អង្គការភ្លែនអន្តរជាតិ គាំទ្រភាពជាអ្នកដឹកនាំរបស់ក្មេងស្រី​ក្នុងយុគសម័យឌីជីថល

អង្កការភ្លែនអន្តរជាតិកម្ពុជា សហការជាមួយយុវជនមួយក្រុម រៀបចំការសម្តែងរបស់យុវជន ដើម្បីអបអរសាទរ​ទិវាអន្តរជាតិក្មេងស្រី នៅថ្ងៃទី៦ ខែតុលា ឆ្នាំ ២០២៣ ក្រោមប្រធានបទ «រួមគ្នា គាំទ្រភាពជាអ្នកដឹក​នាំរបស់ក្មេងស្រ្តីក្នុងយុគសម័យឌីជីថល»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសម្តែងនេះ មានគោលបំណងដើម្បីទទួលបានការចាប់អារម្មណ៍ពីទស្សនិកជនដែលមកពីស្ថាប័នឯកជន ស្ថានទូត ទីភ្នាក់ងារអង្កការសហប្រជាជាតិ និងអង្គការមិនមែនរដ្ឋាភិបាល ដើម្បីគាំទ្រដល់ក្មេងស្រីក្នុងការដើរតួជាអ្នកដឹកនាំ ក្នុងយុគសម័យឌីជីថលនេះ។

លោកស្រី ហ្វីននេត វ៉ង នាយិកាប្រចាំប្រទេសនៃអង្គការភ្លែនអន្តរជាតិកម្ពុជា មានប្រសាសន៍ថា កុមារី និងស្ត្រីវ័យក្មេងនៅមិនទទួលបានមុខតំណែងជាអ្នកដឹកនាំទាំងក្នុងវិស័យសាធារណៈនិងឯកជន។ តំណាងស្ត្រីមិនគ្រប់គ្រាន់ក្នុងការធ្វើសេចក្ដីសម្រេចចិត្ត គឺជាផលវិបាកមួយទៀតនៃវិសមភាពយេនឌ័រ។ ការទទួលបានការអប់រំនៅតែជាបញ្ហាប្រឈមសម្រាប់ស្ត្រី។ លទ្ឋភាពក្នុងការទទួលបានការអប់រំខ្ពស់ នៅតែជាឧបសគ្គសម្រាប់ក្មេងស្រីជាច្រើន ហើយប្រសិនបើមិនអាចទៅសាលាដើម្បីទទួលការអប់រំខ្ពស់ ស្រ្តីវ័យក្មេងជាច្រើនមិនអាចទទួលបានឱកាសកាន់តំណែងជាអ្នកដឹកនាំនោះទេ។

លោកស្រី ក្លិននេក បានពន្យល់ថា ឧបសគ្គមួយទៀតរបស់ក្មេងស្រី គឺការរៀបអាពាហ៍ពិពាហ៍វ័យកុមារ។ យោងតាមការអង្កេតប្រជាសាស្ត្រ និងសុខភាពកម្ពុជាឆ្នាំ ២០២១ -២០២២ ក្មេងស្រី១៩% និងស្ត្រីវ័យក្មេង​ដែលមានអាយុក្រោម១៨ឆ្នាំ, ក្មេងប្រុស និងបុរសវ័យក្មេងចំនួន ៦% ត្រូវបានបង្ខំឱ្យរៀបអាពាហ៍ពិពាហ៍។ លើសពីនេះទៀត ក្មេងស្រីដែលមានអាយុ ១៥ឆ្នាំចំនួន១,៨% ត្រូវបានបង្ខំឱ្យរៀបអាពាហ៍ពិពាហ៍។ យោងតាមសិក្ខាសាលាពិគ្រោះយោបល់ជាមួយរដ្ឋាភិបាលថ្នាក់ក្រោមជាតិ និងយុវជន រួមទាំងស្ត្រីវ័យក្មេង​នៅខេត្តសៀមរាប រតនគិរី និងខេត្តស្ទឹងត្រែង មានឫសគល់បញ្ហាជាច្រើនដែលធ្វើឱ្យមានការរៀបអាពាហ៍ពិ​ពាហ៍វ័យកុមារ រួមមាន កង្វះចំណេះដឹង និងព័ត៌មានស្តីពីសុខភាពផ្លូវភេទ សុខភាពបន្តពូជ និងសិទ្ឋិដែល​អាចនាំឱ្យកេ្មងស្រី និងស្រ្តីវ័យក្មេងមានផ្ទៃពោះ ហើយបន្ទាប់មកបង្ករឱ្យអាពាហ៍ពិពាហ៍ និងបោះបង់ការសិក្សា ក៏ដូចជាកង្វះចំណេះដឹង និងព័ត៌មានទាក់ទងនឹងសិទ្ធិរបស់ក្មេងស្រីក្នុងការសម្រេចចិត្ត និងការរៀបចំផែនការគ្រួសារ។

