បណ្ឌិត យង់ ពៅ៖ លោក វ៉ាង យី មកកម្ពុជា អាចជាការមកអញ្ជើញឯកឧត្តម ហ៊ុន ម៉ាណែត ទៅធ្វើទស្សនកិច្ចនៅចិន

លោកបណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជា បានលើកឡើងថា តាមរយៈទស្សនកិច្ចរបស់លោក វ៉ាង យី មកកម្ពុជានៅចុងសប្ដាហ៍នេះ អាចនឹងពាំនាំនូវសេចក្ដីអញ្ជើញរបស់មេដឹកនាំចិនជូនឯកឧត្តម ហ៊ុន ម៉ាណែត នាយករដ្ឋមន្ត្រីថ្មីនៃកម្ពុជា ដើម្បីធ្វើទស្សនកិច្ចផ្លូវការនៅប្រទេសចិន។

លោកបណ្ឌិត យង់ ពៅ លើកឡើងបែបនេះ ស្របពេលដែលរដ្ឋមន្ត្រីក្រសួងការបរទេសចិន លោក វ៉ាង យី គ្រោងបំពេញទស្សនកិច្ចផ្លូវការនៅកម្ពុជា ចាប់ពីថ្ងៃទី១២ ដល់ថ្ងៃទី១៣ ខែសីហា ខាងមុខនេះ ដើម្បីពង្រឹងពង្រីកនូវទំនាក់ទំនង និងកិច្ចសហប្រតិបត្តិការល្អជាប្រពៃណីរវាងប្រទេសទាំងពីរ កម្ពុជា-ចិន។

បើតាមក្រសួងការបរទេសកម្ពុជា ក្នុងអំឡុងពេលទស្សនកិច្ចនេះ លោក វ៉ាង យី នឹងចូលក្រាបបង្គំគាល់ព្រះមហាក្សត្រនៃកម្ពុជា ព្រមទាំងអញ្ជើញចូលជួបសម្តែងការគួរសមដាច់ដោយឡែកចំពោះសម្តេចតេជោ ហ៊ុន សែន និងឯកឧត្ដមបណ្ឌិត ហ៊ុន ម៉ាណែត។ ក្រសួងការបរទេស បញ្ជាក់ថា កិច្ចពិភាក្សានេះ នឹងផ្តោតលើបញ្ហាមួយចំនួនពាក់ព័ន្ធកិច្ចសហប្រតិបត្តិការទ្វេភាគី និងពហុភាគី ដែលឆ្លុះបញ្ចាំងអំពីវិស័យអាទិភាពរួម។

ប៉ុន្តែ យ៉ាងណាមិញ ជាការមើលឃើញរបស់លោកបណ្ឌិត យង់ ពៅ គឺទស្សនកិច្ចរបស់លោក វ៉ាង យី មកកម្ពុជានៅពេលនេះ ជាទស្សនកិច្ចលើកទី១ ក្រោយពេលដែលលោកឡើងកាន់តំណែងជារដ្ឋមន្ត្រីការបរទេសចិនជាថ្មីម្ដងទៀត ហើយក៏ជាទស្សនកិច្ចចំពេលកម្ពុជា នឹងមាននាយករដ្ឋមន្ត្រីថ្មីផងដែរ។

ក្នុងន័យនេះ លោកបណ្ឌិត យង់ ពៅ ចង់បង្ហាញថា ចិនបានផ្ដល់សញ្ញាណជាប្រទេសជាមិត្តមុនគេ សម្រាប់ដំណើរទស្សនកិច្ចទៅក្រៅប្រទេសរបស់នាយករដ្ឋមន្ត្រីថ្មីនៃកម្ពុជា គឺឯកឧត្តម ហ៊ុន ម៉ាណែត។ ទន្ទឹមនេះ បណ្ឌិត យង់ ពៅ មើលឃើញដែរថា តាមរយៈទស្សនកិច្ចរបស់លោក វ៉ាង យី ក៏អាចជាការពាំនាំនូវសេចក្ដីអញ្ជើញរបស់មេដឹកនាំចិន ជូនចំពោះឯកឧត្តម ហ៊ុន ម៉ាណែត ដើម្បីទៅបំពេញទស្សនកិច្ចជាផ្លូវការនៅប្រទេសចិនផងដែរ ក្រោយពេលឯកឧត្តម ហ៊ុន ម៉ាណែត ក្លាយជានាយករដ្ឋមន្ត្រីពេញសិទ្ធិ នៅពេលខាងមុខឆាប់ៗនេះ៕  

ដោយ៖ ធឿន វ៉ាន់សុង