​ប្រធាន​មន្ទីរ​សាធារណការ បញ្ជាក់​ករណី​ទឹកភ្លៀងហូរច្រោះ​ធ្វើឱ្យបាក់លូនៅចំណោតលោកយាយម៉ៅ​

ប្រធានមន្ទីរសាធារណការ និងដឹកជញ្ជូន ខេត្តព្រះសីហនុ លោក បូរី វង្សសានិត បានបញ្ជាក់ប្រាប់កម្ពុជាថ្មីនៅព្រឹកថ្ងៃទី ១២ ខែកញ្ញា ឆ្នាំ ២០២៣នេះថា ​ករណី​បាក់ស្រុតនៅចំណោតលោកយាយម៉ៅ គឺជាករណីបាក់​លូបេតុងប្រវែងប្រមាណ ៤ ម៉ែត្រ ​ដោយសារជំនន់ទឹក​ភ្លៀង​ហូរច្រោះ​ ស្ថិតនៅកំណាត់​ផ្លូវជាតិលេខ៤ ត្រង់ចំណុចគ.ម ២២៤+០០៨។

​លោកបញ្ជាក់ថា ករណីនេះ មិនមានបាក់ស្រុតផ្លូវនោះទេ ​ពោលគឺបាក់លូហើយ ហើយនៅរដូវធ្លាក់​ភ្លៀង​មន្ទីរសាធារណការខេត្តបារម្ភខ្លាចហូរច្រោះ​នៅចិញ្ចើមផ្លូវ ក៏បានយកបាវច្រកខ្សាច់​ទៅទប់នៅ​ចំណុចលូដែលបាក់ កុំឱ្យវាបាក់បន្តទៀត​។

​លោកប្រធានមន្ទីរបញ្ជាក់ថា ​មន្ទីរបានចាត់វិធានការរួចហើយ ​មិនមានការបារម្ភ​សម្រាប់អ្នកដំណើរ​នោះទេ ខណៈមន្ទីរក៏បានជូនដំណឹងទៅក្រសួងរួចហើយដើម្បីឱ្យក្រុមការងារ​នាយកដ្ឋានជំនាញ​ក្រសួងដើម្បីឱ្យគាត់ចុះមកសិក្សាកែលម្អទីតាំងនេះតែម្ដង៕