោកស្រី ង្វៀន ធីថាញ់ ទទួលបានការស្វាគមន៍យ៉ាងកក់ក្ដៅពីថ្នាក់ដឹកនាំកម្ពុជា

ក្នុងដំណើរបំពេញទស្សនកិច្ចជាផ្លូវការ រយៈពេល ៤ថ្ងៃ របស់លោកស្រី ង្វៀន ធីថាញ់ (Nguyen Thi Thanh) សមាជិកគណៈកម្មាធិការមជ្ឈឹម នៃបក្សកុម្មុយនិស្តវៀតណាម ជាសមាជិកគណៈកម្មាធិការអចិន្ត្រៃយ៍ នៃរដ្ឋសភា ជាប្រធានគណៈកម្មការទទួលបន្ទុកការងាររដ្ឋសភា និងជាអនុប្រធានគណៈចាត់តាំងមជ្ឈឹម ទទួលបានការស្វាគមន៍យ៉ាងកក់ក្តៅ ពីប្រមុខដឹកនាំជាន់ខ្ពស់របស់កម្ពុជា ៤រូប ដោយភាពស្និតស្នាល។

ជាមួយនឹងការស្វាគមន៍យ៉ាងកក់ក្តៅពីប្រមុខដឹកនាំកំពូលៗ របស់កម្ពុជារួចមកលោកជំទាវ ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច និងជាប្រធានសមាគមមិត្តភាពកម្ពុជា-វៀតណាម បានជូនដំណើរលោកជំទាវ ង្វៀន ធីថាញ់ (Nguyen Thi Thanh)  សមាជិកគណៈកម្មាធិការមជ្ឈឹម នៃបក្សកុម្មុយនិស្តវៀតណាម ជាសមាជិកគណៈកម្មាធិការអចិន្ត្រៃយ៍ នៃរដ្ឋសភា ជាប្រធានគណៈកម្មការទទួលបន្ទុកការងារ រដ្ឋសភា និងជាអនុប្រធានគណៈចាត់តាំងមជ្ឈឹម អញ្ជើញទស្សនាអង្គរវត្ត នៃខេត្តសៀមរាប កាលពីរសៀលថ្ងៃទី ៣ ខែសីហា ឆ្នាំ ២០២២។

សូមបញ្ជាក់ផងដែរថា គណៈប្រតិភូបានអញ្ជើញមកបំពេញទស្សនៈកិច្ចជាផ្លូវការ រយៈពេល ៤ថ្ងៃ គិតចាប់តាំងពីថ្ងៃទី ១ ដល់ថ្ងៃទី ៤ ខែសីហា ឆ្នាំ ២០២២ ក្នុងរយៈពេលបំពេញទស្សនៈកិច្ចនេះ គណៈប្រតិភូបានចូលជួប សម្តែងការគួរសមជាមួយ៖

ទី១. លោកជំទាវ ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច និងជាប្រធានសមាគមមិត្តភាពកម្ពុជា-វៀតណាម ។

ទី២. សម្តេចអគ្គមហាពញ្ញាចក្រី ហេង សំរិន ប្រធានរដ្ឋសភាជាតិ នៃព្រះរាជាណាចក្រកម្ពុជា។

ទី៣.សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។

ទី៤.សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា។

ជាមួយគ្នានេះដែរ ថ្នាក់ដឹកនាំរបស់ប្រទេសទាំងពីរ ក៏មានកម្មវិធីស្និតស្នាលមួយចំនួនទៀតបានប្រព្រឹត្តិទៅដោយរលូនតាមការគ្រោងទុក ហើយគណៈប្រតិភូនឹងចាកចេញពីព្រះរាជាណចក្រកម្ពុជា ត្រឡប់ទៅកាន់មាតុប្រទេសវិញនៅថ្ងៃនេះ៕

អត្ថបទ៖ វិមាន