ខេត្តបាត់ដំបង ទទួលបានភ្ញៀវទេសចរជាង ៦ ម៉ឺននាក់ ក្នុងថ្ងៃបុណ្យភ្ជុំបិណ្ឌ

តំបន់រមណីយដ្ឋាន និងតំបន់អេកូទេសចរ ក្នុងខេត្តបាត់ដំបងជាច្រើនកន្លែង បាននិងកំពុងទាក់ទាញភ្ញៀវទេសចរឲ្យចូលទៅទស្សនាកម្សាន្ដ ដោយក្នុងពិធីបុណ្យភ្ជុំបិណ្ឌតែមួយថ្ងៃប៉ុណ្ណោះ មានជាង ៦ ម៉ឺននាក់។

យោងតាមរបាយការណ៍របស់លោក អ៊ុចអ៊ុ ភីនីស្សារ៉ា ប្រធានមន្ទីរទេសចរខេត្ត បានឲ្យដឹងថា នៅថ្ងៃទី២៥ ខែកញ្ញា ឆ្នាំ ២០២២ ម្សិលមិញនេះ នៅតាមតំបន់រមណីយដ្ឋាននានា ក្នុងខេត្តបាត់ដំបងទាំងមូល  មានចំនួនភ្ញៀវទេសចរចូលទៅកម្សាន្ត ក្នុងឱកាសពិធីបុណ្យភ្ជុំបិណ្ឌសរុបជាង ៦ ម៉ឺននាក់។ ក្នុងនោះ ក៏មានភ្ញៀវទេសចរអន្តរជាតិ ផងដែរ។

បើគិតចំនួនភ្ញៀវទេសចរជាតិ នៅថ្ងៃទី ២៥ ខែកញ្ញា មានចំនួន ៦៣,៧២៣នាក់ បើប្រៀបធៀបទៅនឹងឆ្នាំ ២០២១ ដែលមានចំនួន ១៩,១៣៨ នាក់ គឺកើនឡើង ២៣២.៩៧ភាគរយ។ ដោយឡែក សម្រាប់ភ្ញៀវទេសចរអន្តរជាតិ (ទេសចរផ្ទៃក្នុង) មានចំនួន ៧៥នាក់ កើនឡើង ១០០ភាគរយ បើប្រៀបធៀបនឹងឆ្នាំ ២០២១ ដែលមានចំនួន ០០នាក់។

លោកប្រធានមន្ទីរ បានបន្ថែមថា បើសរុបចំនួនភ្ញៀវទេសចរទាំងអស់ មានចំនួន ៦៣,៧៩៨ នាក់ កើនឡើង ២៣៣.៣៦ ភាគរយ បើប្រៀបធៀបនឹងឆ្នាំ ២០២១ ដែលមានចំនួន ១៩,១៣៨នាក់។ បើទោះបីជារយ:ពេលប៉ុន្មានថ្ងៃនេះ មានភ្លៀងធ្លាក់ជាបន្តបន្ទាប់ក៏ដោយ ក៏ភ្ញៀវទេសចរបានសម្រុកមកដើរកម្សាន្ដយ៉ាងច្រើនដែរ៕  

អត្ថបទ៖ សោ និយមរ័ត្ន