សម្ដេច ស ខេង ៖ មន្ត្រីនគរបាលណាមិនគោរពគោលការណ៍ត្រូវតែទទួលពិន័យ ដើម្បីការពារកិត្តិយសកងកម្លាំងនគរបាល

សម្ដេចក្រឡាហោម ស ខេង ឧបនាយករដ្ឋមន្ដ្រីរដ្ឋមន្ដ្រីក្រសួងមហាផ្ទៃ បានមានប្រសាសន៍ថា មន្ត្រីនគរបាលណាដែលមិនគោរពគោលការណ៍ គោលនយោបាយរបស់រាជរដ្ឋាភិបាល ឬមួយគោលការណ៍របស់ក្រសួង ស្ថាប័ន អង្គភាព គឺត្រូវតែទទួលពិន័យ ដើម្បីធានាដល់សុវត្ថិភាព និងការពារកត្តិយសសេចក្តីថ្លៃថ្នូររបស់កងកម្លាំងនគរបាល។

ថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការនូវសមិទ្ធផលស្នងការដ្ឋាននគរបាលរាជធានីភ្នំពេញ នៅព្រឹកថ្ងៃទៅ០៨​កញ្ញានេះ សម្តេចក្រឡាហោម បានលើកសរសើរដល់មន្ត្រីនគរបាលដែលមានសមត្ថភាពបំពេញភារកិច្ចបានល្អ។ ប៉ុន្តែដាក់ពិន័យចំពោះមន្ត្រីនគរបាលដែលបានប្រពឹត្តកំហុសឆ្គងផងដែរ ។

សម្តេចក្រឡាហោមបានសង្កត់ធ្ងន់ថា « មន្ត្រីនគរបាលណាដែលមិនគោរពគោការណ៍ គោលនយោបាយរបស់រាជរដ្ឋាភិបាល ឬមួយគោលការណ៍របស់ក្រសួង ស្ថាប័នអង្គភាព គឺត្រូវតែទទួលពិន័យដើម្បីធានាដល់សុវត្ថិភាព និង​ការពារ​កត្តិយសសេចក្តីថ្លៃថ្នូររបស់កងកម្លាំងនគរបាល»។

សម្តេចក្រឡាហោមបានបន្តថា «ដើម្បីបង្កើតកសាងកងម្លាំងមួយប្រកបដោយវិជ្ជាជីវៈ សមត្ថភាព គុណធម៌ សមធម៌ វិន័យ​ចាំបាច់ត្រូវតែធ្វើការងារពីដើមដល់ចុងបញ្ចប់ឱ្យបានល្អ ។ ការចាប់ផ្តើម គឺការជ្រើសរើសមន្ត្រីចូលក្របខណ្ឌនគរបាល ក្នុងនោះផងដែរមន្ត្រីទាំងនោះត្រូវទទួលបានការរៀនសូត្របណ្តុះបណ្តាល នេះជាគោលការណ៍ដែលមិនអាចខ្វះបានដើម្បីបង្កើនសមត្ថភាព ហើយមន្ត្រីដែលមិនឆ្លងកាត់ការបណ្តុះបណ្តាលមិនអាចប្រគល់តួនាទីភារកិច្ចឱ្យបានទេ»។

ជាមួយគ្នានេះដែរ សម្ដេចក្រឡាហោម ស ខេង បានណែនាំដល់មន្ត្រីនគរបាល និងមន្ត្រីមុខងាសាធារណៈទាំងអស់ត្រូវធ្វើការបម្រើប្រជាពលរដ្ឋដោយគ្មានការរើសអើង លើនិន្នាការនយោបាយឡើយ ដោយក្នុងពេលដែលធ្វើសំណុំរឿងអ្វីមួយមិនត្រូវគិតថា បុគ្គលនេះមកពីបក្សណានោះទេ។

សម្តេចក្រឡាហោម ស ខេង បានបញ្ជាក់ថា «ក្នុងពេលដែលកងកម្លាំងត្រូវធ្វើការងារជួយសង្គ្រោះ ឬផ្តល់សេវ​សាធារណៈ​ជូនប្រជាពលរដ្ឋ មិនត្រូវគិតថា ពលរដ្ឋរូបនេះមកពីបក្សនយោបាយណា ប្រសិនបើមន្ត្រីនគរបាល និងមន្ត្រីមុខងាសាធារណៈគិតបែបនេះ គឺមិនត្រឹមត្រូវនោះទេព្រោះយើងមានតួនាទីបម្រើប្រជាពលរដ្ឋ»៕

អត្ថបទ៖ សំអឿន