កម្ពុជា នឹងមានការប្រកួតសរសេរតាមអាន​ដើម្បីលើកកម្ពស់កម្រិតអក្សរសាស្ត្រខ្មែរ

លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្ត្រីក្រសួងអប់រំ យុវជន និងកីឡាបានប្រកាស​គាំទ្រឱ្យមានការប្រកួតប្រជែងសរសេរតាមអាន «សំណេរអង្គរ»ដើម្បីលើកកម្ពស់កម្រិត​អក្សរសាស្ត្ររបស់​ប្រជា​ពលរដ្ឋខ្មែរទូទៅ ជាពិសេស សិស្ស និស្សិត ក្នុងយុគសម័យឌីជីថល។

នៅក្នុងជំនួបសម្តែងការគួរសម និងពិភាក្សាការងារជាមួយលោក លីម ប៊ុនហុក អគ្គលេខាធិការរង រដ្ឋសភាកាល​ពីថ្ងៃទី២២ កញ្ញា លោកឧបនាយករដ្ឋមន្ត្រីបានមានប្រសាសន៍ថា ក្រសួងនឹងចាត់តាំងមន្ត្រីជំនាញបច្ចេកទេស ក្នុងការងារ​រៀបចំកម្មវិធី សរសេរតាមអាន៖ «សំណេរអង្គរ» នេះ ឱ្យបានត្រឹមត្រូវ តម្លាភាពតាមបច្ចេកទេស នៃការប្រឡង ដោយមានគណៈកម្មាការរៀបចំប្រឡង គណៈកម្មាការអនុរក្ស និងគ្រូកំណែត្រឹមត្រូវតាមស្តង់ដាដែលបានកំណត់។

លោក លីម ប៊ុនហុក អគ្គលេខាធិការរងរដ្ឋសភា បានលើកឡើងថា គម្រោងស្តីពីការរៀបចំ កម្មវិធីសរសេរតាម​អាន«សំណេរអង្គរ» ធ្វើឡើងក្នុងគោលបំណងដើម្បីលើកកម្ពស់កម្រិតអក្សរសាស្ត្រខ្មែររបស់ប្រជាពលរដ្ឋខ្មែរទូទៅ ជាពិសេស សិស្ស និស្សិត ក្នុងយុគសម័យឌីជីថល ។

លោកបានស្នើសុំកិច្ចសហការរៀបចំគាំទ្រពីក្រសួងអប់រំ យុវជន និងកីឡា «កម្មវិធីសរសេរតាមអាននេះ នឹងត្រូវរៀប​ចំឡើងក្នុងទម្រង់ជាការប្រកួតប្រជែងជាសាធារណៈហើយក៏ជាមធ្យោបាយមួយសម្រាប់ទាញយកចំណាប់អារម្មណ៍របស់សាធារណជនលើសារៈសំខាន់នៃអក្សរសាស្ត្រខ្មែរ ក៏នឹងអនុញ្ញាតឲ្យអ្នកចូលរួម​ដោយផ្ទាល់ពង្រីកចំណេះ​ដឹងទូទៅ​របស់ខ្លួន លើប្រធានបទដែលជាកម្មវត្ថុនៃសំណេរនេះផងដែរ ។

លោកបានបន្តទៀតថា តាមរយៈការប្រកួតសរសេរតាមអាន ដែលមានចំណងជើងថា «សំណេរអង្គរ» អ្នកចូលរួម​នឹងទទួលបានចំណេះដឹងទូទៅ ជុំវិញប្រវត្តិនៃរមណីយដ្ឋានអង្គរ ដែលមានអាយុ​កាលជាង​មួយពាន់ឆ្នាំមកហើយ។

បន្ថែមពីនោះ លោកអគ្គលេខាធិការរងរដ្ឋសភាក៏បានស្នើសុំលោកបណ្ឌិតសភាចារ្យ ឧបនាយករដ្ឋមន្រ្តី  ដើម្បីដាក់​ចេញប្រធានបទសម្រាប់ការសរសេរតាមអាន«សំណេរអង្គរ» ដែលគ្រោងនិងរៀបចំនាពេលខាងមុខ។

លោកបណ្ឌិតសភាចារ្យ ឧបនាយករដ្ឋមន្រ្តីបានបញ្ជាក់ថា សម្រាប់ប្រធានបទនៃការប្រកួតសរសេរតាមអាន«សំណេរអង្គរ»នេះលោកដាក់ចេញដោយផ្ទាល់ និងសមស្របតាមកម្រិត លក្ខខណ្ឌផ្សេងៗនៃកម្មវិធី ៕

អត្ថបទ ៖ សំអឿន