សមាគមគ្រឹះស្ថានឧត្តមសិក្សា អំពាវនាវ​សិស្ស​និស្សិត ទៅចាក់វ៉ាក់សាំងដូសជំរុញឲ្យបានលឿន

លោក ហេង វ៉ាន់ដា ប្រធានក្រុមប្រឹក្សាភិបាលសមាគមគ្រឹះស្ថានឧត្តមសិក្សាកម្ពុជាបានធ្វើការអំពាវនាវដល់សិស្សនិស្សិត ទៅចាក់វ៉ាក់សាំងដូសជំរុញឲ្យបានលឿនរហ័ស ដើម្បីធានាភាពស៊ាំក្នុងសហគមន៍ដើម្បីការពារការរាតត្បាតជំងឺកូវីដ១៩។

ការអំពាវនាវរបស់លោកហេង វ៉ាន់ដា ធ្វើឡើងក្រោយពីប្រមុខរាជរដ្ឋាភិបាលកម្ពុជាសម្តេចតេជោហ៊ុនសែន តាមរយៈសារសំឡេងពិសេសកាលពីយប់ថ្ងៃទី២៩ធ្នូ បានជំរុញឲ្យចាក់វ៉ាក់សាំងកូវីដ១៩ ដូសជំរុញទី៣ទី៤ទី៥និងទី៦ និងជំរុញចាក់វ៉ាក់សាំងជាទម្លាប់រៀងរាល់ ៦ ខែម្តងដើម្បីធានាភាពស៊ាំក្នុងសហគមន៍ ដើម្បីការពារការរាតត្បាតជំងឺកូវីដ១៩ និងការពារសុខភាពប្រជាពលរដ្ឋពីជំងឺរាតត្បាតសាកលមួយនេះ។

លោក ហេង វ៉ាន់ដា បានប្រសាសន៍នៅព្រឹកថ្ងៃទី៣១ធ្នូនេះថា «ក្នុងនាមខ្ញុំជាប្រធាននៃគ្រឹះស្ថានសិក្សាអប់រំឯកជន ខ្ញុំសូម​អំពាវនាវដល់ ក្រុមប្រឹក្សាភិបាល ក្រុមប្រឹក្សាប្រតិបត្តិ ក្រុមប្រឹក្សាអប់រំ សាស្ត្រាចារ្យ បុគ្គលិក កម្មករនិស្សិត សិស្សានុសិស្ស ទាំងអស់អញ្ជើញទៅចាក់វ៉ាក់សាំងឲ្យបានលឿនរហ៏ស ស្របតាមការអំពាវនាវរបស់សម្តេចអគ្គមហាសេនាបតីតេជោ នាយករដ្ឋមន្ត្រីនៃព្រះរាជាណាចក្រកម្ពុជា»។

លោក ហេង វ៉ាន់ដាបានបន្តថា «ក្រុមប្រឹក្សាភិបាល ក្រុមប្រឹក្សាប្រតិបត្តិ ក្រុមប្រឹក្សាអប់រំ សាស្ត្រាចារ្យ បុគ្គលិក កម្មករនិស្សិត សិស្សានុសិស្ស នៃគ្រឹះស្ថានសិក្សាអប់រំឯកជន ពិតជាសប្បាយចិត្ត នៅពេលព្ញសម្តេចអគ្គមហាសេនាបតីតេជោ ប្រកាសអំពាវនាវពីការចាក់វ៉ាក់សាំងដូសបន្តនេះ។ យើងទាំងអស់គ្នា សូមសំដែងនូវការអរគុណជាអនេគកប្បការដល់ព្រហ្មវិហារធម៌នេះ»។

ចំណែកអ្នកនាំពាក្យក្រសួងអប់រំ យុវជន និងកីឡាក៏បានជំរុញឱ្យបុគ្គលិកអប់រំ អ្នកសិក្សាទាំងអស់បន្តចាក់វ៉ាក់សាំងជំងឺកូវីដ-១៩ ដូសជំរុញឱ្យបានគ្រប់ៗគ្នាខណៈការបើកបវេសនកាលឆ្នាំសិក្សាថ្មីនឹងប្រព្រឹត្តិទៅនៅថ្ងៃទី០២ខែមករាឆ្នាំ២០២៣ខាងមុខនេះ។

លោក រស់ សុវាចា អ្នកនាំពាក្យក្រសួងអប់រំ យុវជន និងកីឡាបានមានប្រសាសន៍ថា« ក្រសួងអប់រំ យុវជន និងកីឡាសូមជំរុញឱ្យបុគ្គលិកអប់រំ អ្នកសិក្សាទាំងអស់ មាតាបិតា និងគ្រប់ភាគីពាក់ព័ន្ធ បន្តចាក់វ៉ាក់សាំងជំងឺកូវីដ-១៩ ដូសជំរុញឱ្យបានគ្រប់ៗគ្នា និងបន្តអនុវត្តវិធានការ ៣កុំ ៣ការពារ ស្របតាមវិធានសុខាភិបាល និងការណែនាំរបស់រាជរដ្ឋាភិបាល ដើម្បីនិរន្តរភាពនៃការបើកដំណើរការសង្គម-សេដ្ឋកិច្ចតាមគន្លងប្រក្រតីភាពថ្មី»។

លោកបានបន្តថា ក្រសួងអប់រំ យុវជន និងកីឡាសូមកោតសរសើរ និងថ្លែងអំណរគុណ ចំពោះលោកគ្រូ អ្នកគ្រូ សិស្ស-និស្សិត និងមាតាបិតាដែលបានទៅ ទទួលយកការចាក់វ៉ាក់សាំងដោយស្ម័គ្រចិត្តដើម្បីចូលរួមបង្ការទប់ស្កាត់ការឆ្លង​រាល​ដាលជំងឺកូវីដ-១៩។ ស្មារតីបែបនេះ ជាការការពារអាយុជីវិតខ្លួនឯង និង អ្នកដទៃ ពិសេសរវាងគ្រូ និងសិស្ស ដែលត្រូវប្រាស្រ័យទាក់ទងគ្នាខណៈសិក្សាថ្មី ២០២២-២០២៣ នឹងចាប់ផ្តើមចូលរៀនពីថ្ងៃទី០២ ខែមករា ឆ្នាំ២០២៣តទៅ

អត្ថបទ៖ សំអឿន