ផ្លូវមួយខ្សែក្នុងឃុំអូរដា​ត្រូវបានផ្អាកការធ្វើចរាចរ​ដោយសារ​ទឹកជន់ដល់បង្កាន់ដៃស្ពាន

ផ្លូវមួយខ្សែក្នុងស្រុកកំរៀង​ ខេត្តបាត់ដំបងជាប់ព្រំដែនថៃ​ត្រូវបានអាជ្ញាធរចុះផ្អាក​មិនឲ្យធ្វើចរាចរ​ឆ្លងកាត់ឡើយដោយសារតែទឹកជំនន់បានហក់ឡើងខ្លាំង​បណ្តាលឲ្យលិចដល់ជាងពាក់កណ្តាលបង្កាន់ដៃស្ពាន។

​កាលពីម្សិលមិញនេះ​ទឹកនៅតាមអូរព្រំដែនថៃ​បានជន់ឡើងយ៉ាងខ្លាំង​បណ្តាល​ឲ្យលិចលង់​ផលដំណាំ​របស់ប្រជាពលរដ្ឋ​ និងផ្លូវថ្នល់មួយចំនួនត្រូវបានខូចខាតទាំងស្រុក​ ជាពិសេសគឺបានធ្វើ​ឲ្យ​ស្ទះចរាចរដោយមិនអាចឆ្លងកាត់បានឡើយសម្រាប់ច្រកអន្តរជាតិដូង។​

​លុះនៅព្រឹកថ្ងៃទី ១ ខែតុលា ឆ្នាំ២០២២នេះ ​សន្ទុះទឹកក្នុងអូរព្រំដែន​បានបែកមកដល់ភូមិមួយចំនួន​ ​ក្នុងស្រុកកំរៀង​ពិសេសគឺឃុំអូរដា​តែម្តង ដែលសន្ទុះទឹកបានជន់លិច​ដល់បង្កាន់ដៃស្ពាន​ក្នុងភូមិ​លំផាត់ខណៈអាជ្ញាធរបិទផ្អាកការធ្វើចរាចរបណ្តោះអាសន្ន​រង់ចាំទឹកស្រកវិញ ព្រោះ​ខ្លាច​ជួបនិងឧប្បទ្ទវហេតុណាមួយកើតឡើង។

​ផ្លូវមួយខ្សែដែលត្រូវឆ្លងកាត់ស្ពានលំផាត់នេះ​ ក៏ជាផ្លូវដ៏មានសារសំខាន់ ដែលផ្លូវនេះភ្ជាប់​ទៅកាន់​ភូមិសំរោង និងភូមិតាំងយូជាដើម ក្នុងការដឹកនាំកសិផលរបស់ប្រជាពលរដ្ឋមកកាន់ផ្លូវជាតិ និង​ទីផ្សារព្រំដែន។

​បើតាមប្រភពពីប្រជាពលរដ្ឋបានបញ្ជាក់ថា​ កំពស់ទឹក​មានការ​ស្រកចុះបន្តិចហើយនៅរសៀនេះ​ដោយឡែកក្បាលស្ពានទាំងសងខាង អាចមានការខូចខាតយ៉ាងធ្ងន់ធ្ងរផងដែរ ​ដោយសារតែកម្លាំងទឹកច្រោះ​ដោយនាំយកដីក្បាលស្ពានទៅជាមួយ​៕

អត្ថបទ៖សោ និយមរ័ត្ន