មន្ទីរបរិស្ថានខេត្តកែប បង្កើតយុទ្ធនាការសូន្យប្លាស្ទិក​លើកកម្ពស់សោភ័ណភាព​ក្រុងកែប

(ខេត្តកែប)៖ មន្ទីរបរិស្ថានធ្វើយុទ្ធនាការសូន្យប្លាស្ទិក នៅតំបន់ឧទ្យានជាតិកែប អស់រយៈពេលជាងមួយខែមកហើយ នៅក្នុងគោលបំណងដើម្បីថែរក្សាអនាម័យ បរិស្ថាន សោភ័ណភាពឧទ្យានជាតិកែបនេះ។

គិតត្រឹមថ្ងៃទី៨ ខែធ្នូ រហូតមកដល់ព្រឹកថ្ងៃទី១០ខែធ្នូឆ្នាំ២០២២នេះ លោក អ៊ិន សៅ ប្រធានស្តីទី នៃមន្ទីរបរិស្ថាន​ខេត្តកែប បានប្រាប់ឲ្យដឹងថា ដើម្បីភាពជោគជ័យនៃយុទ្ធនាការនេះ មន្ទីរបានធ្វើការណែនាំ ក៏ដូចជាតម្រូវឲ្យម្ចាស់​អាជីវកម្ម ដែលមានហាងកាហ្វេនៅតាមផ្លូវ ឈប់ប្រើ ឬកាត់បន្ថយនូវការប្រើផលិតផលប្លាស្ទិក។

កញ្ញ៉ា ឡាំង អាលិកា ដែលជាម្ចាស់ហាងកាហ្វេលើភ្នំ បានបង្ហាញការចូលរួមជាមួយនិងយុទ្ធនា​ការរបស់មន្ទីរបរិស្ថាន​ដែលក្នុងនោះ កញ្ញា បានកាត់បន្ថយនូវការសម្ភារៈមួយចំនួនដូចជា ឈប់ប្រើបំពង់បឺតប្លាស្ទិក និងកែវប្លាស្ទិក ដោយជំនួស​មកវិញនូវបំពង់បឺតធ្វើអំពីក្រកាស និងកែវក្រដាស ឬកែវថ្មជាដើមតែម្តង។

នៅតំបន់ឧទ្យានជាតិខេត្តកែបនេះគេបានចាត់ទុកជាសរសៃបេះដូងនៃខេត្តកែបនេះ ដោយសារលក្ខណៈសម្បត្តិល្អពី​ធម្មជាតិ ហើយមានខ្យល់អាកាសត្រជាក់គួរឱ្យចាប់អារម្មណ៍ មានកន្លែងមើលថ្ងៃរះ និងថ្ងៃលិចទៅសមុទ្រ ក៏ដូចជាពណ៌បៃតងស្រស់ស្អាតពេញមួយឆ្នាំ។

អាជ្ញាធរខេត្តកែប បាននិងកំពុងអភិវឌ្ឍខេត្តជាប់មាត់សមុទ្រមួយ​ តាមរយៈគម្រោងថ្មីៗ ជាច្រើន ដើម្បីទាក់ទាញភ្ញៀវ​ទេសចរ និងអ្នកវិនិយោគទាំងក្នុងស្រុក និងបរទេស។ ជាក់ស្តែង បន្ទាប់ពីធ្វើការសាងសង់​ផ្លូវបេតុងឡើងជុំវិញ​ក្នុងឧទ្យានជាតិកាលពីឆ្នាំមុន ថ្មីៗនេះអាជ្ញាធរ សាងសង់ប៉មឧទ្យានរួចរាល់ ដែលមើលទៅមានទេស​ភាពស្រស់ស្អាត​ផងដែរ៕ សឹង រ៉ាត់