លួចរថយន្តពីខណ្ឌច្បារអំពៅ មកជាប់អន្ទាក់អាវុធហត្ថនៅខេត្តតាកែវ

ជនសង្ស័យម្នាក់ ត្រូវបានសមត្ថកិច្ចខេត្តតាកែវ ឃាត់ខ្លួន ក្រោយពេលធ្វើសកម្មភាពលួចរថយន្តមួយគ្រឿងនៅខណ្ឌច្បារអំពៅ រាជធានីភ្នំពេញ ។

សមត្ថកិច្ចឱ្យដឹងថា ជនសង្ស័យបានលួចរថយន្តមួយគ្រឿងម៉ាកវីហ្គោ ផលិតឆ្នាំ២០២០ ពាក់ស្លាកលេខ ភ្នំពេញ 2BB 7471 ពណ៌ ស នៅចំណុចភូមិចុងព្រែក សង្កាត់ព្រែកឯង ខណ្ឌច្បារអំពៅ រាជធានីភ្នំពេញ។

ក្រោយកើតហេតុ ម្ចាស់រថយន្ត ឈ្មោះ យឹម សុវណ្ណាន មានទីលំនៅ នៅកន្លែងកើតហេតុ បានប្តឹងសមត្ថកិច្ច ឲ្យជួយអន្តរាគមន៍។ បន្ទាប់ពីទទួលពាក្យបណ្ដឹង សមត្ថកិច្ចខណ្ឌច្បារអំពៅ បានបើកប្រតិបត្តការ រហូតកំណត់មុខសញ្ញា និងទិសដៅ ដែលជនសង្ស័យកំពុងធ្វើដំណើរ នៅលើផ្លូវជាតិលេខ២។ លុះរហូតដល់ម៉ោង២០ និង៣០នាទី ថ្ងៃទី២១ ខែមករា ឆ្នាំ២០២១ ជនសង្ស័យត្រូវបានចាប់ខ្លួនដោយកម្លាំងជំនាញកងរាជអាវុធហត្ថខេត្តតាកែវ នៅលើដងផ្លូវជាតិ​លេខ​២ ស្ថិតក្នុងឃុំលំចង់ ស្រុកសំរោង ខេត្តតាកែវ។ ជនសង្ស័យមានឈ្មោះ យ៉ា សម្បត្តិ ភេទប្រុស មានទីលំនៅក្បែរផ្ទះជនរងគ្រោះដែរ។

បច្ចុប្បន្នជនសង្ស័យត្រូវបានកម្លាំងកងរាជអាវុធហត្ថខេត្តតាកែវ កសាងសំណុំរឿងបញ្ជូនទៅសាលាដំបូងខេត្តតាកែវ ចាត់ការតាមនីតិវិធី៕

អត្ថបទ ៖ វីរៈ