អាជ្ញាធរហាមទេសចរឈប់ឱ្យចំណីស្វានៅឧទ្យានអង្គរចៀសវាងការបង្កគ្រោះថ្នាក់

អាជ្ញាធរ​​កម្ពុជាបាននិយាយថា ហ្វូងសត្វស្វាដែលរស់នៅក្នុងឧទ្យានប្រសាទអង្គរវត្តកំពុងបង្កហានិភ័យដល់ភ្ញៀវទេសចរនៅក្នុងតំបន់នោះ និងប្រាសាទផ្សេងៗទៀតដែលនៅក្បែរនោះ។

អាជ្ញាធរអប្សរាដែលទទួលបន្ទុកការពារ និងអភិរក្សឧទ្យានប្រសាទអង្គរវត្តបាននិយាយថា ចំនួនសត្វស្វានៅក្នុងឧទ្យានបុរាណ(អង្គរវត្ត)នេះ បានកើនឡើងយ៉ាងខ្លាំង ដោយសារតែការផ្លាស់ប្តូរឥរិយាបថជីវិតធម្មជាតិពីស្វាព្រៃមកស្វាស្រុក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជ្ញាធរអប្សរា​ប៉ាន់ប្រមាណ​ថា ​នៅ​តំបន់ឧទ្យាន​អង្គរវត្ត-អង្គរធំ ប្រហែលជាមានសត្វស្វារាប់រយក្បាល ដែលសត្វស្វាទាំងនោះហាក់ដូចជាស៊ាំនឹងមនុស្សទៅហើយ ពួកវាលែង​ចូល​ព្រៃ​ដើម្បីរក​ចំណី​ទៀត​ហើយ ពោលគឺ​រង់ចាំតែ​អាហារ​ពី​មនុស្ស ហើយ​ពេល​ខ្លះពួកវាលួចឬដណ្តើមអាហារពី​ភ្ញៀវ​ទេសចរទៀតផង។​

អាជ្ញាធរអប្សរាអំពាវនាវ​ប្រជាជនឲ្យឈប់ផ្តល់​ចំណីដល់​សត្វស្វាទាំងនោះ​ដើម្បី​ថត​រូប ឬក្នុងគោលបំណងណាមួយ ដើម្បីឲ្យ​សត្វ​ស្វាទាំងនោះ​អាច​រស់​នៅតាម​ធម្មជាតិឡើងវិញ ដែលធ្វើឲ្យពួកវាលែងរំពឹងថា ​នឹង​បាន​អាហារ​ពី​មនុស្សតទៅទៀត។

អ្នកជំនាញទេសចរណ៍ក្នុងស្រុកក៏បាននិយាយអំពីអាកប្បកិរិយាគំរាមកំហែងដោយសត្វស្វាទាំងនោះផងដែរ ដូចជាបង្កហានិភ័យដល់មនុស្ស(ភ្ញៀវទេសចរ) ប្រាសាទ និងសុខុមាលភាពបរិស្ថានទាំងមូល និងមានករណីខាំភ្ញៀវ​ទេសចរផងដែរ ចូលរុករើក្នុងធុងសំរាម ឡើងលើប្រាសាទ និងបង្កការខូចខាតដល់កន្លែងទេសចរណ៍ទៀតផង៕