លោកស្រី ភ្វីននេត បានពន្យល់ថា៖ “បទដ្ឋាន ទំនៀមទំលាប់សង្គមតឹងតែង ជាពិសេសសម្រាប់ក្មេងស្រីជន​ជាតិ​ដើមភាគតិច ដែលរៀបការនៅអាយុ ១៤ ឬ ១៥ ឆ្នាំ។ លើសពីនេះទៀត នៅពេលដែលគ្រួសាររបស់ពួកគេក្រីក្រ ពួកគេប្រហែលត្រូវរៀបអាពាហ៍ពិពាហ៍ដើម្បីកាត់បន្ថយហិរញ្ញវត្ថុរបស់គ្រួសារឬមានសមាជិកបន្ថែមទៀត ក្នុងការរកប្រាក់ចំណូលក្មេងស្រី និងស្ត្រីវ័យក្មេងប្រឈមមុខនឹងការរើសអើងភេទ។ ជំនឿបែបប្រពៃណី ដែលមិនឱ្យតម្លៃលើ សមត្ថភាព និងសក្តានុពលរបស់ស្ត្រី គឺជាឧបសគ្គ ដែលមើលមិនឃើញចំពោះ​ការចូលរួមយ៉ាង​សកម្ម របស់ពួកគេ។ ជាការពិតណាស់ដែលស្ត្រីវ័យក្មេងជឿថា ពួកគេមានសមត្ថភាពតិចជាងបុរស និងមិនសូវសក្តិសមក្នុងតួនាទីនយោបាយ និងអភិបាលកិច្ច។

កញ្ញា ស្រីនិច្ច ជាក្មេងស្រីកាន់តួនាទីជំនួសលោកស្រីនាយិកាប្រចាំប្រទេសអង្គការភ្លែនអន្តរជាតិកម្ពុជា សម្រាប់មួយថ្ងៃ មកពីខេត្តសៀមរាប បានលើកឡើងថា «មនុស្សភាគច្រើនបានប្រាប់ខ្ញុំថា ខ្ញុំមិនអាចធ្វើអ្វីបានទេ ព្រោះខ្ញុំជាជន​មានពិការភាពនិងជាក្មេងស្រី។ ក្មេងស្រីមិនមែនជាបន្ទុកដល់សង្គមនោះទេ។ ផ្ទុយទៅវិញ នាងគឺជាផ្នែកមួយក្នុង​សង្គមដែលកំពុងអភិវឌ្ឍន៍ និងដោះស្រាយបញ្ហា។ មធ្យោបាយល្អដ៏ប្រសើរក្នុងការអភិវឌ្ឍប្រទេស ក៏នៅពេល​ដែលបុរសនិងស្ត្រី ជាពិសេសក្មេងស្រីសហការគ្នាយ៉ាងខ្លាំង និងសកម្មដោយមានស្មើភាពគ្នា”។

សូមបញ្ជាក់ថា ទិវាអន្តរជាតិក្មេងស្រី ត្រូវបានប្រារព្ធជារៀងរាល់ឆ្នាំនៅថ្ងៃទី១១ ខែតុលា ដើម្បីទទួលស្គាល់​សិទ្ធិរបស់​ក្មេងស្រី និងបញ្ហាប្រឈមដែលក្មេងស្រីជុំវិញពិភពលោកជួបប្រទះ និងផ្ដោតសំខាន់លើ​ការលើកកម្ពស់​សិទ្ធិអំណាច​របស់ក្មេងស្រី និងការបំពេញសិទ្ឋិមនុស្សរបស់ពួកគេ៕