លោក ជា អូន រដ្ឋលេខាធិការ និងជាអ្នកនាំពាក្យអាកាសចរស៊ីវិល បានបញ្ជាក់នៅក្នុងសន្និសីទសារព័ត៌មាន កាលពីព្រឹកមិញថ្ងៃទី១៦ ខែកញ្ញា នេះថា បច្ចុប្បន្នកម្ពុជា មានយុវជនចំនួន១៨នាក់ទៀត កំពុងសិក្សាជំនាញអាកាសយានិក (ពីឡុត) ហើយក៏បានបញ្ចប់មួយចំនួន ក្នុងនោះមាននារី ៣នាក់។

អ្នកនាំពាក្យរូបនេះ បញ្ជាក់ថា ដោយមានការគាំទ្រពីរាជរដ្ឋាភិបាល ទាក់ទងនឹងយេនឌ័រ កម្ពុជាក៏បានជំរុញឱ្យនារីចូលរួមកាន់តែច្រើននៅគ្រប់វិស័យ ជាក់ស្តែងទាំងវិស័យអាកាសចរនេះផងដែរ។ លោកបន្ថែមថា សូម្បីបុគ្គលិកបញ្ជាហោះហើរ ក៏មានចំនួនស្ត្រីច្រើនគួរឲ្យកត់សម្គាល់ ដោយសារស្ត្រីមានសំឡេងហ្រ្វេកង់ខ្ពស់ នៅពេលនិយាយទៅ សំឡេងឆ្មាច្បាស់ល្អ មិនគ្រលរ ម្យ៉ាងវិញអាកាសយានិក យកចិត្តទុកដាក់សំឡេងបញ្ជារបស់ស្ត្រីជាងបុរស។

បើតាមមន្ត្រីជាន់ខ្ពស់អាកាសចរណ៍ស៊ីវិលរូបនេះ នៅកម្ពុជាបច្ចុប្បន្នមានក្រុមហ៊ុនអាសកាសចរក្នុងស្រុកចំនួន៦ ក្នុងនោះមានយន្តហោះជាង២០គ្រឿង ដែលត្រូវការអាកាសយាននិកប្រមាណ ១០០នាក់ អ្នកបម្រើលើយន្តហោះប្រមាណ ២០០នាក់ រួមទាំងបុគ្គលិកបន្ទាប់បន្សំជាច្រើននាក់ទៀត។ ទោះយ៉ាងណាបច្ចុប្បន្នកម្ពុជាមានអាកាសយានិកទាំងចាស់ទាំងក្មេង អាចហោះហើរបានមានប្រមាណជា ៥០នាក់ប៉ុណ្ណោះ មានន័យថា នៅមានតម្រូវការអាកាសយានិកបន្ថែមទៀត ដូច្នេះជាឱកាសសម្រាប់យុវជនជំនាន់ក្រោយដែលមានបំណងចាប់អាជីពនេះ៕

អត្ថបទ៖ សុធាវី