សហគ្រាសនាំចូលបារី នឹងត្រូវបង់ពន្ធអាករ​លើតម្លៃបន្ថែម ១០ភាគរយ ចាប់ពីខែសីហាតទៅ

ក្រសួងសេដ្ឋកិច្ច និងហិរញ្ញវត្ថុ មានគោលដៅពង្រឹងការអនុវត្តអាករលើតម្លៃបន្ថែមឱ្យមានតម្លាភាព និងសង្គតិភាព ក៏ដូចជាការណែនាំដល់គ្រប់ម្ចាស់សហគ្រាសដែលប្រកបអាជីវកម្មនាំចូលបារី ឬចែកចាយបន្តទាំងអស់អំពី​នីតិវិធីនៃ​ការអនុវត្តអាករលើតម្លៃបន្ថែម (អតប)។ នេះបើយោងតាមការចេញផ្សាយរបរស់ក្រសួងសេដ្ឋកិច្ច និងហិរញ្ញ​វត្ថុកាល​ពីថ្ងៃទី ២៥ ខែកក្តដា ឆ្នាំ ២០២៣។

យោងតាមប្រភពដដែលបានបញ្ជាក់ថា ចំពោះបារីដែលនាំចូលសម្រាប់គោលដៅលក់ក្នុងស្រុក សហគ្រាសត្រូវ​អនុវត្តអាករលើតម្លៃបន្ថែមដូចទំនិញនាំចូលជាប់អាករដទៃផ្សេងទៀតដែរ ដោយត្រូវប្រមូល អតប តាមអត្រា ១០ ភាគរយ រាល់ការផ្គត់ផ្គង់បារី នៅក្នុងព្រះរាជាណាចក្រកម្ពុជា។ លើសពីនេះ អតប ដែលបានបង់នៅពេលនាំចូល ឬទិញក្នុងស្រុក ត្រូវបានអនុញ្ញាតជាឥណទានអាករលើធាតុចូលសម្រាប់កាត់កងជាមួយអាករលើធាតុចេញ។

ជាមួយគ្នានេះចំពោះបារីដែលនាំចូលសម្រាប់គោលដៅនាំចេញ សហគ្រាសត្រូវបានបន្តអនុញ្ញាតឱ្យបង់ អតប តែម្ដងគត់នៅពេលនាំចូលជាការស្រេច ដូចដែលបានអនុវត្តនាពេលកន្លងមករួចមកហើយ។សហគ្រាសត្រូវដាក់​លិខិតប្រកាស និងបង់ប្រាក់អាករស្របតាមច្បាប់ និងលិខិតបទដ្ឋានគតិយុត្តជាធរមាន។

ក្រសួងសេដ្ឋកិច្ច និងហិរញ្ញវត្ថុ រំពឹងថា គ្រប់សហគ្រាសដែលប្រកបអាជីវកម្មនាំចូលបារី ឬចែកចាយបន្តបារីនាំចូល​ទាំងអស់ នឹងយកចិត្តទុកដាក់អនុវត្តតាមខ្លឹមសារនៃសេចក្ដីណែនាំនេះ​ឱ្យមានប្រសិទ្ធភាពខ្ពស់។

បើតាមក្រសួងសេដ្ឋកិច្ច សេចក្ដីណែនាំនេះ មានប្រសិទ្ធភាពអនុវត្តចាប់ពីថ្ងៃទី០១ ខែសីហា ឆ្នាំ២០២៣ តទៅ៕

អត្ថបទ៖ ផល ធារិត