អង្គការភ្លែន នាំអ្នកសារព័ត៌មានទៅខេត្តរតនៈគិរី ដើម្បីសិក្សាឈ្វេងយល់ពីការរៀបការវ័យក្មេងរបស់ក្មេងស្រី

អង្គការភ្លែនអន្តរជាតិកម្ពុជា បានរៀបចំដំណើរទស្សនកិច្ចសិក្សាដល់អ្នកសារព័ត៌មានចំនួន ១៣រូប មកពីស្ថាប័នផ្សេងៗគ្នាទៅកាន់ខេត្តរតនៈគិរី ដើម្បីឈ្វេងយល់ពី«ការរៀបការវ័យក្មេង និងភាពជាអ្នកដឹកនាំរបស់ក្មេងស្រី» នៅទីនោះ។ ដំណើរទស្សនកិច្ចសិក្សានេះ មានរយៈពេល៤ ចាប់ពីថ្ងៃទី១១ ដល់១៤ ខែមីនា ឆ្នាំ២០២៤។

ដំណើរទស្សនកិច្ចនេះ មានគោលបំណងបង្ហាញពីគុណសម្បត្តិ និងគុណវិបត្តិនៃការរៀបអាពាហ៍ពិពាហ៍វ័យក្មេងរបស់ក្មេងស្រីជនជាតិដើមភាគតិច ព្រមទាំងបង្ហាញអំពីភាពជាអ្នកដឹកនាំរបស់ក្មេងស្រីនៅក្នុងគ្រួសារ និងសហគមន៍របស់ពួកគេ។ ការធ្វើទស្សនកិច្ចនៅសហគមន៍ គម្រោង និងកម្មវិធីដែលររៀបចំដោយអង្គការភ្លែនអន្តរជាតិ គឺជាឱកាសមួយ ដើម្បីឈ្វែងយល់ពីការងារសសហគមន៍ ដែលរួមចំណែកលើកកម្ពស់សិទ្ធកុមារ និងសមភាពក្មេងស្រី។ ជាពិសេស ហានិភ័យជាច្រើនដែលផ្តល់ផលប៉ះពាល់អវិជ្ជមានទៅលើកុមារ យុវជន និងអ្នកចូលរួមកម្មវិធី ដោយសាររមូលហេតុដែលទាក់់ទងទៅនឹងយេនឌ័រ ទំនោរផ្លូវភេទ ដើមកំណើត ជាតិសាសន៍ ពិការភាព អាយុ ជំងឺ ឬមូលហេតុផ្សេងៗទៀតដែលអាចកើតមានឡើង។

របាយ​ការណ៍​សិក្សា​របស់​អង្គការ​ភ្លែនអន្តរ​ជាតិ​កម្ពុជា និង​ក្រសួង​កិច្ចការ​នារី​ ស្តី​ពីការ​រៀប​អាពាហ៍​ពិពាហ៍​នៅ​វ័យ​កុមារ និង​ការ​មាន​ផ្ទៃ​ពោះ​នៅ​វ័យ​ជំទង់​បានបង្ហាញ​ថា បញ្ហា​នេះ​ នៅតែជាក្តីបារម្ភសម្រាប់កម្ពុជា បើ​ទោះ​បី​ជា​អត្រា​នៃ​ការ​រៀប​ការ​នៅ​វ័យ​កុមារ​ធ្លាក់​ចុះ​តិច​តួច​ក្តី។ ដោយឡែក បើផ្អែកតាមការសិក្សាស្រាវជ្រាវស្ថិតិដើមគ្រាកម្រិតខេត្ត​របស់អង្គការភ្លែនអន្តរជាតិ និងក្រសួងកិច្ចការនារី បានឱ្យដឹងថា ក្នុងចំណោមខេត្តទាំង៩ នៃការសិក្សា អត្រាស្ត្រីដែលបានរៀបការមុនអាយុ ១៨ឆ្នាំ មានខេត្តរតនៈគិរី ៣៧.៣% ខេត្តព្រះវិហារ ១៦.៧% ខេត្តស្ទឹងត្រែង ១៤.៧% ខេត្តកំពត ១៤% ខេត្តសៀមរាប ១២% ខេត្តព្រៃវែង១០.៧% ខេត្តព្រះហសីហនុ ៩.៣% ខេត្តបាត់ដំបង ៨% ខេត្តតាកែវ ៧.៣%។

គួរឱ្យដឹងថា​ អង្គការភ្លែនអន្តរជាតិ គឺជាអង្គការអភិវឌ្ឍន៍ និងមនុស្សធម៌ ដែលលើកកម្ពស់សិទ្ធិកុមារ និងសមភាពក្មេងស្រី ហេតុដូច្នេះ អង្គការភ្លែនអន្តរជាតិ មិនអត់អោនចំពោះរាល់ករណីនៃការរំលោភបំពាន និងអំពើហិង្សាលើកុមារ ឬយុវជនឡើយ។ អំពើហិង្សាក្នុងន័យនេះ រួមមាន អំពើហិង្សាផ្លូវកាយ ឬ ផ្លូវចិត្ត ការបង្ករបួសស្នាម និងការរំលោភ-បំពាន ការមិនអើពើ ឬការប្រព្រឹត្តដោយការធ្វេសប្រហែស ការប្រព្រឹត្តមិនត្រឹមត្រូវ និងការបៀតបៀនផ្លូវភេទ ការកេងប្រវ័ញ្ចផ្លូវភេទ ការធ្វើអាជីវកម្មផ្លូវភេទ និងការរំលោភ-បំពានផ្លូវភេទ៕