លម្អិត​សមត្ថកិច្ច​ព័ទ្ធ​​ព្រៃ​ជិត​មួយ​អាទិត្យ ទើប​អាច​រកឃើញឃាតក​ដៃ​ឆៅបាន​សម្រេច​

ឃាតកបាញ់សម្លាប់មន្ត្រីនគរបាលនាកណ្តាលរាជធានីភ្នំពេញ បានបាត់បង់ជីវិតហើយ ក្រោយមិនព្រមប្រគល់ខ្លួន ថែមទាំងបានផ្ទុះអាវុធដាក់លើសមត្ថកិច្ចនៅថ្ងៃទី១៥មករានេះថែមទៀតក្នុងខេត្តក្រចេះ។

យោងតាមមន្ត្រីនគរបាលខេត្តក្រចេះ ឃាតកជា​ជនសង្ស័យឈ្មោះអ៊ា ណារ៉េន បានស្លាប់ក្នុងការហ៊ុំព័ទ្ធមួយរបស់សមត្ថកិច្ចនៅភ្នំខៀវ, ភូមិអូរព្រះ, ឃុំអូរគ្រៀង ស្រុក សំបូរ នៃខេត្តក្រចេះ បន្ទាប់ពីមិនព្រមប្រគល់ខ្លួនមកឲ្យសមត្ថកិច្ចចាប់ខ្លួន បើទោះបីជាបានធ្លាក់ក្នុងការហ៊ុំព័ទ្ធក៏ដោយ។

សមត្ថកិច្ចបានដាក់កម្លាំងពង្រាយក្នុងខេត្តក្រចេះប្រមាណជិតមួយសប្តាហ៍ ក្នុងការតាមប្រមាញ់ចាប់ខ្លួនឃាតកសង្ស័យ។

លោកវរសេនីយ៍រ៉េត ស៊ី ណាត នាយរងការិយាល័យ​​​ព្រហ្មទណ្ឌកម្រិត​ស្រាល​នៃស្នងការដ្ឋាននគរបាលរាជធានីភ្នំពេញ ត្រូវឃាតករបាញ់សម្លាប់ ក្នុងហេតុការណ៍ទាស់សម្តីគ្នាមួយ ពេលមានគ្រោះថ្នាក់ចរាចរណ៍វេលាយប់ថ្ងៃទី៣០ធ្នូនៅតាមបណ្តោយមហា វិថីសហ ព័ន្ធរុស្ស៊ី ក្នុងខណ្ឌពោធិ៍សែនជ័យ។ ឃាតកឈ្មោះអ៊ា ណារ៉េន បានរត់គេចខ្លួនចាប់ពី​ថ្ងៃ​កើតហេតុ ហើយ​សមត្ថកិច្ច​ចម្រុះ​បានតាម​ប្រមាញ់​ ទើប​​ល្ងាចនេះ​បានកំណត់​ទីតាំងលាក់ខ្លួនរបស់​ជន​សង្ស័យ​ និង​បាញ់សម្លាប់​ក្រោយពេលមានការ​បាញ់​តដៃ​ពី​ជន​ល្មើស៕