កីឡា

មិនធ្លាប់មាន! កាតារ ម៉ារ៉ុកទទួលធ្វើម្ចាស់ផ្ទះជើងឯកពិភពលោក U17 ៥លើកជាប់គ្នា

បានផុស

២ years មុន

នៅ

ថ្ងៃអង្គារ ១៩ មីនា ២០២៤

ដោយ

សហព័ន្ធកីឡាបាល់ទាត់ពិភពលោក (FIFA) បានប្រកាសជាផ្លូវការពីប្រទេសកាតារ និងម៉ារ៉ុក ទទួលធ្វើម្ចាស់ផ្ទះរៀបចំការប្រកួតជើងឯកពិភពលោកអាយុក្រោម១៧ឆ្នាំពីរវិញ្ញាសា ៥លើកជាប់គ្នា។

FIFA បានប្រកាសកាលពីថ្ងៃព្រហស្បតិ៍ថា ប្រទេសកាតារទទួលរៀបចំការប្រកួតបាល់ទាត់ពិភពលោកអាយុក្រោម១៧ឆ្នាំ ៥លើកជាប់គ្នាគឺឆ្នាំ២០២៥ ២០២៦ ២០២៧ ២០២៨ និង ២០២៩។ ចំណែក ម៉ារ៉ុកទទួលធ្វើម្ចាស់ផ្ទះជើងឯកពិភពលោកនារីអាយុក្រោម១៧ឆ្នាំ ចាប់ពីឆ្នាំ២០២៥ ដូចប្រទេសកាតារដែរ។

កាលពីមុន ការប្រកួតជើងឯកពិភពលោកអាយុក្រោម១៧ឆ្នាំ ទាំងវិញ្ញាសាបុរស និងវិញ្ញាសានារី ត្រូវធ្វើឡើងរាល់ពីរឆ្នាំម្តង ប៉ុន្តែចាប់ពីឆ្នាំ២០២៥ទៅ ការប្រកួតធ្វើឡើងជារៀងរាល់ឆ្នាំតែម្តង។ អ្វីដែលកាន់តែពិសេសគឺជើងឯកយុវជនត្រូវបានពង្រីកក្រុមពី២៤ ទៅ៤៨ក្រុម ខណៈផ្នែកនារី កើនឡើងពី១៦ក្រុម ទៅ២៤ក្រុម ស្របតាមការប្រកួតថ្មីៗរបស់ FIFA។

ការសម្រេចចិត្តរបស់ FIFA ក្នុងការជ្រើសរើសប្រទេសម្ចាស់ផ្ទះតែមួយសម្រាប់ការការប្រកួតជាបន្តបន្ទាប់បែបនេះគឺផ្អែកលើ «ហេដ្ឋារចនាសម្ព័ន្ធបាល់ទាត់មានស្រាប់ ដើម្បីផលប្រយោជន៍នៃការប្រកួតប្រកបដោយប្រសិទ្ធភាព និងនិរន្តរភា»។

ប្រទេសកាតារ និងម៉ារ៉ុក យល់ច្បាស់ពីរបៀបនៃការរៀបចំក្នុងប៉ុន្មានឆ្នាំចុងក្រោយនេះ។ ពួកគេបានរៀបចំការប្រកួតបាល់ទាត់ដ៏ធំបំផុតរបស់ពិភពលោក។ ជាពិសេស កាតារ ទើបតែធ្វើម្ចាស់ផ្ទះជើងឯកពិភពលោកបុរស កាលពីឆ្នាំ២០២២ ហើយចុងឆ្នាំ២០២៤នេះនឹងដណ្តើមយកពានរង្វាន់ Asian Cup ពីម្ចាស់ផ្ទះចិន។

ម៉ារ៉ុកនឹងសហការរៀបចំការប្រកួតបាល់ទាត់ពិភពលោកឆ្នាំ២០៣០ ជាមួយអេស្ប៉ាញ និងព័រទុយហ្គាល់ ដោយមានការប្រកួតចំនួន៣ ដែលត្រូវលេងនៅអាមេរិកខាងត្បូង ដែលជាផ្នែកមួយនៃការប្រារព្ធខួបមួយរយឆ្នាំនៃការប្រកួតបាល់ទាត់ពិភពលោក៕

ប្រែសម្រួល៖ មន្នីរ័ត្ន
ប្រភព៖ FIFA.com