ឯកឧត្តមបណ្ឌិត ហ៊ុន ម៉ាណែត ទទួលបានគោរមងារកិត្តិយស «ទីប្រឹក្សាជាន់ខ្ពស់» ពីអង្គការពុទ្ធសាសនិកពិភពលោក

ឯកឧត្តមនាយឧត្តមសេនីយ៍បណ្ឌិត ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក និងជាប្រធានគ្រូពេទ្យស្ម័គ្រចិត្តយុវជនសម្តេចតេជោ (TYDA) បានទទួលគោរមងារកិត្តិយស «ទីប្រឹក្សាជាន់ខ្ពស់» ពីអង្គការពុទ្ធសាសនិកពិភពលោក។

ពិធីប្រគល់ និងទទួលគោរមងារកិត្តិយស «ទីប្រឹក្សាជាន់ខ្ពស់» របស់អង្គការពុទ្ធសាសនិកពិភពលោក ជូនឯកឧត្តមនាយឧត្តមសេនីយ៍បណ្ឌិត ហ៊ុន ម៉ាណែត នេះ ធ្វើឡើងនៅព្រឹកថ្ងៃទី ២ ខែឧសភា ឆ្នាំ ២០២៣ ដោយធ្វើឡើងនៅរមណីដ្ឋានវប្បធម៌ ប្រវត្តិសាស្ត្រវត្តភ្នំ បរិវេណរូបសំណាកលោកយាយពេញ សង្កាត់វត្តភ្នំ ខណ្ឌដូនពេញ រាជធានីភ្នំពេញ។

នៅក្នុងពិធីនោះ ក៏មានការប្រគល់ និងទទួលគោរមងារកិត្តិយស «ពុទ្ធមាមកាភិបាល» របស់អង្គការពុទ្ធសាសនិកពិភព លោក និង «បណ្ឌិតកិត្តិយសផ្នែកមនុស្សសាស្ត្រ» ដោយសាកលវិទ្យាល័យជាតិ ណេហ្គរី ប៉ាដាង ជូនដល់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ផងដែរ។

បើតាមតំណាងអង្គការពុទ្ធសាសនិកពិភពលោក បានឲ្យដឹងថា សមាជិកក្រុមប្រឹក្សា នៃអង្គការពុទ្ធសាសនិកពិភពលោក តំណាងឲ្យប្រទេសចំនួន ៥៥ ដែលកាន់ព្រះពុទ្ធសាសនា ពិតជាមានការកោតសរសើរចំពោះស្នាដៃរបស់ឯកឧត្តមបណ្ឌិត ហ៊ុន ម៉ាណែត ដែលបានប្រកាន់ខ្ជាប់នូវការលើកកម្ពស់ និងអនុវត្តតាមគន្លងព្រះពុទ្ធសាសនា ជាពិសេសភាពជាអ្នកដឹកនាំរបស់ឯកឧត្តមបណ្ឌិត ក្នុងការលើកកម្ពស់ការអប់រំប្រជាពលរដ្ឋ អំពីសីលធម៌ទូទៅ និងក្រមសីលធម៌ បែបព្រះពុទ្ធសាសនា និងការលះបង់របស់ឯកឧត្ដមបណ្ឌិត ក្នុងការរក្សាឲ្យបាននូវសន្តិភាព វិបុលភាព ការសង្រ្គោះអាយុជីវិតរបស់ប្រជាជន ក្នុងអំឡុងនៃការរីករាលដាលនៃជំងឺកូវីដ-១៩។

ក្នុងពេលនោះ ឯកឧត្តមបណ្ឌិត ហ៊ុន ម៉ាណែត បានកៀគរ និងចល័តគ្រូពេទ្យ និស្សិតពេទ្យ និងអ្នកស្ម័គ្រចិត្ត ចុះពិនិត្យ និងព្យាបាលសុខភាពដោយឥតគិតថ្លៃជូនប្រជាពលរដ្ឋ ក្នុងព្រះរាជាណាចក្រកម្ពុជា។

ជាមួយគ្នានេះ សមាជិកក្រុមប្រឹក្សា នៃអង្គការពុទ្ធសាសនិកពិភពលោក ក៏បានទទួលស្គាល់ផងដែរ ចំពោះសមិទ្ធផលដ៏ឆ្នើមរបស់ឯកឧត្តមបណ្ឌិត ហ៊ុន ម៉ាណែត ក្នុងការផ្ដល់អាហារូបករណ៍រាប់ពាន់កន្លែងដល់យុវជនកម្ពុជា ដើម្បីឲ្យពួកគេមានឱកាសបានសិក្សានៅសាកលវិទ្យាល័យនានា ទូទាំងព្រះរាជាណាចក្រកម្ពុជា។ ការរួមចំណែកដ៏ថ្លៃថ្លា ជាឧត្ដមប្រយោជន៍សង្គមដ៏ខ្ពង់ខ្ពស់គួរឲ្យកត់សម្គាល់ទាំងអស់នេះ គឺជាសក្ខីកម្មនៃទង្វើប្រកបដោយគុណធម៌របស់ឯកឧត្តមបណ្ឌិត ហ៊ុន ម៉ាណែត ដែលស្របនឹងពុទ្ធឱវាទរបស់ព្រះពុទ្ធអង្គ នៃយើង៕