ទូតអូស្ត្រាលី សន្យាថា នឹងខិតខំជួយគាំទ្រកម្ពុជា ដើម្បីសម្រេចនូវគោលដៅប្រទេសគ្មានមីន នៅឆ្នាំ ២០២៥

ឯកអគ្គរាជទូតអូស្ត្រាលីប្រចាំនៅកម្ពុជា បានសន្យាថា នឹងខិតខំធ្វើយ៉ាងណាជួយគាំទ្រកម្ពុជា ឲ្យបានសម្រេចនូវគោលដៅប្រទេសគ្មានមីននៅឆ្នាំ ២០២៥។ ការសន្យានេះ គ្រាដែលសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅព្រឹកថ្ងៃទី ១៣ ខែមីនានេះ បានអនុញ្ញាតឲ្យលោក Justin Kevin Whyatt ឯកអគ្គរាជទូតអូស្ត្រាលីប្រចាំនៅកម្ពុជា ចូលជួបសម្តែងការគួរសម និងពិភាក្សការងារ។

នៅក្នុងជំនួបនេះលោក Justin Kevin Whyatt បានគោរពជម្រាបជូន​សម្ដេចតេជោថា លោកពិតជារីករាយណាស់ ដែលបានត្រឡប់មកកាន់ប្រទេសកម្ពុជាជាថ្មីម្ដងទៀត ហើយលោកកត់សម្គាល់ឃើញថា ប្រទេសកម្ពុជា ពិតជាមានការរីកចម្រើនលូតលាស់យ៉ាងឆាប់រហ័ស។ លោក ក៏សម្ដែងនូវការគោរពចំពោះការដឹកនាំរបស់សម្ដេចតេជោ ក្នុងការទប់ស្កាត់ការឆ្លងរាលជំងឺកូវីដ-១៩ នាពេលកន្លងមក និងការរៀបចំ ដឹកនាំកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ កាលពីឆ្នាំ ២០២២កន្លងមកផងដែរ។

លោក Justin Kevin Whyatt បានគោរពជម្រាបជូនសម្ដេចតេជោ បន្តថា ក្នុងអាណត្តិលោកជាឯកអគ្គរាជទូត​អូស្ត្រាលីប្រចាំនៅកម្ពុជា លោកនឹងខិតខំប្រឹងប្រែង ធ្វើយ៉ាងណាពង្រឹងទំនាក់ទំនងរវាងប្រទេសទាំងពីរ និងកិច្ចសហប្រតិបត្តិការប្រកបដោយប្រសិទ្ធភាពខ្ពស់​ និងក្នុងភាពជាដៃគូទៅលើវិស័យមួយចំនួន ដូចជា៖ ជំរុញទំនាក់ទំនងរវាងប្រជាជន និងប្រជាជន, ទំនាក់ទំនងរវាងអ្នកវិនិយោគ និងអ្នកវិនិយោគ, ជំរុញកិច្ចសហប្រតិបត្តិការលើវិស័យកសិកម្ម, វិស័យសុខាភិបាល និងកិច្ចការងារដោះមីន ជាដើម។ ត្រង់ចំណុចនេះ អូស្រ្ដាលី នឹងខិតខំធ្វើយ៉ាងណាជួយគាំទ្រកម្ពុជា ឲ្យបានសម្រេចនូវគោលដៅប្រទេសគ្មានមីននៅឆ្នាំ ២០២៥ ហើយនឹងបន្តជំរុញកិច្ចសហប្រតិបត្តិការលើវិស័យផ្សេងទៀត ផងដែរ។

ជាការឆ្លើយតប សម្ដេចតេជោ ហ៊ុន​ សែន បានសម្ដែងនូវការស្វាគមន៍ និងអបអរសាទរជូនចំពោះលោក Justin Kevin Whyatt ដែលត្រូវបានតែងតាំងជាឯកអគ្គរាជទូតអូស្ត្រាលីប្រចាំនៅកម្ពុជា។ សម្ដេចតេជោ ហ៊ុន សែន ក៏បានសម្ដែងនូវក្ដីរីករាយ ចំពោះកិច្ចសហប្រតិបត្តិការរវាងប្រទេសទាំងពីរ ជាពិសេសលើវិស័យកសិកម្ម ដែលអូស្ត្រាលីបាន​ជួយកម្ពុជាបង្កើតវិទ្យាស្ថានកាឌី សម្រាប់ការស្រាវជ្រាវ និងអភិវឌ្ឍន៍កសិកម្មកម្ពុជា។ ការស្រាវជ្រាវរបស់វិទ្យាស្ថានកាឌី បាន​នាំប្រទេសកម្ពុជាឲ្យទទួលបានពូជស្រូវដ៏ល្អ ដោយបានជាប់ចំណាត់ថ្នាក់លេខ ១។  

សម្ដេចតេជោ ហ៊ុន សែន ក៏បានថ្លែងអំណរគុណផងដែរចំពោះរដ្ឋាភិបាល និងប្រជាជនអូស្រ្ដាលី ដែលកន្លងមកបាន​ជួយកម្ពុជា ក្នុងការផ្ដល់នូវវ៉ាក់សាំងបង្ការជំងឺកូវីដ-១៩។ សម្ដេចតេជោ ហ៊ុន សែន មានប្រសាសន៍បន្តថា ជោគជ័យរបស់កម្ពុជា លើការទប់ស្កាត់ជំងឺកូវីដ-១៩ គឺមិនអាចកាត់ផ្ដាច់បានពីការគាំទ្រ និងការជួយរបស់អូស្ត្រាលីបានទេ។

សម្ដេចតេជោ ហ៊ុន សែន ក៏បានថ្លែងអំណរគុណផងដែរ ជូនរដ្ឋាភិបាល និងប្រជាជនអូស្ត្រាលី ដែលបានជួយដល់កម្ពុជាលើបញ្ហាដោះមីន និងកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម វិនិយោគ និងវិស័យដទៃទៀត៕