ក្រសួងមហាផ្ទៃ កំពុងជំរុញឲ្យច្បាប់ប្រឆាំងបទល្មើសបច្ចេកវិទ្យាព័ត៌មាន ចេញឲ្យបានលឿន

នៅថ្ងៃទី៦ ខែកញ្ញា ឆ្នាំ២០២២នេះ នៅទីស្ដីក្រសួងមហាផ្ទៃ សម្ដេចក្រឡាហោម ស ខេង រដ្ឋមន្រ្តី ក្រសួងមហាផ្ទៃ បានដឹកនាំកិច្ចប្រជុំពិនិត្យពិភាក្សាលើសេចក្ដីព្រាងច្បាប់ស្ដីពី បទល្មើសបច្ចេកវិទ្យាព័ត៌មាន ដែលត្រូវបានក្រសួងមហាផ្ទៃរៀប ចំតាក់តែងឡើងតាំងតែពីឆ្នាំ២០១៦ មកម្ល៉េះ។

ការបង្កើតឲ្យមានច្បាប់ស្ដីពី ការប្រឆាំងបទល្មើសបច្ចេកវិទ្យាព័ត៌មាននេះ គឺធ្វើឡើងស្របពេលដែលបទល្មើសតាមបច្ចេក វិទ្យាព័ត៌មាននៅក្នុងប្រទេសកម្ពុជា បាននឹងកំពុងកើតមានឡើងជាបន្តបន្ទាប់ ដែលជាក្ដីកង្វល់របស់រាជរដ្ឋាភិបាលកម្ពុជា ក្នុងបរិបទថ្មីនៃសម័យបច្ចេកវិទ្យា។

សេចក្ដីព្រាងច្បាប់ស្ដីពី បទល្មើសបច្ចេកវិទ្យាព័ត៌មាន មាន ៨ជំពូក និង ៥០មាត្រា ដែលមានគោលបំណងធានាសុចរិតភាពនៃការប្រើប្រាស់ ការគ្រប់គ្រងប្រព័ន្ធកុំព្យូទ័រ ទិន្នន័យកុំព្យូទ័រ និងការពារសន្តិសុខសណ្តាប់ធ្នាប់សាធារណៈ ព្រមទាំងការការពារសិទ្ធិសេរីភាពបុគ្គលផងដែរ ដើម្បីបង្ការទប់ស្កាត់ និងបង្រ្កាបបទល្មើសបច្ចេកវិទ្យាព័ត៌មាន។

ច្បាប់នេះមានវិសាលភាពអនុវត្តចំពោះបទល្មើសបច្ចេកវិទ្យាព័ត៌មាន ដែលប្រព្រឹត្តនៅក្នុង ឬក្រៅប្រទេសកម្ពុជា រាល់អំពើល្មើសណាធ្វើឲ្យប៉ះពាល់ដល់រូបវន្តបុគ្គល នីតិបុគ្គល សន្តិសុខសណ្តាប់ធ្នាប់ របៀបរៀបរយសាធារណៈ ផលប្រយោជន៍របស់កម្ពុជា ជាដើម។

សម្ដេចក្រឡាហោម ស ខេង បានរំលឹកថា សេចក្ដីព្រាងច្បាប់ស្ដីពី បទល្មើសបច្ចេកវិទ្យាព័ត៌មាន ត្រូវបានក្រសួងមហាផ្ទៃ រៀបចំតាក់តែងឡើងតាំងតែពីឆ្នាំ២០១៦ ដោយបានឆ្លងកាត់កិច្ចប្រជុំពិគ្រោះយោបល់ជាច្រើនលើកជាច្រើនសារ ជាមួយក្រុមការងារជំនាញអន្តរក្រសួង រួមមាន ក្រសួងប្រៃសណីយ៍ និងទូរគមនាគមន៍ ក្រសួងព័ត៌មាន ក្រសួងពាណិជ្ជកម្ម ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងក្រសួងយុត្តិធម៌។ ជាមួយគ្នានេះ កិច្ចពិគ្រោះយោបល់លើសេចក្ដីព្រាងច្បាប់នេះ ក៏មានការចូលរួមពីភាគីស្ថានទូតអាមេរិកប្រចាំនៅកម្ពុជា ក៏ដូចជាក្រុមហ៊ុនធំៗអាមេរិកចំនួន៥ ផងដែរ៕

ដោយ ៖ ធឿន វ៉ាន់សុង