ស្ត្រីវៀតណាមដែលបានលក់ផ្លែពុទ្រាក្នុងតម្លៃថ្លៃទៅឱ្យភ្ញៀវទេសចរម្នាក់ ត្រូវរងការព្រមានពីអាជ្ញាធរ

ប៉ុន្មានថ្ងៃនេះនៅលើបណ្ដាញសង្គមកំពុងផ្ទុះការចាប់អារម្មណ៍ខ្លាំងទៅស្ត្រីជនជាតិវៀតណាមម្នាក់ ដែលបានលក់ផ្លែពុទ្រាទៅឱ្យជនបរទេសម្នាក់ក្នុងតម្លៃថ្លៃរហូតដល់​ ២០​ម៉ឺន​ដុង​ (៨ដុល្លារ) ត្រឹមតែមួយកូនថង់តូចប៉ុណ្ណោះ​ ។

ក្រោយពីវីដេអូឃ្លីបដែលថតដោយបុរសជនបរទេសរូបនោះចែកចាយលើបណ្ដាញសង្គម បានបង្កឱ្យមានការការខឹងសម្បាយ៉ាងខ្លាំងដល់មហាជន រហូតដល់ធ្វើឱ្យគណៈកម្មាធិការប្រជាជន ស្រុក Tay Ho បានដឹកនាំក្រុមជំនាញធ្វើកំណត់ហេតុ និងចេញសេចក្តីសម្រេចដាក់ពិន័យរដ្ឋបាលចំនួន ១៥០,០០០ ដុង (៦ដុល្លារ) លើស្ត្រីរូបនោះ ពីបទលក់ទំនិញតាមដងផ្លូវ ប្រឆាំងនឹងបទប្បញ្ញត្តិ និងដោយគ្មានការប្រកាសតម្លៃ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការផ្សាយពីសារព័ត៌មាន Zing news នៅថ្ងៃទី១៩ ខែមីនា ឆ្នាំ ២០២៤ នេះ បានឱ្យដឹងថា ស្ត្រីរូបនេះមានឈ្មោះ ជាអក្សរកាត់ថា BTL មានស្រុកកំណើតនៅស្រុក Hung Yen ។ ប្រភពបានឱ្យដឹងថា នៅក្នុងជំនួបរវាងស្ត្រី BTL និងគណៈកម្មាធិការប្រជាជន ស្រុក Tay Ho គាត់បានសារភាពថា គាត់បានដឹងកំហុសមួយនេះ ដែលជាការមិនត្រឹមត្រូវក្នុងក្រមសីលធម៌ជាអ្នកលក់ ហើយអាកប្បកិរិយានេះបានបង្កើតរូបភាពមិនអំណោយផលរបស់ទីក្រុងហាណូយសម្រាប់ភ្ញៀវទេសចរបរទេស។ ជាមួយគ្នានេះដែរ BTL បានសន្យាថា​ នឹងមិនប្រព្រឹត្តិសកម្មភាពខុសឆ្គងដូច្នេះម្ដងទៀតឡើយ ៕

ប្រែសម្រួលដោយ៖ ប៉ោ កុសល